2 Saameeli 20 - Kafa Linguistics Project

Sheebi Daawiti Toommooch Hukkoon Tiijjoo

¹ Arooba Bikiri bushoo, Sheebi getteebeeti ikke gaacaalli Biiniyaamee asho arooch beehe. Biyoo tiroon (waaringoon) huggiꞌi ishichiye: “Daawit waanee nooch qoodoo aalloone, Iseyi bushoo waanee nooch danemmi mooyo aalloone; Israꞌeeleenaꞌote, ittoshi kexi kexooch wottebote” iye.

² Ebich Israꞌeeleenaꞌo bulli Daawitin qajjii Bikiri bushoo Sheebin dabbiꞌi hammiyeete. Tunebaani Yihudee asheenaꞌo boonoshi taatoo waan giddeꞌi, Yoordaanoosee Yerusaalem beddaahaa tookkii hammiyeete.

³ Daawitiyoo Yerusaalem beeti bi kexooch shaggiye. Biyoo bi kexon boonoshi quyemmoyich bi echiiti aashire bi naamacheenaꞌon daammii, ikke kexooch, quyecho kishooch tuniihe. Boonoshich qaawii beeton immiye. Tunebaani boonoshi achooch shagaanoone. Ebich boonoshi qitimmi wottoon ashoyee badd kechiꞌi, xuumeenaꞌochoommon tuneꞌi beeheete.

⁴ Aroochee taatoo Amaasich, “Yihudee asheenaꞌon sharittich taach ceege; newoo ne qelloona boonoshina tookki hiniich danebe” iye.

⁵ Amaasi Yihudee asheenaꞌon ceegga hammiye; tunebaani bi woyemmoyich taatoo taajjeti aabooba wotteyaanoon yagiye.

⁶ Ebich taatoo Abishayich, “Bikiri bushoo Sheebi, Abisoloomi tuniitoyee beshe iritoon no toommooch deebemmone; ta asheenaꞌon yeshiree biin yoohi dabbibe. Ebi tuno qayigaata xaqqee uxerechi katemooch giyi aasheree, no waanee muriccemmone” iye.

⁷ Ebina Yoꞌaabichi asheenaꞌo, taatoochi quyee naayinaꞌo tuneti Kereeteenaꞌonaa Feleeteenaꞌona, wotta ginee anaaminaꞌo tuneti asheenaꞌo bulli Abishayin dabbii hammiyeete. Boonoshiyoo Yerusaalemee kechiꞌi, Bikiri bushoo Sheebin yoohi dabbiya hammiyeete.

⁸ Gibeꞌoon beeti ooge xaqqo beetooch boonoshi shaggimmona, Amaasi boonoshina daneya waahe. Areegaata, Yoꞌaabi koyooba taheebeeti tahoon tahetone; aree toommoochoo goraadoon bi gonenoona shachoona bi shimetooch cuyetone. Biyoo aaf bi hammimmona, goraado holliye.

⁹ Yoꞌaabiyoo Amaasin, “Ta manoocho, diggee beetine?” iye. Aroochee shummemmon shaahiꞌi qanne kishoona bi ishaanoon yechiye.

¹⁰ Tunebaani Amaasi Yoꞌaabichi kishooch beeti goraadoochee bi qelloon quyetaanoone. Yoꞌaabi aroona bi maacooch kochiꞌi, bi maacee meenon showooch shekilliye. Biyoo kaatee bi qititoyich, wochiiꞌi koyo Yoꞌaabich qaawiyaanoone. Aroochee Yoꞌaabinaa bi manoo Abishayina Bikiri bushoo Sheebin yookkii dabbiyeete.

¹¹ Yoꞌaabichi asheenaꞌo daggoochee ikkoo Amaasi dubenee gaꞌooch neexeechii, “Yoꞌaabicho tuneto, wotta Daawiticho tuneto Yoꞌaabin dabbibe” iye.

¹² Amaasi dubeno damoona wooreꞌi, gommi gutte daggooch dihiꞌi beehe. Aroona besheya waabeeto koniyoona, ebin beeggiꞌi neexee beehe. Are uro asheenaꞌo neexoon beeggiꞌi, dubenoon gommoochee tiijjii kubbooch daammiye; bi toommoochoo tahoon qeriye.

¹³ Amaasi dubeno gommoochee tiyitoyee gubb, asheenaꞌo bulli Bikiri bushoo Sheebin yoohi dabbiya, Yoꞌaabi hillooch hammiyeete.

¹⁴ Sheebiyoo Israꞌeelee yoodeenaꞌo showoon besheꞌi, Abeel Beet Maꞌaki katemooch hammiye. Bikiree asheenaꞌo bulli kiceeꞌi Sheebin dabbiꞌi are katemooch giyiheete.

¹⁵ Yoꞌaabichi asheenaꞌo Abeel Beet Maꞌak shaggiꞌi Sheebi beeti, are katemoon giichiyeete. Katemee xaqqee uxeree maachaa, uxeroona xaaqqiꞌi showoon gutiyeete; wotta xaqqee uxeroon dichiya qicciyeete.

¹⁶ Areegaata, mullechi ikke ure katemoochaa bi qaaroon oogichaꞌa, “Waayebote, waayebote! Yoꞌaabina tookki yibbaateya ta qaawitoyich, hiniich bi woyemmoyich getote” iyan.

¹⁷ Yoꞌaabiyoo bi waan katinniye. Ureyoo “Yoꞌaabi neene?” iyaꞌa echahan. Yoꞌaabiyoo “Eeha taane” iye. Ureyoo biich, “Ne gonnee ta yibbaataa beeton elle waayebe” iyan. Biyoo wochiꞌi, “Waayaabeeto taane” iye.

¹⁸ Ureyoo ishichiyan: “Wonna no qaabbechinaꞌo, ‘Abeeli katemooch hamiree, ciicoon echebote’ ii beeheete. Ebin tuniyoona mooyon tachii beeheete.

¹⁹ Ta katemee Israꞌeelee showee daggooch diggeenaa gibeneetina tuneti katemeene. Israꞌeelee showee daggooch indee tuneti katemeen aalliiya qaawaabeeto neene. Doono Yeericho tuneton aalliiya ne qaawaabeeto amoyichiye?” iyan.

²⁰ Yoꞌaabiyoo wochiꞌi, “Ebi ta waanee wohe; katemoon tiisho woyee aalliyoo ta waanee wohe!

²¹ No gaboo ebi toonoone. Geppechi Efreemi showee asho, Bikiri bushoo Sheebi taatoo Daawiti toommooch hukkoon tiijjitone. Biin baach beshiiree nooch imbotani, katemeen qayi hammemmo taane” iye. Ureyoo Yoꞌaabich, “Uroochi qello kuxaa xaqqee uxeree toommona neech awureyemmone” iyan.

²² Aroochee ure bi gabiti gaboon yechaꞌa, asheenaꞌo bulli waan hammahan. Boonoshiyoo Bikiri bushoo Sheebichi qettoon kuxxiꞌi, bi qelloon Yoꞌaabich awureheete. Ebina Yoꞌaabi tiroon (waaringoon) huggiye. Boonoshiyoo katemoochee wokkiꞌi shaceheete. Asho bi kexi kexooch wottehe. Yoꞌaabiyoo taatoo waan Yerusaalem wottehe.

Daawiti Iraashiiti Iraasheenaꞌo

²³ Yoꞌaabi Israꞌeelee ginee naayinaꞌo bulli toommooch iraashoone; Yoyaadi bushoo Beenayiyoo taatoochi quyee naayinaꞌo tuneti Kereeteenaꞌonaa Feleeteenaꞌona toommooch iraashoone.

²⁴ Adoraami guunon tuneꞌi maddee beetinaꞌo toommooch iraashoone. Ahiluudi bushoo Yoshafaaxi kiinee koorechone.

²⁵ Sheewi, taatoochi koorechone; Sadooqinaa Abiyataarina qeesheenaꞌone.

²⁶ Wotta Yaꞌiiree asho Iraahi Daawitichi qeesheenaꞌo daggoochee ikkoone.