2 Taateenaꞌo 14 - Kafa Linguistics Project

Yihudee Taatoo Amasiyaasi Mooyo

¹ Israꞌeelee taatoo, Yoꞌakaazi bushoo Yehoꞌashi taateti guttinnee natooba, Yoꞌaashi bushoo Yihudee taatoo Amasiyaasi taatehe.

² Amasiyaasi bi taatehooba, bi eeno hiyaa uuche natone; Yerusaalem beechii hiyaa yiixiye naton qeejjiye. Bi indee Yehoꞌadiini getteehan; biyoo Yerusaalemi asheene.

³ Amasiyaasi Doono Yeeri aafooch kaame mooyon tuniihe. Tunebaani bi tuniito, bi nihoo Yoꞌaashichoommonani, bi qaabbechi Daawitichoommon toonoone.

⁴ Guudi toommeexi goyinnee xaaꞌeenaꞌo happeyaaneenaꞌone. Asheenaꞌoo guudi toommeexi goyinnee xaaꞌeenaꞌoochaa deejjoon giddiyoonaa ixaanoon shoohonon neechaaneenaꞌone.

⁵ Amasiyaasi taatittino bi kishooch manjitoyee gubb, taatoo bi nihoon wuxiti iraasheenaꞌon wuxiye.

⁶ Tunebaani Doono Yeeri Muusichi Sheeree Macaafoochaa, “Niheenaꞌo boonoshi bushiisheenaꞌo shuuneti gonde mooyoyich qitaayeete; bushiisheenaꞌoo boonoshi niheenaꞌo shuuneti gonde mooyoyich qitaayeete. Asho bi qelli qelloona bi shuuneti axaaxoyich qitibe” iꞌi bi gettitoommon, boonoshi bushiisheenaꞌon wuxaanoone.

⁷ Biyoo Kiikki bamboo gettee beetoochaa aashire hume Edoomee asheenaꞌon wuxiye. Selaahi katemoon kochii yechiꞌi, bi shigoon Yoqiteeli iꞌi shigiihe. Hanaach beddaahaa ebi shigoona ceekkee beetone.

⁸ Aroochee Amasiyaasi, “Eke wobe danebone” iꞌi koyoon tiijjoyich, Yehi bushoo Yoꞌakaazi bushoo Israꞌeelee taatoo Yehoꞌash waan wocheyechinaꞌon daachiihe.

⁹ Tunebaani Israꞌeelee taatoo Yehoꞌashi Yihudee taatoo Amasiyaasich ishichiꞌi wochiye: “ ‘Libanoosi guudinaꞌooch beeti tusho, “Ne busheen ta bushoo shaaggemmoyich imbe” iꞌi, Libanoosi guudinaꞌooch beeti yigoyich wochoon daachiihe. Aroochee Libanoosi guudinaꞌooch beeti kubbi cooxo aroona besheebee, tushoon neexxii wuxiye’ wone.

¹⁰ Edoomin kochaa ne wochitoyich ne mulloona geecito neene. Ne daneti oogo neech beddiye; ne kexooch kasheree kotebe. Neennaa Yihudee asheenaꞌona iritooch dihemmoyich ne qaawaabeeto, amoyichiye?” iye.

¹¹ Tunebaani Amasiyaasi ebin deꞌa iꞌi waayeyaanoone. Ebina Israꞌeelee taatoo Yehoꞌashi Yihudee taatoo Amasiyaasina koyeya kechiye. Boonoshiyoo Yihudee showooch beeti Beet Shemeeshi katemoochaa daneꞌi koyeheete.

¹² Israꞌeeleenaꞌo Yihudee asheenaꞌon koyaa, asho bi ikkikkoona bi kexi kexooch woccii aallehe.

¹³ Aroochee Israꞌeelee taatoo Yehoꞌashi Akaziyaasi bushoo Yoꞌaashi bushoo Yihudee taatoo Amasiyaasin Beet Shemeeshee keccii, Yerusaalem waahe. Yerusaalemi xaqqee uxeroonoo Efreemi Kelloochee tiijjii Uxeree Daneexi Kellooch beddaahaa, awudde balle hira bedoon happiye.

¹⁴ Aachoonaa birewoo bullinon, Doono Yeerichi yaafee kexonaa taatee kexonochi qiicee kexinaꞌooch beeti qiico bullinaa yechiyoo tuniyoyich bi kecciti asheenaꞌonon yechiꞌi Shamaara wottehe.

¹⁵ Yehoꞌashi shuuneti eche shuunoonaa oogeti giidecho bi tunoona, wotta Yihudee taatoo Amasiyaasina aabichiꞌi bi koyeto gaata Israꞌeelee taateenaꞌo kiinee macaafooch kooreetone.

¹⁶ Yehoꞌashi qitiꞌi bi qaabbechinaꞌo waan xaꞌeehe. Shamaara beeti Israꞌeelee taateenaꞌochi maashooch duukkehe. Bi bushoo Yeroboꞌami bi xaaꞌooch kereeꞌi taatehe.

Yihudee Taatoo Amasiyaasi Qitoo

¹⁷ Yoꞌakaazi bushoo taatoo Yehoꞌashi qititoyee gubb, Yoꞌaashi bushoo Yihudee taatoo Amasiyaasi aaraa uuche naton beehe.

¹⁸ Amasiyaasi shuuneti eche shuunoo Yihudee taateenaꞌo kiinee macaafooch kooreetone.

¹⁹ Asheenaꞌo biin wuxoyich Yerusaalemaa koceeheete. Aroochee Amasiyaasi Lakish muriccii hammiye. Tunebaani boonoshi bi hillooch ashoon daachiiꞌi, aroochaa biin wuxiiheete.

²⁰ Bi dubenoon haresheenaꞌona Yerusaalem deebiyeete. Yerusaalem, Daawiti Katemooch beeti bi qaabbechinaꞌo maashooch duukkehe.

²¹ Yihudee asheenaꞌo bulli bi eeno aaraa shiritte nato tuneti Azariyaasin daammiꞌi, bi nihoo Amasiyaasi keroon taatiiheete.

²² Taatoo qitiꞌi, bi qaabbechinaꞌo waan bi xaꞌeetoyee gubb, Azariyaasi Elaati katemoon kochii yechii, wochinnoon shuuneꞌi, Yihudee showooch wochiye.

Israꞌeelee Taatoo Digeni Yeroboꞌami Mooyo

²³ Yoꞌaashi bushoo Yihudee taatoo Amasiyaasi taateti aaraa uuchinnee natooba, Yehoꞌashi bushoo Israꞌeelee taatoo Yeroboꞌami Shamaaraa taatehe; aabbaa ikke naton qeejjiye.

²⁴ Biyoo Doono Yeeri aafooch gonde mooyon tuniihe. Israꞌeeleenaꞌon axaaxoo shuuniiti, Nebaaxi bushoo Yeroboꞌami shuuneti axaaxoochee wohaanoone.

²⁵ Israꞌeelee Nuggishoo Doono Yeeri Amitaayi bushoo, Gaat Hefeeri katemee asho, keemechi Yoonaasina bi gettitoommon, Hamaati katemooch beshe kaattoochee Kiikki baharooch beddaahaa beeti Israꞌeelee showoon wochiihe.

²⁶ Guuno tuneba doono, Israꞌeelee showooch beeto bulli oogichii bi caammeyoon Doono Yeeri beeggiye. Boonoshinoo gaachemmo aalloone.

²⁷ Tunebaani Doono Yeeri, Israꞌeeleenaꞌochi shigoon showee toommoochee aalliyemmo bi tunoon getaanoone. Ebich Yehoꞌashi bushoo Yeroboꞌamichi kishoona boonoshin wodiihe.

²⁸ Yeroboꞌami shuuneti eche shuunoo, bi tuniiti mooyo bullinaa oogeti giidecho bi tunoona, aabichii bi koyeto gaata, wotta Yihudee showooch wotteti Damaasiqinaa Hamaatinon aabichiꞌi Israꞌeelee showooch bi wochito gaata Israꞌeelee taateenaꞌo kiinee macaafooch kooreetone.

²⁹ Yeroboꞌami qitiꞌi bi qaabbechi Israꞌeelee taateenaꞌo waan xaꞌeehe. Bi bushoo Zakaariyaasi bi xaaꞌooch kereeꞌi taatehe.