2 Saameeli 24 - Kafa Linguistics Project

Israꞌeeleenaꞌo Haddeyemmoyich Daawiti Tuniyoo

¹ Ebiyee gubb, wochinnoon Doono Yeeri kaaro Israꞌeeleenaꞌo toommooch cufiye. Biyoo Daawiti boonoshi toommooch bi tiyemmoyich tuniiꞌi, “Hamiree Israꞌeeleenaꞌonaa Yihudee asheenaꞌonochi daggooch beeti, koyoyich bedditi asheenaꞌon haddibe” iye.

² Ebich taatoo Daawiti bi ginee iraashoo tuneti Yoꞌaabich ishichiye: “Ne ginee naayinaꞌon yeshi, Daanee Beershaab beddaahaa beeti Israꞌeelee yoodeenaꞌo waan hambe. Ginoon koyoyich bedditi asheenaꞌochi haddoo ambicho gaata ta ariyemmoyich boonoshin haddibe” iye.

³ Tunebaani Yoꞌaabi taatoyich ishichiye: “Ne Nuggishoo Doono Yeeri asheenaꞌon ebi boonoshi haddoyee balle kishoon woddiitaa, taatoo ta doono ne aafoona beege! Taatoo ta doonocho, ebin tuniyoyich, amoyich qaawinne?” iye.

⁴ Tunebaani taatoo bi getoon Yoꞌaabinaa bi ginee naayinaꞌonochi toommooch manjiihe; ebina boonoshiyoo koyoyich bedeenaꞌo tuneti Israꞌeeleenaꞌon haddiya taatoo aafoochee kechii hammiyeete.

⁵ Boonoshiyoo Yoordaanoosin kimmiꞌi, Aroꞌeeri katemoonaa bambee gutte daggooch beeti bare katemoonoochee tiijjiꞌi haddooch giyiyeete. Gaadee showee gutte daggoona besheheete. Aroochee deshi-waan wotteꞌi Yazeeri katemooch,

⁶ Gilaadee showoonaa Hiteenaꞌo showooch beeti Qadeeshi katemoonooch hammiyeete. Daaninaa Iyooninooch, aroochee wotta guuddiibee Sidoon shaggiyeete.

⁷ Aroochee deshi-waan beeti, xaqqee uxerechi Xiroosi katemooch, Hiwee showoonaa Kanaanee showoonooch beeti katemeenaꞌo bulliich hammiyeete. Ciiroochaa Yihudee showoochaa deshi-waan beeti Beershaab shaggiyeete.

⁸ Ebina showoo bullin guuddiꞌi, yiixiye agenaa hiye qemoyee gubb Yerusaalem wotteheete.

⁹ Yoꞌaabiyoo koyoyich bedditi asheenaꞌochi haddoon taatoyich gettiye; goraadoon kaaccii koyoyich hakkoo boonoshich beeti asheenaꞌo, Israꞌeelee showoochee shimitte balle humeenaꞌo, wotta Yihudee showoochee uuche balle humeenaꞌo tuneheete.

¹⁰ Asheenaꞌo haddeyemmon bi tuniitoyee gubb, Daawit mullo biin ittibatehe. Biyoo Doono Yeerich ishichiye: “Ebi ta tuniiti mooyona oogeti axaaxoon shuuneto taane. Doono Yeero, ne guuno ta gondoon maaribe; mullaalli ashi shuunoon shuuneto taane” iye.

^11-12 Doono Yeeri Daawitichi taatee kexooch keemechi Gaadich ishichiye: “Hamiree Daawitich ishichibe: ‘Doono Yeeri ishichiye: “Keejje mooyon neech goommeto taane. Aroochee ikkoon ne kaaccemmona, aroon tuniyemmo taane” itone’ gete” iye. Bi dechara maaddoona Daawiti tiyaahaa,

¹³ Gaadi Daawit waan hammiꞌi, Doono Yeeri gettiton biich gettiichii, biin ishichiꞌi echehe: “Keejje nati shaacoo ne showooch giba? Woyee keejje agenee wottoon ne etteenaꞌo neen yoohi dabbi beetaa boonoshi aafoochee woci beeyenne? Woyee keejje qemi wottoon qeqqichiibeeti biiyo ne showoon yexa? Ebi mooyon gaawichi gabiree taach ne getee, taan wocheto waan daambona” iye.

¹⁴ Aroochee Daawiti Gaadich ishichiye: “And oogeton xuuxeto taane. Bi ariqqo woddoo bi tunetoyich, Doono Yeeri kishooch dihoo nooch gaawiye. Tunebaani ashi kishooch dihoon qaawaache” iye.

¹⁵ Ebina Doono Yeeri aroobee maaddoochee tiijjiꞌi bi taajjeti aabo shaggimmi wottoon Israꞌeeleenaꞌo toommooch qeqqichiibeeti biiyoon deejjiye. Ebi biiyoona Daanee Beershaab beddaahaa beeti asheenaꞌo daggoochee shabe hume asheenaꞌo ciireheete.

¹⁶ Doono Yeerichi maraakoo Yerusaalemin aalliiya bi kishoon bi yaggimmona Doono Yeeri ebi qaaꞌi mooyoyich ayiniꞌi, ebi aalliibeeti maraakoon, “Beddiye; ne kishoon wochibe” iye. Areegaata, are maraakoo beeto, Yebusee asho Orinaani maayi buchi xaaꞌee gaꞌoochiye.

¹⁷ Daawiti asheenaꞌon wuxiibeeti maraakoon beeggiꞌi, Doono Yeerich ishichiye: “Axaaxoon shuuneto taane; boonoshi qiddoo tunaachaa gondeto ta qelloona taane. Hini bagoommi asheenaꞌo aalliiti mooyo aalloone. Taannaa ta nihoochi kechi asheenaꞌonon baach ne naxemmoyich neen qollehoye” iye.

Deejjee Gudoon Doono Yeerich Daawiti Shuuno

¹⁸ Arooba Gaadi Daawit waan waaꞌi biich ishichiye: “Damba Yebusee asho Orinaanichi maayi buchi xaaꞌooch tiyi hamiree, deejjee gudoon Doono Yeerich shuunebe” iye.

¹⁹ Ebich Daawiti Doono Yeeri Gaadina biich bi gettitoommon, tiyii hammiye.

²⁰ Orinaani dugilla ciinniꞌi, taatoonaa bi naayinaꞌona bi waan waa beetinaꞌon beeggiye. Biyoo boonoshi waan giddee baroona showooch guufeꞌi, taatoyich oogoon immiye.

²¹ Orinaaniyoo “Taatoo ta doono bi guuno ta waan bi waato, amoyichiye?” iye. Daawitiyoo wochiꞌi, “Biiyo ta asheenaꞌon wuxoon bi qajjemmoyich, ne maayi buchi xaaꞌoon kemeree arooch Doono Yeerich deejjee gudoon shuuneyane” iye.

²² Aroochee Orinaani Daawitich ishichiye: “Taatoo ta doono ne qaawiton daamiree deejjibe; micciibeeti deejjoyich tunemmi gatteenaꞌo eboshiyoche. Wotta qaaqqoon shoohoyich tunemmi, maayi buchi qiicoonaa gattee waanjoona ebiyoche” iye.

²³ Orinaani ebi bullin taatoyich immiichii, “Ne Nuggishoo Doono Yeeri ne deejjoon deꞌe” iye.

²⁴ Tunebaani taatoo wochiꞌi Orinaanich “Ebi tuneyaache. Gatiyoon qociree ne waanee kememmo taane. Gatiyoon ta qocaani deejjoon ta Nuggishoo Doono Yeerich deejjaache” iye. Ebina Daawiti maayi buchi xaaꞌoonaa gatteenaꞌonon aache sheqeelee birewoona kemehe.

²⁵ Daawiti arooch Doono Yeerich deejjee gudoon shuuneꞌi, micciibeeti deejjoonaa ikkittinee deejjoonon deejjiye. Ebich Doono Yeeri Israꞌeeleenaꞌoyich bi qolleti qolloon waayehe. Ebina biiyo are showoochee aallehe.