2 Saameeli 22 - Kafa Linguistics Project

Yeeri Biich Wudoon Immitoyich Daawitichi Shoddo

¹ Doono Yeeri Saaꞌooli kishoochee, wotta bi etteenaꞌo bulli kishoochee biin bi wodiihooba, Daawiti ebi shoddoon Doono Yeerich shoddehe.

² Biyoo ishichiye: “Doono Yeeri ta deebe xaqqo, ta mishigo, taan wodiyecho,

³ ta Nuggishoo, shoobbii taan wodiibeeti deebe xaqqo, gaachoochoommon taan qeriibeeto, giidechi wodiyecho, bi shoobooch giyiree ta wodemmi, ta deeboone; taan wodiyecho, xuꞌechinaꞌo kishoochee taan wodii beetone.

⁴ Galleto biich giddi bede Doono Yeer waan ta cookaa, biyoo ta etteenaꞌo kishoochee taan wodii beetone.

⁵ “Qitoo, aachi aayochoommon taan giichiye; aalliyechi ooge aacochoommon taan qooxxa iye.

⁶ Siꞌoolee woderoo ta qettoona yechiye; qitoo olloochoommon taan yecha iye.

⁷ “Ta xuuxehooba, Doono Yeerin ceeggoye; ta Nuggishoo taan bi gaachemmoyich ceeggoye. Biyoo bi yaafee kexooch beechii, ta qaaroon waayehe; ta cookoo bi waamooch shaggiye.

⁸ “Showoo qewehe; shuuriinoo iye; shimaayee tuugeenaꞌo shuuriyeete; qeweenoo iyeete; ebiyoo Yeeri kaaretoyichiye.

⁹ Bi muddoochee cufoo kechiye; bi kookkoochee michii aalliibeeti qaaqqoonaa geecciibeeti qaaqqee bunoona kechiye.

¹⁰ Shimaayoon qechiꞌi dugilla kindiye; bi baatee dechiich mandere qubo beetone.

¹¹ Kiruubee toommooch tuneꞌi yoobbiye; yongoochi qosheenaꞌooch tuneꞌi bekkehe.

¹² Bi guudoon manderoona qeriye; aacona ceenniti, dunne qubo bi guudoona tunehe.

¹³ Bi aafooch beeti bekkoochee, qaaqqee buno aaxxee kechiye.

¹⁴ Doono Yeeri shimaayoochaa gigehe; Beshoo Yeeri bi qaaroon waayiihe.

¹⁵ Shangeenaꞌon awureꞌi bi etteenaꞌon shacciye; phaqqoo phaqqemmoyich tuniiꞌi, boonoshin shaccii aalliihe.

¹⁶ Doono Yeeri kaaroochee, bi muddoochee bi kachiti kaaree cufoochee tiyitona, baharee dechi ducho bekkehe; showee tuugeenaꞌoo shokkaachoon echeheete.

¹⁷ “Dambee bi kishoon deejjiꞌi, taan yechiye; aachi gejjoochee taan kichiye.

¹⁸ Giidechi ta etteenaꞌo kishoochee, taan shixxii beetinaꞌo kishoocheenoo taan wodiihe; ebiyoo tayee beshe giidechinaꞌo boonoshi tunetoyichiye.

¹⁹ Boonoshiyoo ta duꞌehooba ta toommooch waaheete; tunebaani Doono Yeeri taach dego tunehe.

²⁰ Biyoo gamini xaaꞌooch taan daammiye; taanna bi emiritoyich, taan wodiihe.

²¹ “Ta cadiqittinoochee tiyitona, Doono Yeeri taach deꞌoon deehe; ta kishee xallittinoochee tiyitona, taach wochiꞌi qocciye.

²² Ebiyoo Doono Yeerichi gommon ta dabbitoyichiye; gondoon shuunoona Yeer waanee gubb wotteyaano ta tunetoyichiye.

²³ Bi sheeroo bullin ceechito taane; bi qociyoocheenoo gubb wotteyaano taane.

²⁴ Bi aafooch oonaallo taane; gondoon shuunoochee ta qelloon quyeto taane.

²⁵ Ebich Doono Yeeri ta cadiqittinoochee tiyitona, bi aafooch taach beeti mullee xalloochee tiyitona, taach wochiꞌi qocciye.

²⁶ “Doono Yeero, neech gibeneetinaꞌoyich gibeneeto neene; oonneyaaneenaꞌoyich ceeni gaaweto neene.

²⁷ Mulli xalleenaꞌoyich gaaweto neene; xummeenaꞌoyich marecho neene.

²⁸ Xukketinaꞌon wodiihine; tunebaani geecechinaꞌon giishiihine.

²⁹ Doono Yeero, ne ta ceechoo neene; ta Nuggishoo ta manderoon bekkii beetone.

³⁰ Taach ne immaabeeti giidoona, ta etteenaꞌon yookko; ta Nuggishoochi gaachoona katemee xaqqee uxeroon cappheho.

³¹ Yeerichi gommo muricaalloone; Doono Yeeri gettiti mooyo gibeneetone; bi shoobooch giyitinaꞌon gaachoochoommon qerii beetone.

³² “Doono Yeeriyee besh, Nuggishoo konine? No Nuggishoyee besh, Xaqqee Inderoo konine?

³³ Ta Nuggishoo, taach giidechi deeboone; ta gommon taach kaachii beetone.

³⁴ Biyoo ta baatoon doollee baatoochoommon kupphiihe; geppee toommooch keqqaalloon ta neexemmoyich tuniihe.

³⁵ Ta kishoo aabichi bi koyemmo gaata dojjiye; ta mochoo gooshoochee shuuneeti maꞌoon yeepphiye.

³⁶ Taan wodiyemmi ne gaachoon taach immehine; ta qolloon waayaꞌa taan kupphiihine.

³⁷ Taan koniyoona yechemmoyich tuniyaano neene; ta baatoo giinaanoone.

³⁸ “Ta etteenaꞌon yookkaa dabbaꞌa boonoshin aalliihoye; boonoshi aallemmi wottoon gubb wotteyaano taane.

³⁹ Boonoshin aalliihoye; yexxaa dichaanoo iyoye; boonoshiyoo aroochee tiyaaneenaꞌone; ta aafooch dihiꞌi echeheete.

⁴⁰ Ginoochaa giidechon ta tunemmoyich, taan kupphiihine; ta toommooch tiyitinaꞌo ta baatooch goyinnemmoyich tuniihine.

⁴¹ Ta etteenaꞌo boonoshi hilla wotteree woccemmoyich tuniihine; taan shixxii beetinaꞌon aalliihoye.

⁴² Boonoshin gaachemmon qaawiyeete; tunebaani boonoshin wodiito aalloone; Doono Yeer waan cookiyeete; tunebaani bi boonoshi cookoon waayeyaanoone.

⁴³ Boonoshin yiikkaꞌa quttoon tuniihoye; gommooch beeti dengoochoommon, boonoshin kotoye.

⁴⁴ “Deꞌa getaani macceenaꞌo kishoochee taan wodiihine; aageteenaꞌo toommooch taan iraashiihine; boonoshin ta ariyaani asheenaꞌo taach hajjeeheete.

⁴⁵ Ashi showee asheenaꞌo waaꞌi, ta aafooch yittiyeete; ta gettaahaa, bekkech ta getoon waayeheete.

⁴⁶ Boonoshi mullo qitiye; boonoshi aasheti xaaꞌoochee qeweebee ta waan waaheete.

⁴⁷ Doono Yeeri beeyechone! Taach deebe xaqqo tuneto galleteebe! Deebe xaqqo tuneꞌi taan wodiibeeti ta Nuggishoo oogebe!

⁴⁸ Yeeri ta etteenaꞌo toommooch nichoon kichii beetone; biyoo aageteenaꞌo taach hajjeyemmoyich tunii beetone.

⁴⁹ Bi ta etteenaꞌo kishoochee taan wodii beetone. Doono Yeero, ta etteenaꞌo toommooch taan oogiihine; xuꞌechinaꞌo kishoochee taan wodiihine.

⁵⁰ “Ebich neen aageteenaꞌo daggoochaa galletoye; ne shigoyich galletee shoddoon shoddoye.

⁵¹ Doono Yeeri bi taatiiti taatoyich wudoon immii beetone; bi huuttitoyich bi shoodoon bekkii beetone; ebinoo Daawitinaa bi shiijjereenaꞌonoyich bulli yemeenoon tuniihe” iye.