2 Taateenaꞌo 16 - Kafa Linguistics Project

Yihudee Taatoo Akaazi Mooyo

¹ Remaliyi bushoo Feqaahi taateti aaraa shabaattinnee natooba, Yihudee taatoo, Yotaami bushoo Akaazi taatehe.

² Bi taatehooba, bi eeno hiye natone. Yerusaalem beechii aaraa shiritte naton qeejjiye. Biyoo bi qaabbechi Daawiti tuniitoommon, bi Nuggishoo Doono Yeeri aafooch kaame mooyon tuniyaanoone.

³ Israꞌeelee taateenaꞌochi gommon dabbiye; Doono Yeeri Israꞌeeleenaꞌo aafoochee yookkii kichiti aageteenaꞌochi, ciigiiti doyoon dabboona bi bushoon qaaqqooch goggiꞌi deejjiye.

⁴ Akaazi guudi toommeexi goyinnee xaaꞌeenaꞌoochaa, geppeenaꞌonaa waajjechi michi baatoo bullinoochaa deejjoon deejjiye; ixaanoonoo shookkiye.

⁵ Ebiyooba Sooriyee taatoo Resininaa Israꞌeelee taatoo, Remaliyi bushoo Feqaahina Yerusaalemin koyoyich waaꞌi giichiyeete. Tunebaani Akaazin kochii wochoon hakkaaneenaꞌone.

⁶ Ebiyoobee yemeenooch Sooriyee taatoo Resini Elaati katemoon kochiꞌi Sooriyee showooch wochiye; Yihudee asheenaꞌonoo aroochee yookkiye. Edoomee asheenaꞌo Elaat waaꞌi, hanaach beddaahaa arooch kotetinaꞌone.

⁷ Ebina Akaazi ishichiꞌi wocheyechinaꞌon Asooree taatoo Tigilaat Fileseer waan daachiihe: “Ta, ne guuno, wottoo ne bushoo taane. Taan kochiibeeti Sooriyee taatoo kishoonaa Israꞌeelee taatoo kishoonoochee waaree taan wodiibe” iye.

⁸ Akaazi wotta Doono Yeerichi yaafee kexonaa taatee kexonochi ginjabeetooch beeti birewoonaa aachoonon kichii, Asooree taatoyich daachiihe.

⁹ Asooree taatoo bi qolloon waayeꞌi, Damaasiqin kochii yechiye. Areexi asheenaꞌonoo kecciꞌi, Qiiri katemooch daammiye; Sooriyee taatoo Resininoo wuxiye.

¹⁰ Taatoo Akaazi Asooree taatoo Tigilaat Fileseerina daneya Damaasiqa bi hamiyooba, arooch beeti deejjee gudoon beeggiye. Aroommi deejjee gudo shuuneyemmoyich bi misiloon qeeshoo Uuriyich deejjiye.

¹¹ Qeeshoo Uuriyiyoo taatoo Akaazi Damaasiqee biich bi deejjiti misiloommon deejjee gudoon shuunehe. Taatoo Akaazi wottoyee shiichiꞌi qanniihe.

¹² Taatoo Damaasiqee wottee waaꞌi deejjee gudoon beeggiye; deejjee gudo beetooch waaꞌinoo deejjee gudee toommooch kechiye.

¹³ Aroochee micciibeeti deejjoonaa maayi buuroonon are deejjee gudoochaa deejjiye; uyee deejjoonoo arooch ukkiye; ikkittinee deejjee damoonoo arooch tibiye.

¹⁴ Doono Yeeri aafooch beeti gooshee deejjee gudoon yaafee kechi aafoochee, bi shuuniiti deejjee gudoonaa Doono Yeerichi yaafee kexonochi gutte daggoochee wokkiiꞌi, bi shuuniiti deejjee gudoyee dambi-waan kotiihe.

¹⁵ Aroochee taatoo Akaazi qeeshoo Uuriyich ishichiꞌi gettiye: “Maaddoona giddeebeeti, micciibeeti deejjoon, womikka giddeebeeti maayi buuroon, taatoochi qoodooch giddeebeeti, micciibeeti deejjoonaa maayi buuroonon, showee asheenaꞌo bullichi qoodoochoo giddeebeeti, micciibeeti deejjoon, maayi buuroonaa uyee deejjoonon ooge deejjee gudee toommoochaa deejjibe; micciibeeti deejjee damoo bullinaa bare deejjee damoo bullinon aree toommooch tibibe; tunebaani gooshoochee shuuneeti deejjee gudo ta qaawaabeeti mooyon aroona ta echemmoyich tunebe” iye.

¹⁶ Qeeshoo Uuriyi taatoo Akaazi biich gettito bulliyoommon tuniihe.

¹⁷ Taatoo Akaazi gooneenaꞌochi gocooch beeti qoomeenaꞌon kuxxiye; bi koteenaꞌonoo daammiye. Gooshoochee shuuneeti, aaco kiceebeeti ooge gamini gaanoon bi dechiich beeti, gooshoochee shuuneeti aaraa gutte gatteenaꞌochi misilee toommoochee kindiihe; xaqqee hecee toommoochoo kotiihe.

¹⁸ Asooree taatoon emirikkoyicha iꞌi, shambetee aaboon taatee qeeno yaggeyemmoyich, yaafee kechi daggooch hashakaayaa shuuneeti oogee xaaꞌoon happiye; Doono Yeerichi yaafee kexooch taatoo giyiibeeti maachi kelloonoo hicciye.

¹⁹ Akaazi shuuneti eche shuunoo Yihudee taateenaꞌo kiinee macaafooch kooreetone.

²⁰ Akaazi qitiꞌi bi qaabbechinaꞌo waan xaꞌeehe. Daawiti Katemooch beeti, bi qaabbechinaꞌo maashooch duukkehe. Bi bushoo Hiziqiyaasi bi xaaꞌooch kereeꞌi taatehe.