2 Saameeli 21 - Kafa Linguistics Project

Saaꞌooli Shiijjereenaꞌo Toommooch Gibeꞌoonee Asheenaꞌo Nichoon Kichoo

¹ Daawitichi taatee yemeenooch kuxaanoon keejje nati wottoon, giidechi shaacoo tunehe. Ebich Daawiti Doono Yeer waan corootiye. Doono Yeeriyoo “Saaꞌooli Gibeꞌoonee asheenaꞌon bi wuxitoyich, biinnaa bi kechi asheenaꞌonochi kishooch ashi damoo beetone” iye.

² Gibeꞌoonee asheenaꞌo Amooree yaroochee echeti asheenaꞌoani, Israꞌeeleenaꞌo tooneenaꞌone. Israꞌeeleenaꞌo boonoshin wuxaanoon echiyoyich wogetinaꞌone. Tunebaani Saaꞌooli Israꞌeeleenaꞌonaa Yihudee asheenaꞌonoyich qanaatoochee tiyitona, aroyee aaf boonoshin aalliiya qaawitone. Taatoo Daawiti Gibeꞌooneenaꞌon ceeggiꞌi,

³ boonoshich ishichiye: “Ittoshich amoon tuniibote? Doono Yeerichi asheenaꞌon ittoshi diiremmoyich, axaaxoon xalliyemmi mooyon tuniiya qaawito taane” iye.

⁴ Gibeꞌooneenaꞌo ishichiyeete: “Noonnaa Saaꞌooli woyee bi kechi asheenaꞌonochi daggooch beeti mooyo birewoona woyee aachoona mashaamemmo toonoone. Wotta Israꞌeeleenaꞌo daggoochee koninolla wuxoo nooch hakkeyaani mooyone” iyeete. Daawiti wochiꞌi, “Ishigaata, ittoshich ta tuniyemmi mooyo, amoone?” iꞌi echehe.

⁵ Boonoshiyoo taatoyich wochiꞌi ishichiyeete: “Noon ciichiti uroochi, Israꞌeelee showoo bulliich xaaꞌoon no muccemmoyich tuniiꞌi noon aalliiya qaawiti,

⁶ are uroochi shiijjeroochee shabaatte anaami bushiisheenaꞌo nooch beshiitaa ichebeete. Nowoo boonoshin Doono Yeeri aafooch, Doono Yeeri kaacciti taatoo Saaꞌooli beeyi katemoo tuneti Gibaahaa yoodone” iyeete. Taatoo “Tunebe; boonoshin ittoshich beshiiree immemmo taane” iye.

⁷ Tunebaani Daawiti, biinnaa Saaꞌooli bushoo Yonaataanina Doono Yeeri aafoochaa boonoshinaa boonoshina wogeti wogoyicha iꞌi, Saaꞌooli bushoo Yonaataanichi bushoo Mefiboshetin beshiiꞌi imaanoone.

⁸ Biyoo Ayaahi bushee Ritsifi taatoo Saaꞌool waanee shiyeti Arimooninaa Mefiboshetina getteebeeti gutte anaami bushiisheenaꞌon, wotta Saaꞌooli bushee Meraabi Meholatechi Barizilay bushoo Adirel waanee bi shiyeti uuche anaami bushiisheenaꞌon daammiye.

⁹ Boonoshinoo Gibeꞌooneenaꞌoyich beshiiꞌi immiye. Gibeꞌooneenaꞌo boonoshin guudi toommoochaa Doono Yeeri aafooch yooddiyeete. Shabaatteenaꞌoo tookkii ikkooch qitiyeete. Boonoshi qitito, maayi qecci gooree ikkinnee qemoobane; ebiyoo sheqoo batt qeccee beetenane.

¹⁰ Aroochee Ayaahi bushee Ritsifi dubeno beetooch hammaꞌa, xaqqee guudi toommooch dookoona bashoon biich bashiyan. Biyoo maayi qecci gooroochee tiijjaꞌa, amiyo shimaayoochee dubenee toommooch dihimmi wottoon, arooch kotaꞌa, areddoon shimaajji gacoochee, wotta xumoon kubbi cooxoochee dubenoon quyaa beehan.

¹¹ Daawiti Ayaahi bushee, Saaꞌooli naamache Ritsifi tuniiti mooyon waayehe.

¹² Biyoo hammiꞌi, Gilaadee showooch beeti Yabeeshi asheenaꞌo waanee Saaꞌoolinaa bi bushoo Yonaataaninochi shaawushoon deqqiye. Ebi Yabeeshi asheenaꞌo Filsixeemeenaꞌo Saaꞌoolin Giliboꞌaa boonoshi wuxiyooba, Saaꞌoolinaa Yonaataaninochi dubenoon daammiꞌi boonoshi yoodditi Beet Shani addibaaboochee aashoona deebiti asheenaꞌone.

¹³ Saaꞌoolinaa bi bushoo Yonaataaninochi shaawushoon aroochee deebiye. Wotta asheenaꞌo yooddeti shabaatte asheenaꞌochi shaawushoon kiciyeete.

¹⁴ Boonoshinoo Saaꞌoolichi shaawushoonaa bi bushoo Yonaataanichi shaawushoona tookkii Biiniyaamee showooch beeti Tselaah, Saaꞌooli nihoo Qiishichi maashee oppooch, taatoo gettitoommon tuniiꞌi duukkiyeete. Aroyee gubb, Yeeri boonoshi showoyich boonoshi qolleti qolloon waayehe.

Giidechi Filsixeemeenaꞌona Koyeeti Koyo

¹⁵ Filsixeemeenaꞌonaa Israꞌeeleenaꞌona daggooch wochinnoon koyo tiyiye. Daawitiyoo bi ginee naayinaꞌona tookkii desh hammiꞌi, Filsixeemeenaꞌona koyehe. Biyoo hakkoo guuteehe.

¹⁶ Gooshoochee shuuneeti, keejje kiilo giraamaa qachi ginoon yechiti, andire goraadoonoo cuyeti, Rafayimee yaroochee tuneti, Ishibenoobi Daawitin wuxiya iye.

¹⁷ Tseruuyi bushoo Abishayi Daawitin gaacheya waahe; are Filsixeemoonoo kochii wuxiye. Aroochee Daawitichi ginee naayinaꞌo biich ishichiyeete: “Ne Israꞌeelee showooch aaxxeebeeti ceechoommo neene; ne qitigaata, ne shiijjeroocheenoo koniyoona ne taatittinoon yesho qayigaata, nooch beemo manderemmone. Ebich illa ebiyee damba noonna tookki koyooch hamaachemmo neene” iꞌi wogeheete.

¹⁸ Ebiyee gubb, wotta Goobaa Filsixeemeenaꞌona tookkii koyo koyeehe. Hushatechi Sibekayi Rafayimee yaroochee tuneti Saafin wuxiye.

¹⁹ Wotta wochinnoon Goobaa Filsixeemeenaꞌona tookkii koyo koyeehe. Beetilehemechi Yaꞌiir bushoo Elihanaani qoreddee shippechochi waanjoommi (shobboommi) ginee yaabechi, Gaati katemee asho Gooliyaadin wuxiye.

²⁰ Wotta wochinnoon Gaataa koyo koyeehe. Bi kishoonaa bi baatoonooch shiritti shiritte yapherechi, kicaa hiyaa awudde yapherechi hakke ooge ikke uro beehe. Biyoo Rafayimee yaroone.

²¹ Ebi uro Israꞌeeleenaꞌon coonehe; Daawiti manoo Shimeꞌi bushoo Yonaataani biin wuxiye.

²² Ebi awuddeenaꞌo Gaat beeti Rafayimee yareenaꞌone. Boonoshinoo Daawitinaa bi asheenaꞌona wuxiyeete.