2 Saameeli 8 - Kafa Linguistics Project

Daawiti Bi Guudoona Beeti Asheenaꞌon Kochii Wochoo

¹ Ebiyee gubb, Daawiti wochinnoon Filsixeemeenaꞌona koyeꞌi, boonoshin kochii wochiye. Meteeg Amahi katemoon boonoshi kishoochee deqqiye.

² Ebiyoommon wotta Moꞌabeenaꞌon kochii wochiye. Boonoshinoo showooch qeejjiichii, woderoona qellayiye. Ebi qellayeetinaꞌoochee gutte beeroon wuxiichii, ikke beeroon wuxaanoon echiihe. Ebina Moꞌabee asheenaꞌo Daawitich hajjeeꞌi biich gibiroon qocciyeete.

³ Daawiti Efiraaxisi aachi gaꞌooch beeti showoon wochi yecha hammii beehe. Hammiibee gommoochaa, Sooriyeenaꞌo beeti, Tsobaahee taatoo tuneti, Rehoobi bushoo Hadadezeerin kochii wochiye.

⁴ Daawitiyoo hareshechi ikke humaa shabaatte balle ginee naayinaꞌonaa baatechi hiye hume ginee naayinaꞌonon kecciye. Balle gaarin geechemmi haresheenaꞌon baach echiichii echetinaꞌo bullichi tingoon qeccee kuxxiye.

⁵ Damaasiqa beeti Sooriyeenaꞌo Tsobaahee taatoo Hadadezeerin gaacheya waataa, Daawiti boonoshi daggoochee hiyaa gutte hume asheenaꞌon wuxiye.

⁶ Aroochee Sooriyee showooch beeti Damaasiqa bi ginee kaamboon kotiihe. Ebina Sooriyeenaꞌo Daawitich hajjeeꞌi biich gibiroon qocciyeete. Doono Yeeriyoo Daawiti bi hammito aabiichaanona, wudoon bi danemmoyich tuniihe.

⁷ Daawiti Hadadezeerichi naayinaꞌo yechiibeeti, aachoochee shuuneeti gaacheenaꞌon deqqiꞌi Yerusaalem daammiye.

⁸ Wotta oogeti wodde gooshoon Hadadezeerichi katemeenaꞌo tuneti Bexaahinaa Berotayinoochee daammiye.

⁹ Hamaatee taatoo Tooꞌi, Daawiti Hadadezeerichi ginee naayinaꞌo bullin kochii bi wochoon waayehe.

¹⁰ Hadadezeeri Tooꞌina tookkii wodde kaalloon koyeebee echetone. Biyoo taatoo Daawitin bi diggiyemmonaa Hadadezeerin kochii bi wochitoyich biin bi galletemmonoyich, bi bushoo Yoraamin daachiihe. Yoraamiyoo aachoochee, birewoonaa gooshoonoochee shuuneeti qiiceenaꞌon Daawitich deebiye.

¹¹ Taatoo Daawiti ebi qiiceenaꞌon, shiichiꞌi kochii bi wochiti asheenaꞌo showoochee bi daneti aachoonaa birewoona tookkii Doono Yeerich kichiye.

¹² Ebi biich hajjeeti asheenaꞌo, Edoomeenaꞌo, Moꞌabeenaꞌo, Amooneenaꞌo, Filsixeemeenaꞌonaa Amaleeqeenaꞌonane. Ebiyoommon wotta Tsobaahee taatoo Hadadezeer waanee bi deqqiti kecoon Doono Yeerich kichiye.

¹³ Daawitiyoo aaraa shimitte hume Edoomee asheenaꞌon Kiikki bamboochaa wuxiꞌi bi wottetoyee gubb, bi shigo beshoon arichehe.

¹⁴ Edoomee showoo bulliich bi ginee kaamboon kotiihe. Edoomeenaꞌo bulliyoo biich hajjeeheete. Doono Yeeriyoo Daawiti bi hammito aabiichaanona, wudoon bi danemmoyich tuniihe.

¹⁵ Daawitiyoo Israꞌeelee showoo bulliich taatehe; bi asheenaꞌo bullinoo tachiꞌi gaawe dayinnetoona qeejjiye.

¹⁶ Tseruuyi bushoo Yoꞌaabi bi ginee iraashoone. Ahiluudi bushoo Yoshafaaxi wotta kiinee koorechone.

¹⁷ Ebiyoommon wotta Akixuubi bushoo Sadooqinaa Abiyataari bushoo Ahimeleekina qeesheenaꞌone. Seraayiyoo taatoochi koorechone.

¹⁸ Yoyaadi bushoo Beenayi taatoochi quyee naayinaꞌo tuneti Kereeteenaꞌonaa Feleeteenaꞌonochi toommooch ukkiroone. Daawitichi anaami bushiisheenaꞌo wotta mikkirechinaꞌone.