2 Saameeli 5 - Kafa Linguistics Project

Daawiti Yihudee Showoonaa Israꞌeelee Showoonooch Taatoo Tuno

¹ Ebiyee gubb, Israꞌeelee yoodeenaꞌo bulli Kebiroon, Daawit waan waaꞌi, biich ishichiyeete: “No, ne meeno, ne damoo noone.

² Besheti yemeenooch, Saaꞌooli no toommooch taateꞌi beehooba, Israꞌeeleenaꞌon ginee koyee xaaꞌoochaa yaabito neene. Doono Yeeriyoo neech ‘Ta asheenaꞌo tuneti Israꞌeeleenaꞌon qiddemmo neene; boonoshinoo qeejjemmo neene’ itone” iyeete.

³ Ebina Israꞌeeleenaꞌon qeejjiibeeti geeneenaꞌo bulli Kebiroon, Daawit waan waaheete. Taatoo Daawitiyoo Kebiroonaa Doono Yeeri aafoochaa boonoshina tookkii wogoon giyiye. Boonoshiyoo Daawiti shimbooch zayitoon huuttiꞌi, Israꞌeelee showooch biin taatiiheete.

⁴ Daawiti bi taatehooba, bi eeno shaashe natone. Biyoo aabbe naton taatehe.

⁵ Kebiroon beechii, Yihudee showooch shabaatte nattaa shiritte agenoon taatehe; wotta Yerusaalem beechii, Israꞌeelee showoo bullinaa Yihudee showoo bullinooch shaashaa keejje naton taatehe.

Yerusaalemin Daawiti Kochii Yesho

⁶ Ikke areddoon taatoo Daawitinaa bi asheenaꞌona Yerusaalemin kocha hammiyeete. Are showee asheenaꞌo tuneti Yebuseenaꞌo “Daawitinaa bi asheenaꞌona noon kochii wochoon hakkaachemminaꞌone” iꞌi gabiyeete. Ebich biich ishichiyeete: “No katemooch gimon hakkaachemmo neene; aaf doogeenaꞌonaa baata sheqqeenaꞌonona ne giyaachemmoyich bajjemminaꞌone” iyeete.

⁷ Tunebaani Daawiti kochiꞌi, Tsiyooni mishigoon yechiye. Ebiyoo Daawiti Katemoo getaa ceekkehe.

⁸ Arooba Daawiti bi ginee naayinaꞌoyich ishichiye: “Yebuseenaꞌon kocha qaawiibeeto koniyoona, Daawitin shixxiibeeti, ebi aaf doogeenaꞌonaa baata sheqqeenaꞌona beetooch shagoyich, aachi bobboona kaama hambe” iye. “Aaf doogeenaꞌonaa baata sheqqeenaꞌona Yeerichi kexooch giyaayeete” bi getteeto, ebichiye.

⁹ Aroochee Daawiti bi beeyi xaaꞌoon are mishigechi katemooch tuniihe. Aroonoo Daawiti Katemoo iꞌi ceeggiye. Biyoo Miilee tiijjii bi guudoon xaqqoona shuunehe.

¹⁰ Daawitiyoo Beshe Mawe Nuggishoo Doono Yeeri biinna tookkii bi tunetoyich, qemi qemona kupphee kupphee hammiye.

¹¹ Arooba Xiroosi taatoo Kiraami Daawit waan wocheyechinaꞌon deejjiye; ebiyoommon wotta yigee mixon, anaaxeenaꞌonaa xaqqee xarechinaꞌonon deejjiye. Boonoshiyoo Daawitich taatee kexon haggiyeete.

¹² Daawitiyoo Doono Yeeri Israꞌeelee taatoo tuniiꞌi biin bi manjiyoon, bi asheenaꞌo tuneti Israꞌeeleenaꞌoyicha iꞌi bi taatittinoon bi oogiyoonoo ariihe.

¹³ Daawiti Kebiroonee Yerusaalem bi hammitoyee gubb, bare mecheenaꞌonaa naamacheenaꞌonon daakkiye. Biyoo anaami bushiishoonaa maache bushiishoonon daakkiꞌi shiyihe.

¹⁴ Yerusaalem beechii bi shiyiti bushiisheenaꞌochi shigo ebine: Shamuꞌi, Shobaabi, Naataani, Solomooni,

¹⁵ Ibihaari, Elishuwi, Nefeegi, Yafiyi,

¹⁶ Elishami, Eliyaadinaa Elifeleexinane.

Israꞌeeleenaꞌo Filsixeemeenaꞌon Kochii Wochoo

¹⁷ Filsixeemeenaꞌo, Daawiti huutteꞌi Israꞌeeleenaꞌo toommooch bi taatoon waayeheete. Boonoshi bulliyoo Daawitin qaawi yecha kaama waaheete. Tunebaani Daawiti ebin waayeꞌi, mishigechi xaaꞌooch dugilla hammiye.

¹⁸ Filsixeemeenaꞌo waa Refayee bambooch shaceꞌi koteheete.

¹⁹ Daawitiyoo “Ebi Filsixeemeenaꞌon keyiree koyote? Ta kishooch beshiiree immenne?” iꞌi Doono Yeerin echehe. Doono Yeeriyoo Daawitin “Hamiree koye; iberoon boonoshin ne kishooch beshiiree immemmo taane” iye.

²⁰ Ebina Daawiti Baꞌaal Feratsim hammiꞌi, aroochaa Filsixeemeenaꞌon kochii wochiye. Biyoo “Diqqoona ambamboo shaggiꞌi bi gaahoommon, Doono Yeeri ta etteenaꞌon gaakkiye” iye. Ebich are xaaꞌoo Baꞌaal Feratsimi getteehe.

²¹ Filsixeemeenaꞌo boonoshi shahalleenaꞌon arooch duppiichii hammitinaꞌone. Daawitinaa bi asheenaꞌona eboshin shaaggiꞌi daammiyeete.

²² Filsixeemeenaꞌo wochinnoon waaꞌi, Refayee bambooch shaceꞌi koteheete.

²³ Andoo Daawiti Doono Yeerin echehe. Biyoo “Boonoshi beetooch baad cikki hammaahine. Gubbaa guudiree caaree mixinaꞌo beetooch hamiichi arooch quye beebe.

²⁴ Ebi caaree mixinaꞌochi cilloochaa guubbee qaaroon ne waayegaata, Doono Yeeri ta, Filsixeemeenaꞌochi ginee naayinaꞌon kocha ne aafooch kecheto ta tunetoyich, afaafinoona keyi koyebe” iye.

²⁵ Daawitiyoo Doono Yeeri gettitoommon tuniihe; Filsixeemeenaꞌon Geebee tiijjii Gezeer beddaahaa yookkii dabbiꞌi kochiye.