2 Saameeli 9 - Kafa Linguistics Project

Daawiti Mefiboshetich Ariqqo

¹ Ikke areddoon taatoo Daawiti “Yonaataanicha getiree biich deꞌoon ta deeyemmoyich, Saaꞌooli kechi asheenaꞌo daggoochee echeti asho beete?” iꞌi echehe.

² Arooba Saaꞌooli kexooch aafee bushoo tuneti, Siibi getteebeeti ikke uro beehe. Biinoo Daawit waan ceeggii deebiyeete. Taatoo biin “Siibi getteebeeto neene?” iꞌi echehe. Biyoo “Ta doonocho, eeha, taane” iye.

³ Taatoo biin “Yeeri aafooch wogoon ta giyetoommon, biich ta deeyemmoyich, Saaꞌooli kechi asheenaꞌo daggoochee echeto beete?” iye. Siibiyoo taatoyich “Yonaataani bushoo beetone. Biyoo gutte baata sheqqoone” iye.

⁴ Taatoo “Aabiichiye bi beeto?” iꞌi echehe. Siibiyoo “Lodebaari katemooch, Ameli bushoo Makiri kexoochiye” iye.

⁵ Ebina taatoo Daawiti wochiiꞌi, Lodebaar beeti Ameli bushoo Makiri kexoochee bi woyemmoyich tuniihe.

⁶ Saaꞌooli bushoo tuneti Yonaataanichi bushoo Mefibosheti Daawit waan waahe. Biyoo Daawitich oogoon imoyich, baroona showooch guufehe. Daawitiyoo “Mefibosheto!” iꞌi ceeggiye. Biyoo “Ta doonocho, hini tawoche” iye.

⁷ Daawitiyoo biich ishichiye: “Shattaahine; ne nihoo Yonaataanicha getiree neech deeyemmo taane. Ne nihinihoo Saaꞌoolicho tuneti showoo bullin neech wochemmo taane. Bulli aaboonoo ta madoochee maayemmo neene” iye.

⁸ Mefibosheti wochinnoon baroona showooch guufeechii ishichiye: “Ebi qititi kunaanoommi ta waan ne ciinnemmoyich, ne guuno ta, koni taane?” iye.

⁹ Taatoo aroochee Saaꞌoolichi aafee bushoo Siibin ceeggiꞌi, “Saaꞌoolinaa bi kechi asheenaꞌonocho tuneto bullin ne doono bushoochi bushoo Mefiboshetich immeto taane.

¹⁰ Ne, ne bushiisheenaꞌonaa ne naayinaꞌona ne doono bushoochi bushoo bi maayemmon bi danemmoyich bi showoon goyote; maayoonoo gotebote. Tunebaani Mefibosheti bi qelloona bulli aaboon ta madoocheeniye bi maayemmo” iye. Arooba Siibich aaraa uuche anaami bushiisheenaꞌonaa hiye naayinaꞌona beetinaꞌone.

¹¹ Siibiyoo taatoyich “Ta doono ne gettetoommon, ne guuno ta, tuniyemmo taane” iye. Ebina Mefibosheti taatoochi bushiishoochee ikkoochoommon bi madoochee maa beehe.

¹² Mefiboshetich Miki getteebeeti, ikke giisheche bushoo beetone. Siibi kexooch beetinaꞌo bulli Mefiboshetich maddee beeheete.

¹³ Mefiboshetiyoo taatoochi madoochee maabee Yerusaalem beehe. Biyoo gutte baata sheqqoone.