2 Taateenaꞌo 13 - Kafa Linguistics Project

Israꞌeelee Taatoo Yoꞌakaazi Mooyo

¹ Akaziyaasi bushoo Yihudee taatoo Yoꞌaashi taateti hiyaa keejjinnee natooba, Yehi bushoo Yoꞌakaazi Shamaaraa Israꞌeeleenaꞌo toommooch taatehe; aaraa shabaatte naton qeejjiye.

² Biyoo Israꞌeeleenaꞌon axaaxoo shuuniiti, Nebaaxi bushoo Yeroboꞌami shuuneti axaaxoon dabboona Doono Yeeri aafooch gondoon shuunehe; ebi axaaxoochee wohaanoone.

³ Doono Yeeri kaaro Israꞌeeleenaꞌo toommooch cufiye; ebich Sooriyee taatoo Hazaheelinaa bi bushoo Been Hadaadinochi kishooch meeti yemeenoon boonoshin beshiiꞌi immiye.

⁴ Ebich Yoꞌakaazi Doono Yeerin qollehe. Doono Yeeriyoo Sooriyee taatoo Israꞌeeleenaꞌon neexxii hajjoon bi beeggitoyich, bi qolloon waayehe.

⁵ Israꞌeeleenaꞌon wodiyemmi ashoon boonoshich immiye. Ebina boonoshiyoo Sooriyeenaꞌo kishoochee wodiyeete. Israꞌeeleenaꞌoo aafichoommon diggoona boonoshi kexi kexooch koteheete.

⁶ Tunebaani Israꞌeeleenaꞌon axaaxoo shuuniiti, Yeroboꞌami shuuneti axaaxoon dabbiyeetani, aroochee wohaaneenaꞌone. Wotta nuggishee Asheeri misiloo bi neexeti Shamaara beehe.

⁷ Sooriyee taatoo boonoshin yiikkee aalliiꞌi, maayi buchi xaaꞌeexi quttoommon bi tuniitoyich, Yoꞌakaazich aache hareshechinaꞌo, aashire gaarinaa aashire hume baatechinaꞌonoyee besh echeti ginee naayo aalloone.

⁸ Yoꞌakaazi shuuneti eche shuunoo, bi tuniiti mooyonaa oogeti giidecho bi tunoona Israꞌeelee taateenaꞌo kiinee macaafooch kooreetone.

⁹ Yoꞌakaaziyoo qitiꞌi bi qaabbechinaꞌo waan xaꞌeehe. Boonoshiyoo Shamaara biin duukkiyeete. Bi bushoo Yehoꞌashi bi xaaꞌooch kereeꞌi taatehe.

Israꞌeelee Taatoo Yehoꞌashi Mooyo

¹⁰ Yihudee taatoo Yoꞌaashi taateti shaashaa shabaattinnee natooba, Yoꞌakaazi bushoo Yehoꞌashi Shamaaraa Israꞌeeleenaꞌo toommooch taatehe; aaraa shiritte naton qeejjiye.

¹¹ Aroo wotta Doono Yeeri aafooch gonde mooyon tuniihe. Israꞌeeleenaꞌon axaaxoo shuuniiti, Nebaaxi bushoo Yeroboꞌami shuuneti axaaxoo bullin dabbiyalli, ebin tuniyoochee wohaanoone.

¹² Yehoꞌashi shuuneti eche shuunoo, bi tuniiti mooyo bullinaa oogeti giidoona Yihudee taatoo Amasiyaasina bi koyeti koyoona Israꞌeelee taateenaꞌo kiinee macaafooch kooreetone.

¹³ Yehoꞌashiyoo qitiꞌi bi qaabbechinaꞌo waan xaꞌeehe. Yeroboꞌami bi xaaꞌooch kereeꞌi, bi taatee qeenooch kotehe. Yehoꞌashi Shamaara beeti, Israꞌeelee taateenaꞌochi maashooch duukkehe.

Elisayi Qitoo

¹⁴ Elisayi biin qitooch bechiti biiyoon biiyeꞌi bi beetaa, Israꞌeelee taatoo Yehoꞌashi bi waan desh waahe. Yehoꞌashiyoo bi aafoochaa eeppiibee, “Ye ta aabbo! Ye ta aabbo! Ye Israꞌeeleenaꞌochi gaarinaꞌonaa hareshechinaꞌonote!” iye.

¹⁵ Aroochee Elisayi biich, “Maꞌoonaa shangeenaꞌonon yeshe” iye. Ebich biyoo maꞌoonaa shangeenaꞌonon yechiye.

¹⁶ Elisayi Israꞌeelee taatoyich, “Maꞌoon shaachibe” iye. Biyoo shaachiye. Elisayi bi kishoon taatoo kishee toommooch kotiihe.

¹⁷ Aroochee Elisayi, “Aabi-keyo waanee mallee kelloon qechibe” iye. Biyoo qechiye. Elisayi, “Shangoon xuuphiibe” iye. Biyoo shangoon xuuphiihe. Aroochee Elisayi, “Doono Yeerichi wudee shangoone; Sooriyeenaꞌo toommooch wudee danee shangoone. Boonoshin ne ciichimmi wottoon, Sooriyeenaꞌon Afeeqi katemoochaa kochemmo neene” iye.

¹⁸ Ebiyee gubb Elisayi, “Shangeenaꞌon yeshe” iye. Israꞌeelee taatoo Yehoꞌashiyoo shangeenaꞌon yechiye. Elisayi “Ebi shangeenaꞌona showoon yexe” iye. Biyoo keejje wottoon showoon yexxiichii, neechiye.

¹⁹ Aroochee Yeer asho biin kaareꞌi, “Uuche woyee shiritte wottoon ne yexxeto gaata, Sooriyeenaꞌon yexi ciroona aalliyesho neene. Tunebaani and keejje wottoon baach boonoshin yexxemmo neene” iye.

²⁰ Elisayi qitiꞌi duukkehe. Aroochee Moꞌabee ginee naayinaꞌo nati natooch naawooba, boonoshin kocha Israꞌeelee showooch waa beeheete.

²¹ Ikke areddoon asheenaꞌo ikke uroon duukkiibee, Moꞌabee ginee naayinaꞌon beeggiyeete. Ebich dubenoon Elisayi duukketi oppooch duppiichii wocciyeete. Ebi dubeno Elisayichi shaawushoona qiceeꞌi, bekkech uro wodii bi baatoona neexehe.

Israꞌeeleenaꞌonaa Sooriyeenaꞌonochi Daggooch Koyeeti Koyo

²² Sooriyee taatoo Hazaheeli Yoꞌakaazi taatee yemeeno bulliich Israꞌeeleenaꞌon xuuxiihe.

²³ Tunebaani Doono Yeeri gaawe aafoona boonoshin ciinniye; boonoshichoo ariqqehe; Abrahamina, Yisaaqinaa Yaaqobina tookkii bi giyiti wogoyicha iꞌi boonoshich deehe; boonoshin aalliyoon qaawaanoone; and beddaahaa bi aafoochee boonoshin yoohaanoone.

²⁴ Sooriyee taatoo Hazaheeli qitiye. Bi bushoo Been Hadaadi bi xaaꞌooch kereeꞌi taatehe.

²⁵ Aroochee Yoꞌakaazi bushoo Yehoꞌashi bi nihoo Yoꞌakaaz waanee Hazaheeli koyeꞌi deqqiti katemeenaꞌon Hazaheeli bushoo Been Hadaad waanee wochinnoon kochii yechiye. Yehoꞌashi keejje wottoon biin kochiꞌi Israꞌeelee katemeenaꞌon wochiye.