2 Taateenaꞌo 10 - Kafa Linguistics Project

Akaabi Shiijjereenaꞌo Qitoo

¹ Akaabich Shamaara shabe bushiisheenaꞌo beetinaꞌone. Ebich Yehi Yezireeli katemee ukkireenaꞌoyich, geeneenaꞌonaa Akaabi bushiisheenaꞌon dichechinaꞌonoyich Shamaara koorichoon kooriꞌi daachiihe. Bi daachiiti koorichoo ishichii beetone:

² “Ittoshi doonochi bushiisheenaꞌo, wotta bi gaarinaꞌo, haresheenaꞌo, xaqqee uxerechi katemeenaꞌonaa ginee qiiceenaꞌona ittoshi waan boonoshi beetoyich, ebi koorichoo ittoshi waan shaggimmona, bekkech

³ ittoshi doonochi bushiisheenaꞌoochee gaawetonaa beshoonon kaaciree, bi nihoo taatee qeenooch kotiibote; ittoshi taatoochi kechi asheenaꞌoyichoo koyebote” iye.

⁴ Tunebaani boonoshi oogichiꞌi shattiyeete; ishichiinoo iyeete: “Gutte taateenaꞌolla bi aafooch neexoon hakkaaneenaꞌone. Nowochi, aabichireeshiye bi aafooch no neexemmo?” iyeete.

⁵ Ebich taatee kechi ukkiroo, katemee iraashoo, geeneenaꞌonaa bushiishoon dichechinaꞌona, “No, ne guuno noone. Nooch ne gettemmo amoonolla tuniyemmo noone. No koninolla taatiyaachemmo noone. Ne shunemmon ne tuniibe” iꞌi Yehich wochoon daachiiheete.

⁶ Aroochee Yehi wochinnoon koorichoon kooriꞌi boonoshich daachiihe; ishichiinoo iye: “Ta xiboo ittoshi tunegaata, taach deꞌa ittoshi getigaata, ittoshi taatoochi bushiisheenaꞌo qettoon kuxiree, boonoshi qelloon yaach ebi gaata taach yeshi, Yezireel wobote” iye. Ebiyooba taatoochi shabe bushiisheenaꞌo dichechinaꞌo tuneti, eboshiyoo katemee ogooge geeneenaꞌo waan beetinaꞌone.

⁷ Koorichoo boonoshich shagaa, taatoochi bushiisheenaꞌo tuneti shabeenaꞌon yechii wuxiyeete. Eboshichi qelloon mokkooch geddiꞌi, Yezireel, Yehi waan daachiiheete.

⁸ Wocheyecho waaꞌi, “Taatoochi bushiisheenaꞌo qelloon yechii waatinaꞌone” iꞌi gettiye. Aroochee Yehi, “Katemee gimi kellooch gutte beera gutiree yaach beddaahaa kotiibote” iye.

⁹ Haree yaaꞌooch Yehi hammiꞌi asheenaꞌo bulli aafooch neexeechii, ishichiye: “Ittoshi xalloo ittoshine. Ta doono toommooch gondoon shuunoyich koceyaꞌa, biin wuxito, taane. Tunebaani hinoshi bullin wuxito, konine?

¹⁰ Illa and Doono Yeeri Akaabichi shiijjereenaꞌo toommooch bi gettiti qaaroochee ikke qaareyona showooch hollaachemmi bi tunoon ariibote. Doono Yeeri bi guuno Eliyaasina bi gettiton ceechitone” iye.

¹¹ Ebich Yehi Yezireel beeti, Akaabi kechi asheenaꞌoochee echeto bullin, ukkiroo tuneti ogooge asheenaꞌo bullin, bi xibeenaꞌo bullinaa bi qeesheenaꞌo bullinoochee ikkoonolla echiyaanoon wuxiye.

Taatoo Akaziyaasi Xibeenaꞌo Qitoo

¹² Aroochee tiyiꞌi, Yehi Shamaara hammiye. Hammiibee, qiddeenaꞌochi gafoo tuneti Beet Ekeed shaggiye.

¹³ Yihudee taatoo Akaziyaasi xibeenaꞌona daneꞌi, “Ittoshi koni ittoshine?” iꞌi echehe. Boonoshiyoo, “Taatoo Akaziyaasi xiboo noone. Taatoo bushiisheenaꞌonaa gennee abeeti Elizabeelinochi bushiisheenaꞌonon diggiyoyich, hammaabeeto noone” iꞌi wochiyeete.

¹⁴ Yehiyoo bi asheenaꞌoyich, “Kashoona boonoshi beetaa yeshote” iye. Ebich boonoshin daammiꞌi, Beet Ekeedi oppee gaꞌoochaa aabbaa gutte asheenaꞌon wuxiyeete. Boonoshi daggoochee ikkolla echemmoyich tuniyaanoone.

Akaabi Xibeenaꞌoochee Echeto Bulli Qitoo

¹⁵ Aroochee tiyii bi hammaahaa, Rekaabi bushoo Yonadaabi biinna daneya waa bi beetaa, gommoochaa danehe. Yehiyoo biin diggiichii, “Ta mullo neech kaamoo bi tunoommon ne mullo taach kaamoone?” iꞌi echehe. Yonadaabiyoo, “Eeha, kaamoone” iye. Yehiyoo, “Ebi tunegaata, ne kishoon taach imbe” iye. Bi kishoon biich immiye. Aroochee Yehi gaariich kichii kotiichii,

¹⁶ “Taanna tookki waaree, Doono Yeerich qanaateto ta tunoon beege” iye. Ebina gaarin bi gashetaa, Shamaara hammiyeete.

¹⁷ Shamaara shaggiꞌi, arooch beeti, Akaabichi xibeenaꞌoochee echeto bullin wuxiye. Doono Yeeri Eliyaasich gettiti qaaroommon ikkoonolla echiyaanoone.

Baꞌaalee Maddechinaꞌo Qitoo

¹⁸ Aroochee Yehi asheenaꞌo bullin kiciꞌi, boonoshich ishichiye: “Akaabi Baꞌaaloyich bi maddeto, giishechooniye; tunebaani ta beshoon maddemmo taane.

¹⁹ And ebich Baꞌaalee keemechinaꞌo bullin, biich goyinnee beetinaꞌo bullinaa bi qeesheenaꞌonon ceegiree, ikkooch ta waan kicibote; koniyoona echaaye. Baꞌaaloyich ooge deejjoon giddiyemmo taane. Koniyoona bi echegaata, kashoona beetaachemmone” iye. Tunebaani Yehi ebin bi tuniito, Baꞌaalee maddechinaꞌon acona aalliyoyichiye.

²⁰ Aroochee Yehi, “Baꞌaaloon oogiyoyich yaafeeti kiceyee aaboon awaajjibote” iꞌi gettiye. Boonoshiyoo awaajjiyeete.

²¹ Yehiyoo Israꞌeelee showoo bulliich wochoon daachiihe. Baꞌaaloyich goyinnee beetinaꞌo bulli waaheete. Waataanoon echeto ikkolla aalloone. Bulliyona Baꞌaalee yaafee kexooch giyiyeete. Ebi kexoo hachi gocoochee okki gocooch beddaahaa ceenniye.

²² Aroochee Yehi yaafeeti tahee ukkiroyich, “Baꞌaaloyich goyinnee beetinaꞌo bullich tahoon kichi deebe” iye. Ebich kichiꞌi boonoshich deebiye.

²³ Aroochee Yehi Rekaabi bushoo Yonadaabina tookkii Baꞌaalee yaafee kexooch giyiye. Baꞌaalee goyinnechinaꞌoyich, “Baꞌaaloyich goyinnee beetinaꞌo baachalli, Doono Yeerich goyinnee beetinaꞌo ittoshina tookkii aallo boonoshi tunoon xiishibote” iye.

²⁴ Aroochee micciibeeti deejjoonaa bare deejjoonon giddiyoyich giyiyeete. Aroyee aaf Yehi kechi guudoona shinne ginee naayinaꞌon neechiichii, “Ittoshi kishooch beshiyaꞌa ta immeti ashoochee ikkolla muriccemmoyich tuniiti asho bi beegaata, bi kasho are ashoochi kashee keroon tunemmone” itone.

²⁵ Yehi deejjoon giddii ciichiichii, bekkech kellechinaꞌonaa ginee iraasheenaꞌonoyich, “Giyiree boonoshin wuxibote; ikke asholla muriccaaye” iye. Ebich boonoshiyoo goraadoona wuxiyeete. Aroochee kellechinaꞌonaa ginee iraasheenaꞌona ebi dubenoon maach kichii duppiyeete. Aroocheenoo Baꞌaalee yaafee kechi maaci gatooch giyiyeete.

²⁶ Goyinnee xaqqee giimboon aroochee kichiꞌi michiyeete.

²⁷ Aroochee Baꞌaalee xaqqee giimboon qicciyeete; Baꞌaalee yaafee kexon happiyeete. Ebinoo hanaach beddaahaa qashee kexo tuniiheete.

²⁸ Ebiyoommon Yehi Baꞌaaloon Israꞌeelee showoochee aalliihe.

²⁹ Tunebaani Israꞌeeleenaꞌon axaaxoo shuuniiti, Nebaaxi bushoo Yeroboꞌami shuuneti axaaxoochee, ebiyoo Beeteelinaa Daaninooch beeti, aachoochee bi shuuniiti maanji misiloyich goyinnoochee, wohaanoone.

³⁰ Doono Yeeriyoo Yehich, “Ta aafooch kaame mooyon ne tuniitoyich, ta mulleexo bulliyoommon Akaabi kechi asheenaꞌo toommooch ne tuniitoyich, ne shiijjeroo awudde shiijjerooch beddaahaa, Israꞌeelee taatee qeenooch kotemmone” iye.

³¹ Tunebaani Yehi Israꞌeelee Nuggishoo Doono Yeerichi sheeroon bi ceeni mulloona aaxxiiꞌi quyeyaanoone; Israꞌeeleenaꞌon axaaxoo shuuniiti, Yeroboꞌamichi axaaxoocheenoo wohaanoone.

Yehi Qitoo

³² Ebiyoobee yemeenooch Doono Yeeri Israꞌeelee showoo xebbemmon tunii beehe. Hazaheeliyoo Israꞌeelee showoo bullin kochii yechiye.

³³ Yoordaanoosi aacochaa aabi-keyo waan beeti Gilaadee showoo bullin Arinooni bambee gaꞌooch beeti Aroꞌeeri katemoochee tiijjiꞌi, Gaadichi showoon, Roobeelichi showoonaa Minaasichi showoonon bulla kochii yechiye. Ebiyoo Gilaadee showoonaa Bashaanee showoonane.

³⁴ Yehi shuuneti eche shuunoo, bi tuniiti mooyo bullinaa oogeti giidecho bi tunoona Israꞌeelee taatee kiinee macaafooch kooreetone.

³⁵ Yehi qitiꞌi bi qaabbechinaꞌo waan xaꞌeehe. Biyoo Shamaara duukkehe. Bi bushoo Yoꞌakaazi bi xaaꞌooch kereeꞌi taatehe.

³⁶ Yehi Shamaara beechii, Israꞌeeleenaꞌo toommooch hiyaa shimitte naton taatehe.