2 Taateenaꞌo 1 - Kafa Linguistics Project

Akaziyaasi Toommooch Doono Yeeri Nalloo

¹ Akaabi qititoyee gubb, Moꞌabee asheenaꞌo Israꞌeeleenaꞌo toommooch hukkoon tiijjiyeete.

² Akaziyaasi Shamaara beeti kechi toommeexi, bi taatee kexooch beechii, mallee kelloochee holliꞌi biiyehe. Ebich, “Hini biiyoochee wodemmo ta tunoon Eqirooni katemee nuggishoo Baꞌaal Zebuubin echii waayebote” iꞌi wocheyechinaꞌon daachiihe.

³ Tunebaani Doono Yeerichi maraakoo Tishibee asho Eliyaasich: “Tibe! Damba hami Shamaari taatoochi wocheyechinaꞌona daneree, boonoshich, ‘Eqirooni katemee nuggishoo Baꞌaal Zebuubin echii waayoyich ittoshi hammiibeeto, Israꞌeelee showee daggooch Nuggishoo aalletenane?

⁴ Ebich Doono Yeeri ishichiye: “Ne qeyeti qeenoochee tiyaachemmo neene. Iberoochaa qitemmo neene” itone’ gete” iye. Ebina Eliyaasi hammii gettiye.

⁵ Wocheyechinaꞌo taatoo waan wotteheete. Biyoo boonoshin, “Amoyich wottehote?” iꞌi echehe.

⁶ Boonoshiyoo biich, “Ikke uro noonna daneya waaꞌi, ‘Hambote; ittoshin wocheti taatoo waan wotteree, Doono Yeeri ishichiye: “Eqirooni katemee nuggishoo Baꞌaal Zebuubin echii waayoyich wocheyechinaꞌon ne daachiito, Israꞌeelee showee daggooch Nuggishoo aalletenane? Ebich ne qeyeti qeenoochee tiyaachemmo neene. Iberoochaa qitemmo neene” itone getote’ iye” iyeete.

⁷ Biyoo boonoshich, “Ittoshina daneꞌi, ebi qaaroon ittoshich gettiti uroochi malleto, amoommone?” iꞌi echehe.

⁸ Boonoshiyoo, “Huushechi tahoon taheti uroone. Bi shimetoochoo shachoon cuyetone” iyeete. Aroochee taatoo, “Ebi aroo Tishibee asho Eliyaasine” iye.

⁹ Aroochee taatoo aache ginee iraashoon aache bi ginee naayinaꞌona tookkii Eliyaas waan daachiihe. Aache ginee iraashoo Eliyaasi koteꞌi beeti geppee toommooch kechiꞌi biich, “Yeer ashoocho, neen taatoo, ‘Waa kindibe’ itone” iye.

¹⁰ Tunebaani Eliyaasi aache ginee iraashoyich wochiꞌi, “Yeer asho ta tunegaata, qaaqqoo shimaayoochee kindibe. Neennaa aache ne asheenaꞌonon mame” iye. Areegaata, qaaqqoo shimaayoochee kindiꞌi, biinnaa aache bi asheenaꞌonon maahe.

¹¹ Taatoo wochinnoon bi waan bare aache ginee iraashoon aache bi ginee naayinaꞌona tookkii daachiihe. Ebi aache ginee iraashoo hammiꞌi Eliyaasich, “Yeer ashoocho, neen taatoo ‘Kaateree waa kindibe’ itone” iye.

¹² Tunebaani Eliyaasi wochiꞌi, “Yeer asho ta tunegaata, qaaqqoo shimaayoochee kindiree, neennaa aache ne asheenaꞌonon mame” iye. Areegaata, Yeerichi qaaqqoo shimaayoochee kindiꞌi, biinnaa aache bi asheenaꞌonon maahe.

¹³ Taatoo wochinnoon bi waan keejjinnoochaa aache ginee iraashoon aache bi ginee naayinaꞌona tookkii daachiihe. Keejjinneexi aache ginee iraashoo damba hammiꞌi, Eliyaasi aafooch bi gutenoona dihiichii, “Yeer ashoocho, ta kasheenaa hini aache ne guuninaꞌochi kasheena ne aafoochaa gidoon bi danemmoyich neen qollehoye.

¹⁴ Ebiyoche, qaaqqoo shimaayoochee kindiꞌi, gutte aache ginee iraasheenaꞌonaa aachi aache boonoshi asheenaꞌonon maatone. Tunebaani and ta kashe ne aafoochaa gaawe aafoona ciichebuye” iye.

¹⁵ Doono Yeerichi maraakoo Eliyaasich, “Biinna tookki kindibe; biinoo shattaahine” iye. Ebina Eliyaasi tiyiꞌi, biinna tookkii taatoo waan hammiye.

¹⁶ Aroochee taatoyich, “Doono Yeeri ishichiye: ‘Eqirooni katemee nuggishoo Baꞌaal Zebuubin echii waayoyich wocheyechinaꞌon ne daachiito, Israꞌeelee showooch Nuggishoo aalletenane? Ebin ne tuniitoyich, ne qeyeti qeenoochee tiyaachemmo neene. Iberoochaa qitemmo neene’ itone” iye.

¹⁷ Ebina Eliyaasi gettiti, Doono Yeerichi qaaroommon Akaziyaasi qitiye. Akaziyaasi bushaallo bi tunetoyich, bi manoo Yoraami bi xaaꞌooch kereeꞌi taatehe. Ebiyoo Yihudee taatoo Yoshafaaxi bushoo Yehoraami taateti guttinnee natoobane.

¹⁸ Akaziyaasi shuuneti eche shuunoo Israꞌeelee taateenaꞌo kiinee macaafooch kooreetone.