2 Taateenaꞌo 12 - Kafa Linguistics Project

Yoꞌaashi Yaafee Kexon Andiriyoo

¹ Yehi taateti shabaattinnee natooba, Yoꞌaashi taatehe; Yerusaalem beechii aabbe naton qeejjiye. Bi indee Tsibiyi getteehan; biyoo Beershaabi katemee asheene.

² Qeeshoo Yoyaadi biin dojjitoyich, bi yemeeno bulliich, Yoꞌaashi Doono Yeeri aafooch kaame mooyon tunii beehe.

³ Tunebaani guudi toommeexi goyinnee xaaꞌeenaꞌo aalleyaaneenaꞌone. Asheenaꞌo kuxaanoon ebi xaaꞌeenaꞌoochaa deejjoon giddii, ixaanoonoo shookkii beeheete.

⁴ Yoꞌaashi qeesheenaꞌoyich, “Doono Yeerichi yaafee kexooch waati, yaafeeti gijjoo bullin, kashee keroon waabeeti gijjoonaa boonoshi mullee daaggoona Doono Yeerichi kexooch boonoshi deebiibeeti gijjoo bullinon,

⁵ qeesheenaꞌo boonoshi ikkikkoona boonoshi maddeebeeti asheenaꞌo waanee deꞌeete; yaafee kechi tiishoon qaaweetoommona wochinnoon shuunebeete” iye.

⁶ Tunebaani qeesheenaꞌo Yoꞌaashi taateti hiyaa keejjinnee natooch beddaahaa, yaafee kechi tiishoon wochinnoon shuuneyaaneenaꞌone.

⁷ Ebich Yoꞌaashi qeeshoo Yoyaadinaa bare qeesheenaꞌonon ceeggiꞌi, “Yaafee kechi tiishoon wochinnoon shuuno ittoshi qajjito, amoyichiye?” iꞌi echehe. Daakkiꞌinoo, “Illa yaafee kechi tiishoon shuuniyoyich beshii imbotani, ebiyee bekk ittoshi qellich, asheenaꞌo waanee gijjoon deqqaahote” iye.

⁸ Qeesheenaꞌoo, asheenaꞌo waanee gijjoon illa deꞌaachemminaꞌo boonoshi tunoonaa yaafee kechi tiishoon boonoshi qelloona shuuneyaachemminaꞌo boonoshi tunoonon gettiyeete.

⁹ Aroochee qeeshoo Yoyaadi ikke ooge saaxenoon deebiꞌi, bi qeroon hottiye. Doono Yeerichi yaafee kexooch giyee beetooch qanne baddaa deejjee gudee gaꞌooch kotiihe. Gaaddaafoon quyeebeeti, qeesheenaꞌo Doono Yeerichi yaafee kexooch waabeeti gijjoo bullin saaxenooch giijjii beeheete.

¹⁰ Saaxenoochoo wodde gijjoo beemon boonoshi beegiyooba, taatoochi koorechonaa qeeshee guudoona waaꞌi, Doono Yeerichi yaafee kexooch giyiti gijjoon haddiꞌi, mollexxooch geddii cuchii beeheete.

¹¹ Aroochee gijjee haddoo machoona qocaa bi arichetoyee gubb, Doono Yeerichi yaafee kexon boonoshi shuuniyemmoyich ukkireti asheenaꞌo kishooch immiyeete. Boonoshiyoo Doono Yeerichi yaafee kexon shuuneebeeti, gimbeyneenaꞌonaa anaaxeenaꞌonoyich,

¹² xaqqee xarechinaꞌonaa xaqqee qiicechinaꞌonoyich qoccii beeheete; ebiyoommon wotta Doono Yeerichi yaafee kexo wochinnoon shuuneyemmi booree xareeti mixon, xareeti xaqqoonaa kechi shuunoyich qaawiibeeti, baribare mooyonoyich qoccii beeheete.

¹³ Tunebaani yaafee kexooch giyiti gijjoo Doono Yeerichi kechi maddooch tunemmi birewee quppe saaneenaꞌo, qafeteenaꞌo, quppe shaateenaꞌo, tireenaꞌo woyee bare aachee qiico tuneba birewee qiico shuuneyemmoyich, heeyaanoone.

¹⁴ Tunebaani bi qocceto, Doono Yeerichi yaafee kexon wochinnoon shuunee beetinaꞌoyich baachiye.

¹⁵ Gibeneeto tuneꞌi boonoshi shuunee beetoyich, shuunechinaꞌoyich qocoyich gijjoon deqqiibeeti asheenaꞌon gijjoon amooch boonoshi heechito gaata echeyaaneenaꞌone.

¹⁶ Xuꞌee deejjoonaa axaaxee deejjoonoyich waabeeti gijjoo qeesheenaꞌocho bi tunetoyich, Doono Yeerichi yaafee kexooch giyaanoone.

¹⁷ Ebiyooba Sooriyee taatoo Hazaheeli damba kechii hammiꞌi, Gaatin kochii yechiye. Yerusaaleminoo keyi kocha aroo waan wottehe.

¹⁸ Yihudee taatoo Yoꞌaashi biyee aafi taateenaꞌo, ebi geto, Yoshafaaxi, Yehoraaminaa Akaziyaasina Doono Yeerich kichii boonoshi kotiiti, yaafeeti wojjoonaa bi wojjiti wojjoonon, yaafee kechi ginjabeetoonaa taatee kechi ginjabeetoonooch beeti aachoo bullinoo kicii, wojjoo tuniiꞌi, taatoo Hazaheelich daachiihe. Hazaheeliyoo ebin deqqiꞌi, bi ginee naayinaꞌon Yerusaalemee wochiye.

¹⁹ Yoꞌaashi shuuneti eche shuunoonaa bi tuniiti mooyo bullina Yihudee taateenaꞌo kiinee macaafooch kooreetone.

²⁰ Bi ukkiriiti ukkireenaꞌo tiyiꞌi bi toommooch koceeheete; Siila daammiibeeti gommooch beeti Miiloo getteebeeti xaaꞌooch beeti kexoochaa biin wuxiyeete.

²¹ Biin wuxitinaꞌo bi ukkiriiti ukkireenaꞌo, eboshiyoo Shimaati bushoo Yozakaarinaa Shomeeri bushoo Yehozabaadinane. Yoꞌaashi qitiꞌi, Daawiti Katemooch bi qaabbechinaꞌo maashooch duukkehe. Bi bushoo Amasiyaasi bi xaaꞌooch kereeꞌi taatehe.