2 Saameeli 4 - Kafa Linguistics ProjectIshiboshesi Qitoo 1 Abeneeri Kebiroonaa qitoon Saaꞌooli bushoo Ishiboshesi waayehooba, bi giidoo qajjiye. Israꞌeeleenaꞌo bulliyoo keqqiyeete. 2 Arooba Saaꞌooli bushoo Ishiboshesich bokkeenaꞌochi ukkireenaꞌo tuneti gutte asheenaꞌo beetinaꞌone. Ikkoochi shigo Banaahi, guttinnoocho wotta Rekaabi getteehe. Boonoshiyoo Biiniyaamee yoodo tuneti, Beerootechi Rimooni bushiisheenaꞌone. Beerooti katemee Biiniyaamee showeexi ikke kuxin tuniitaa haddeetine. 3 Beerooti asheenaꞌo Gitaayim goojjii hammiꞌi, hanaach beddaahaa dallaawoo tuneꞌi arooch beetinaꞌone. 4 Saaꞌooli bushoo Yonaataanich baata sheqqo tuneti ikke bushoo beetone. Biyoo Saaꞌoolinaa Yonaataaninochi qitee woroo Yezireelee waayeehooba, uuche nati bushoone. Baata sheqqo bi tuneto, arooba bi dichindee afaafinoona tiqqaꞌa bi woccaa beetaa, holliꞌiniye. Bi shigoo Mefibosheti getteehe. 5 Beerootechi Rimooni bushiisheenaꞌo Rekaabinaa Banaahina Ishiboshes waan hamma tiyiyeete. Boonoshiyoo hammiꞌi, aabo daggehaa, bi kexooch shaggiyeete. Areegaata, Ishiboshesi areddee aaboon kasheꞌi bi qeenooch tokketetone. 6 Kellechiyoo teepphoon woqqaabee taahaꞌa, biyoo tokketetine. Ebich Rekaabinaa bi manoo Banaahina nibboona kexooch giyiyeete. 7 Kexooch giyiꞌi, Ishiboshesi gat bi qeenooch tokketeꞌi bi beetaa, biin kochii wuxiyeete; bi qettoonoo kuxxiyeete. Bi qelloon yechiꞌi aroobee xumo bullin Yoordaanoosi bamboona qaxiriyeete. 8 Ishiboshesi qelloon Daawitich, Kebiroon deebiyeete. Taatoyichoo ishichiyeete: “Neen wuxiya qaawiibee echeti, ne etto tuneti, Saaꞌooli bushoo Ishiboshesi qello ebiyoche; Doono Yeeri hanaach taatoo no doono neecha iꞌi, Saaꞌoolinaa bi shiijjereenaꞌonochi toommooch nichoon kichitone” iyeete. 9 Tunebaani Daawiti Beerootechi Rimooni bushiisheenaꞌo Rekaabinaa bi manoo Banaahinoyich ishichiye: “Gonde mooyo bulliichee taan quyeti beeyechi Doono Yeeri beege! 10 Mishiraachoon taach deebito biich shaahaa, ‘Saaꞌooli qitite’ iti uroon yechaꞌa, Tsiqilaagaa wuxiyoye. Ebi uroyich bi deebiti mishiraachoyich ta qocceti gatiyoo ebine. 11 Bi hajjee kexooch, bi qeenooch qeyiꞌi beeti, xalle ashoon wuxiti gonde asheenaꞌo toommooch ebiyee beshe mooyo tunemmone. Bi damoon ittoshi kishoochee qaawemmo, ittoshinoo showee toommoochee aalliyemmo taane” iye. 12 Aroochee Daawiti bi naayinaꞌoyich bi getaa, boonoshin wuxiyeete. Boonoshi kishoonaa baatoonon kuxxiichii, Kebiroon beeti kote aachi gaꞌooch yooddiyeete. Ishiboshesichi qelloonoo daammiꞌi Kebiroon, Abeneeri duukketi maashee oppooch duukkiyeete. |
SIM International, 2020.