2 Taateenaꞌo 11 - Kafa Linguistics Project

Ataaliyinaa Yoꞌaashinochi Mooyo

¹ Akaziyaasi indee Ataaliyi bi bushoo qitoon ariyaꞌa, tiyaa taatee yaroo bullin aalliihan.

² Tunebaani taatoo Yehoraami bushee, Akaziyaasi manee Yehoshaabi, wuxeyemmi taatoochi bushiisheenaꞌo daggoochee Akaziyaasi bushoo Yoꞌaashin gaajjaꞌa daammahan; biinnaa bi dichindeenon yaafee kechi gatooch aachiyan. Ebiyoommi gommona bushoo Ataaliyi kishoochee wodiye.

³ Ataaliyi showoon qeejjaa bi beehooba, Yoꞌaashi Doono Yeerichi yaafee kexooch aasheꞌi Yehoshaabina tookkii shiritte naton kotehe.

⁴ Tunebaani shabaattinnee natooba, Yoyaadi Kaareenaꞌonaa kellechinaꞌonochi ballee iraasheenaꞌon wochiiꞌi, bi beeti Doono Yeerichi yaafee kexooch boonoshi woyemmoyich tuniihe. Boonoshina tookkii wogoon giyiꞌi, Doono Yeerichi yaafee kexoochaa boonoshin wogiihe. Aroochee taatoochi bushoon boonoshich bekkiihe.

⁵ Boonoshichoo ishichiꞌi gettiye; “Ittoshi tuniyemmo ebiniye: Shambetooba kelloon quyeebeeti ittoshiichee, keejje beereexi ikkoo taatee kexon quyebe;

⁶ ikke beeroo Suuri kelloon quyebe; echeti ikke beeroo kellechinaꞌoyee gubb beeti kelloon quyebe.

⁷ Wotta shambetooba kasheebeeti gutte beeroo taatoochi guudoona tuneree, Doono Yeerichi yaafee kexon quyebe.

⁸ Ittoshi ginee qiicoon ittoshi kishooch yeshiree, taatoochi guudooch neexebote; ittoshi waan katinnimmo koniyoona qitibe. Taatoo kechii beegaatinaa giyii beegaatina, biinna tookki tunebote” iye.

⁹ Ballee iraasheenaꞌoo qeeshoo Yoyaadi gettito bullin tuniiheete. Boonoshi ikkikkoona shambetee aaboon kellee quyooch giyii beetinaꞌonaa kellee quyoochee kechii beetinaꞌona tuneti boonoshi ginee naayinaꞌon yechiꞌi, qeeshoo Yoyaad waan waaheete.

¹⁰ Qeeshoo Doono Yeerichi yaafee kexooch beeti Daawitichi gineenaꞌonaa gaacheenaꞌonon ballee iraasheenaꞌoyich immiye.

¹¹ Ginee naayinaꞌoo taatoon quyoyich, boonoshi ikkikkoona ginee qiicoon yechiꞌi, yaafee kexoochaa deshi-waaninaa dambi-waaninooch beddaahaa, deejjee gudoonaa yaafee kexonochi guudooch neexeheete.

¹² Aroochee Yoyaadi taatoochi bushoon kichiꞌi, gubbichoon ukiihe; wogee macaafoonoo biich immiye; taatoo bi tunoon awaajjiyeete; biinoo huuttiꞌi taatiiheete. Boonoshiyoo koppeebee, “Taatoo hume naton taatebe” ii cookiyeete.

¹³ Ataaliyiyoo ebi kellechinaꞌonaa asheenaꞌonochi cookoon waayaꞌa, asheenaꞌo beetooch, Doono Yeerichi yaafee kexooch hammahan.

¹⁴ Biyoo doyeetoommon taatoo giimbee gaꞌooch neexeꞌi beemon, bi gaꞌoochoo iraasheenaꞌonaa tiree huggechinaꞌona neexeꞌi beemon beeggahan; asheenaꞌo bulliyoo emirii, tiroonoo huggii beeheete. Ataaliyi bi tahoon keexxaꞌa, “Hukkoone, hukkoone!” iyaꞌa cookiyan.

¹⁵ Qeeshoo Yoyaadi Ataaliyi Doono Yeerichi yaafee kexoochaa bi qitemmoyich qaawaano bi tunetoyich, ginee naayinaꞌo toommooch iraasheti ballee iraasheenaꞌoyich ishichiye: “Ginee naayinaꞌochi gutte daggoona biin kichi deebote. Biin dabbimmo koninolla goraadoona wuxibote” iye.

¹⁶ Ebich biin yechii daammiꞌi, taatee kexooch daammiibeeti Hareshee kelloochaa wuxiyeete.

Yoyaadi Mooyon Gaawichoo

¹⁷ Aroochee Yoyaadi, taatoonaa asheenaꞌona Doono Yeerichi asheenaꞌo boonoshi tunee wogoon boonoshi giyemmon tuniihe. Ebiyoommon wotta taatoonaa asheenaꞌonoo wogoon giyemmoyich tuniihe.

¹⁸ Aroochee asheenaꞌo bulli Baꞌaalee yaafee kexooch hammiꞌi, Baꞌaalee kexon happiyeete. Bi deejjee gudeenaꞌonaa shahalleenaꞌonon tiichii aalliiheete. Baꞌaalee qeeshoo Mataaninoo deejjee gudee aafoochaa wuxiyeete. Qeeshoo Yoyaadi Doono Yeerichi yaafee kexooch quyechinaꞌon ukkiriihe.

¹⁹ Biyoo ballee iraasheenaꞌon, Kaareenaꞌon, kellechinaꞌonaa asheenaꞌo bullinon kiciye. Boonoshiyoo taatoon Doono Yeerichi yaafee kexoochee deennii dugilla daammii, kellechinaꞌochi uxeree kelloona beshiiꞌi, taatee kexooch shakkiiheete. Aroochee taatoo bi taatee qeenooch kotehe.

²⁰ Ebich asheenaꞌo bulli emiriyeete. Ataaliyi taatee kexoochaa goraadoona bi qititoyee gubb, katemoo shashewimiye.

²¹ Yoꞌaashi bi taatehooba, bi eeno shabaatte natone.