2 Saameeli 23 - Kafa Linguistics Project

Ciiroochaa Daawiti Gettiti Mooyo

¹ Yaaqobichi Nuggishoo huuttito, Yeeri biin aricheti taatoon tuniito, Israꞌeeleenaꞌoyich gaaweti shoddoon kichecho, Iseyi bushoo Daawitichi ciireexi yibbaatoo ebine:

² “Doono Yeerichi Ayaano ta gettemmon taach gettiye; bi qaaro ta noonooch tunehe.

³ Israꞌeelee Nuggishoo yibbaatehe; Israꞌeeleenaꞌochi Xaqqee Inderoo taach ishichiye: ‘Asheenaꞌon gaawe dayinnetoona nalliꞌi qeejjiibeeto, Yeerin shatona qeejjiibeeto,

⁴ biyoo maaddee yaaꞌeexi bekkoommo, qubo aalli maaddoona bekkeebeeti aaboommo, amiyo shaannitoyee gubb, mocee toommooch bekkeebeeti waccoommone’ iye.

⁵ “Yeeri ta shiijjeroon bi diiremmo ebiyoommi gommonane; Yeeri bulli yemeenoon beeyemmi wogoon taanna tookkii giyitone; bulli mooyon tatoona gawaatitone; biyoo bi gibenikkiton shaddaanoone. Ta qaawaabeeto ebiniye; Yeeri iberoon taan gaachemmone; ebi bulli ceennemmoyich tuniyemmone.

⁶ Tunebaani gonde asheenaꞌo tiijjaa duppeebeeti angixoomminaꞌone; ebi angixon shokke kishoona tiijjemmo koniyoona aalloone.

⁷ Tunebaani angixon yechiibeeto koniyoona, xuuree qiicoon woyee ginee yaaboon yechiye; bi beeti xaaꞌoochaanoo qaaqqoona michaa ciroona aallemmone” iye.

Ginee Anaaminaꞌo Tuneti Daawitichi Naayinaꞌo

⁸ Daawitichi ginee anaami asheenaꞌo shigo ebine: Takimoonee asho Yosheeb Beshebeti, keeminaꞌo toommooch ukkiroone. Biyoo ikke koyoochaa bi ginoon tiijjiꞌi, shimitte balle asheenaꞌon wuxitone.

⁹ Keejje ginee anaaminaꞌo daggoochee guttinnoo wotta Ahoohichi yaroo, Doodi bushoo Elazaarine. Israꞌeelee ginee naayinaꞌo gubb shokiichaa, Daawitinaa biinna, koyeya kiceeti Filsixeemeenaꞌona manjii neexeꞌi koyeheete.

¹⁰ Biyoo manjii neexeꞌi bi kishoo taahimmi wottoon, bi kishoo shikkee cubooch wogimmi wottoon Filsixeemeenaꞌon kochiye. Arooba Doono Yeeri worganikkiti wudoon bi danemmoyich tuniihe; Israꞌeelee ginee naayinaꞌo bi beetooch boonoshi wotteto ginee qiicoon dubenee toommoochee shootoyich baachiye.

¹¹ Keejjinnoo wotta Haraaree asho Ageehichi bushoo Shaamine. Filsixeemeenaꞌo michiyee goyoo beeti ikke budooch, Leha kiceeheete. Echeti Israꞌeelee ginee naayinaꞌo wocee aalleheete.

¹² Tunebaani Shaami are goyee gutte daggooch manjiꞌi neexehe. Biyoo are michiyoon boonoshi daamaachemmoyich bajjiꞌi, Filsixeemeenaꞌon wuxiye. Arooba Doono Yeeri worganikkiti wudoon bi danemmoyich tuniihe.

¹³ Ikke areddoon, maayi qecci gooroo shagg bedooch, Filsixeemee ginee naayinaꞌo Refayee bambooch kaamboon geddiꞌi boonoshi beetaa, ebi aricheti shaasheexi keeminaꞌo Daawit waan, Adulaami xaqqee gofooch dugilla hammiyeete.

¹⁴ Ebiyooba Daawiti mishigooch bi beetaa, Filsixeemee ginee naayinaꞌo Beetilehemin yechitinaꞌone.

¹⁵ Daawitiyoo “Beetilehemi uxeree kellooch beeti aachi oppoochee ta uchemmi aacon taach koni deeba?” iꞌi oogichii qaatiye.

¹⁶ Ebina ebi giidechi keejje asheenaꞌo Filsixeemeenaꞌochi kaambee gutte daggoona kuxxii besheꞌi, Beetilehemi uxeree kellooch beeti aachi oppoochee aacon kittii, Daawitich deebiyeete. Tunebaani Daawiti uchemmon qajjiichii, Doono Yeerich deejjoon tunii ukkiꞌi,

¹⁷ “Ebi aacon uyon Doono Yeeri ta waanee wokkiibe; ebi boonoshi kashoona gajjiteeꞌi hammiti asheenaꞌochi damoo toone?” iye. Ebich are aacon uchemmon qajjiye. Ebi giidechi keejje asheenaꞌo tuniiti mooyo ebine.

¹⁸ Tseruuyi bushoo, Yoꞌaabi manoo Abishayi shaasheenaꞌochi toommooch ukkiroone. Aroo bi ginoon tiijjiꞌi keejje balle asheenaꞌon wuxiye. Ebina keeminaꞌoyee barii aricheti ashoon tunehe.

¹⁹ Biyoo shaasheenaꞌo daggoochee beshoon aricheton tuneꞌi, boonoshi toommooch ukkirehe. Tunebaani keeminaꞌochoommon aricheto toonoone.

²⁰ Kabizeelee asho, Yoyaadi bushoo Beenayi aricheti mooyon tuniiti ginee anaamone. Biyoo gutte Moꞌabee ginee anaaminaꞌon wuxiye. Wotta ikke areddoon kecho shimaayoochee kindiyooba dugilla hammiꞌi oppooch beeti daaheroon wuxiye.

²¹ Wotta andoo ikke mallet gaawe Gibitsee ashoon wuxiye. Ebi Gibitsee asho ginoon yechito bi tunetaanoona, Beenayi gumboon yechiꞌi bi waan hammiye. Biyoo ginoon Gibitsee ashoochi kishoochee shottee deqqiꞌi uroon bi hajjee ginoona wuxiye.

²² Yoyaadi bushoo Beenayi tuniiti aricheti mooyo ebine; biyoo giidechi keeminaꞌochoommon aricheton tunehe.

²³ Shaasheenaꞌo daggooch aricheton tunehe; tunebaani ohe keeminaꞌona tookkii tateyaanoone. Daawiti bi quyee naayinaꞌo toommooch biin ukkiriihe.

²⁴ Shaasheenaꞌo eboshine: Yoꞌaabichi manoo Asaheeli, Beetilehemechi Doodichi bushoo Elihanaani,

²⁵ Haroodechi Shaami, Haroodechi Eliqaahi,

²⁶ Feliixechi Heleezi, Teqoꞌechi Ikeeshi bushoo Iraahi,

²⁷ Anaatootechi Abezeeri, Hushatechi Mebunayi,

²⁸ Ahoohechi Tsalimooni, Nexoofechi Maharayi,

²⁹ Nexoofechi Banaahi bushoo Heleebi, Biiniyaamee showooch beeti Gibaahee asho Ribayi bushoo Itayi,

³⁰ Feratoonechi Beenayi, Bambooch beeti Gaashee asho Hidaayi,

³¹ Arebee asho Abiyaliboni, Bahariimechi Azimaweeti,

³² Shalibonechi Eliyahibi, Yasheeni bushiisheenaꞌo, Yonaataani,

³³ Haraaree asho Shaami, Haraaree asho Sharaarichi bushoo Ahiyami,

³⁴ Maꞌakechi Ahasibayi bushoo Elifeleexi, Giloonechi Akixofeeli bushoo Eliyaami,

³⁵ Qermeloosechi Hetsiri, Aribee asho Faraayi,

³⁶ Tsobaahechi Naataani bushoo Igaali, Gaadee asho Baniyi,

³⁷ Amoonee asho Tseleeqi, Tseruuyi bushoo Yoꞌaabichi quyee naayo tuneti, Beerootee asho Naharaayi,

³⁸ Itiree asho Iraahi, Itiree asho Gareebinaa

³⁹ Hitee asho Uuriyinane. Eboshi bulli shaashaa shabaatteenaꞌone.