2 Taateenaꞌo 15 - Kafa Linguistics Project

Yihudee Taatoo Azariyaasi Mooyo

¹ Israꞌeelee taatoo Yeroboꞌami taateti hiyaa shabaattinnee natooba, Amasiyaasi bushoo Yihudee taatoo Azariyaasi taatehe.

² Azariyaasi bi taatehooba, bi eeno aaraa shiritte natone. Yerusaalem beechii aachaa gutte naton qeejjiye. Bi indee Yekoliyi getteehan; biyoo Yerusaalemi asheene.

³ Azariyaasi bi nihoo Amasiyaasi tuniitoommon, Doono Yeeri aafooch kaame mooyon tuniihe.

⁴ Tunebaani guudi toommeexi goyinnee xaaꞌeenaꞌo aalleyaaneenaꞌone. Asheenaꞌoo are xaaꞌeenaꞌoochaa andoo deejjoon giddii, ixaanoonoo shookkii beeheete.

⁵ Doono Yeeriyoo Azariyaasin qeddee shaddee biiyoona yexxiye. Ebich bi qitimmi aabooch beddaahaa, qeddee shaddee biiyechon tuneꞌi beehe. Ebina bare kexooch bi ikkeeto beehe. Ebiyooba taatoochi bushoo Yotaami taatee kexooch ukkireꞌi, showoon qeejjii beehe.

⁶ Azariyaasi shuuneti eche shuunoonaa bi tuniiti mooyo bullina Yihudee taateenaꞌo kiinee macaafooch kooreetone.

⁷ Azariyaasi qitiꞌi bi qaabbechinaꞌo waan xaꞌeehe. Daawiti Katemooch beeti, bi qaabbechinaꞌochi maashooch biin duukkiyeete. Bi bushoo Yotaami bi xaaꞌooch kereeꞌi taatehe.

Israꞌeelee Taatoo Zakaariyaasi Mooyo

⁸ Yihudee taatoo Azariyaasi taateti shaashaa shimittinnee natooba, Yeroboꞌami bushoo Zakaariyaasi Shamaaraa Israꞌeeleenaꞌo toommooch taatehe; shiritte agenoon qeejjiye.

⁹ Bi qaabbechinaꞌo tuniitoommon, Doono Yeeri aafooch gonde mooyon tuniihe. Israꞌeeleenaꞌon axaaxoo shuuniiti, Nebaaxi bushoo Yeroboꞌami shuuneti axaaxoochee wohaanoone.

¹⁰ Yabeeshi bushoo Shaluumi bi toommooch koceeꞌi, Ibilaami katemoochaa biin wuxiye; bi xaaꞌoochoo kereeꞌi taatehe.

¹¹ Zakaariyaasi shuuneti eche shuunoo Israꞌeelee taateenaꞌo kiinee macaafooch kooreetone.

¹² Doono Yeeri Yehich, “Ne yareenaꞌo awudde shiijjerooch beddaahaa, Israꞌeelee taatee qeenooch kotemminaꞌone” iꞌi bi gettito, ebina ceenniye.

Israꞌeelee Taatoo Shaluumi Mooyo

¹³ Yihudee taatoo Uziyaahi taateti shaashaa yiixiyinnee natooba, Yabeeshi bushoo Shaluumi taatehe. Shamaara beechii, agenee wottoon qeejjiye.

¹⁴ Aroochee Gadiyi bushoo Minahemi Tiritsee kechii Shamaara hammiye. Shamaaraa Yabeeshi bushoo Shaluumin wuxiye; bi xaaꞌoochoo kereeꞌi taatehe.

¹⁵ Shaluumi shuuneti eche shuunoonaa bi koceeti koceyoona Israꞌeelee taateenaꞌo kiinee macaafooch kooreetone.

¹⁶ Ebiyooba Minahemi Tiritsee kechii hammiꞌi, Tifisaahin, arooch beeto bullinaa ebi katemee guudooch beeti gafeenaꞌonon kochiye; ebiyoo katemee kelloon biich qechoo boonoshi qajjitoyichiye. Tifisaahin kochii aalliihe; yeqqefechi maachee bullinoo gohiye.

Israꞌeelee Taatoo Minahemi Mooyo

¹⁷ Yihudee taatoo Azariyaasi taateti shaashaa yiixiyinnee natooba, Gadiyi bushoo Minahemi Israꞌeeleenaꞌo toommooch taatehe. Shamaara beechii, aashire naton qeejjiye.

¹⁸ Doono Yeeri aafooch gonde mooyon tuniihe. Israꞌeeleenaꞌon axaaxoo shuuniiti, Nebaaxi bushoo Yeroboꞌami shuuneti axaaxoochee bi yemeeno bulliich wohaanoone.

¹⁹ Asooree taatoo Fuuli Israꞌeelee showoon kocha waahe. Minahemi biin gaacheree bi taatittinoon bi manjiyemmoyich, shaashaa awudde hume kiilo giraamee birewoon Fuulich immiye.

²⁰ Minahemi ebi gijjoo kechemmon bi tuniito, Israꞌeeleenaꞌo waaneeniye. Ebiyoo gaannechinaꞌo boonoshi ikkikkoona aachi aache sheqeelee birewoon boonoshi immemmoyich, tuniiꞌiniye. Ebina Asooree taatoo wottehe; are showoochoo yagaanoone.

²¹ Minahemi shuuneti eche shuunoonaa bi tuniiti mooyo bullina Israꞌeelee taateenaꞌo kiinee macaafooch kooreetone.

²² Aroochee Minahemi qitiꞌi bi qaabbechinaꞌo waan xaꞌeehe. Bi bushoo Feqaahiyi bi xaaꞌooch kereeꞌi taatehe.

Israꞌeelee Taatoo Feqaahiyi Mooyo

²³ Yihudee taatoo Azariyaasi taateti aachinnee natooba, Minahemi bushoo Feqaahiyi Israꞌeeleenaꞌo toommooch Shamaaraa taatehe; gutte naton qeejjiye.

²⁴ Doono Yeeri aafooch gonde mooyon tuniihe. Israꞌeeleenaꞌon axaaxoo shuuniiti, Nebaaxi bushoo Yeroboꞌami shuuneti axaaxoochee wohaanoone.

²⁵ Bi ginee iraashoo tuneti, Remaliyi bushoo Feqaahi Gilaadee showee aache asheenaꞌona tookkii bi toommooch koceehe; Shamaaraa taatee kexooch beeti mishigooch giyiꞌi, biin Arigobinaa Ariyaahina tookkii wuxiye; bi xaaꞌoochoo kereeꞌi taatehe.

²⁶ Feqaahiyi shuuneti eche shuunoonaa bi tuniiti mooyo bullina Israꞌeelee taateenaꞌo kiinee macaafooch kooreetone.

Israꞌeelee Taatoo Feqaahi Mooyo

²⁷ Yihudee taatoo Azariyaasi taateti aachaa guttinnee natooba, Remaliyi bushoo Feqaahi Shamaaraa Israꞌeeleenaꞌo toommooch taatehe; hiye naton qeejjiye.

²⁸ Doono Yeeri aafooch gonde mooyon tuniihe. Israꞌeeleenaꞌon axaaxoo shuuniiti, Nebaaxi bushoo Yeroboꞌami shuuneti axaaxoochee wohaanoone.

²⁹ Israꞌeelee taatoo Feqaahichi taatee yemeenooch Asooree taatoo Tigilaat Fileseeri waaꞌi, Iyooni, Abeel Beet Maꞌaki, Yanoohi, Qedeeshinaa Hatsoorina getteebeeti katemeenaꞌon, Gilaadee showoon, Galiilee showoonaa Nifitaalee showoo bullinon yechiye; asheenaꞌonoo kecciꞌi, Asooree showooch daammiye.

³⁰ Aroochee Elaahi bushoo Hosheehi Remaliyi bushoo Feqaahi toommooch koceeꞌi, biin wuxiichii, bi xaaꞌooch kereeꞌi taatehe. Ebiyoo Uziyaahi bushoo Yotaami taateti hiyinnee natoobane.

³¹ Feqaahi shuuneti eche shuunoonaa bi tuniiti mooyo bullina Israꞌeelee taateenaꞌo kiinee macaafooch kooreetone.

Yihudee Taatoo Yotaami Mooyo

³² Israꞌeelee taatoo, Remaliyi bushoo Feqaahi taateti guttinnee natooba, Yihudee taatoo, Uziyaahi bushoo Yotaami taatehe.

³³ Bi taatehooba, bi eeno hiyaa uuche natone; Yerusaalem beechii aaraa shiritte naton qeejjiye; bi indee Yeruushi getteehan; biyoo Sadooqi busheene.

³⁴ Yotaamiyoo bi nihoo Uziyaahi tuniitoommon, Doono Yeeri aafooch kaame mooyon tuniihe.

³⁵ Tunebaani guudi toommeexi goyinnee xaaꞌeenaꞌo aalleyaaneenaꞌone. Asheenaꞌoo are xaaꞌeenaꞌoochaa andoo deejjoon giddii, ixaanoonoo shookkii beeheete. Biyoo Doono Yeerichi yaafee kechi xaqqee uxeree dambee kelloon shuunehe.

³⁶ Yotaami shuuneti eche shuunoonaa bi tuniiti mooyo bullina Yihudee taateenaꞌo kiinee macaafooch kooreetone.

³⁷ Ebi yemeenooch Doono Yeeri Sooriyee taatoo Resininaa Remaliyi bushoo Feqaahinon Yihudee showoon boonoshi kochemmoyich batti batt deejjiye.

³⁸ Yotaami qitiꞌi bi qaabbechinaꞌo waan xaꞌeehe. Bi qaabbechi Daawiti Katemooch beeti, bi qaabbechinaꞌo maashooch duukkehe. Bi bushoo Akaazi bi xaaꞌooch kereeꞌi taatehe.