2 Saameeli 2 - Kafa Linguistics Project

Daawiti Yihudee Taatoo Tuno

¹ Ebiyee gubb Daawiti “Yihudee katemeenaꞌoochee ikkooch hambote?” iꞌi Doono Yeerin echehe. Doono Yeeriyoo “Eeha, hambe” iye. Daawitiyoo “Aabiich hambote?” iye. Doono Yeeriyoo “Kebiroon hambe” iye.

² Ebina Daawiti bi gutte mecheenaꞌona, eboshiyoo Yezireelechi Akinoꞌaminaa Qermeloosechi Naabaali mechee Abigelina tookkii arooch hammiye.

³ Ebiyoommon wotta Daawiti biinna tookkii beeti asheenaꞌo boonoshi kechi asheenaꞌona tookki arooch boonoshi woyemmoyich tuniihe. Boonoshiyoo Kebirooni guudooch beeti gishiishi katemeenaꞌooch koteheete.

⁴ Aroochee Yihudee asheenaꞌo Kebiroon waa, Daawiti shimbooch zayitoon huuttiꞌi, Yihudee asheenaꞌo toommooch taatiiheete. Saaꞌoolin duukkitinaꞌo Gilaadee showooch beeti Yabeeshi asheenaꞌo tunoon Daawiti waayehe.

⁵ Daawiti ebin bi waayehooba, Gilaadee showooch beeti Yabeeshi asheenaꞌo waan wocheyechinaꞌon daachiiꞌi ishichiye: “Ittoshi doono Saaꞌoolich ebi shaahoon gibeneeto ittoshi tunetoyich, bi dubenoonoo ittoshi duukkitoyich, Doono Yeeri ittoshin diiribe.

⁶ Andoo Doono Yeeri bi deꞌittinoonaa bi gibeneyoonon ittoshich bekkiibe. Ebin ittoshi tuniitoyich, tawoo ittoshich deꞌe mooyon tuniyemmo taane.

⁷ Illa maac kuxo tunebote; kupphebote; ittoshi doono Saaꞌooli qititone; Yihudee asheenaꞌo ta shimbooch zayitoon huuttiꞌi boonoshi toommooch taan taatiitinaꞌone” iye.

Ishiboshesi Israꞌeelee Taatoo Tuno

⁸ Arooba Saaꞌoolichi ginee naayinaꞌo iraashoo, Neeri bushoo Abeneeri Saaꞌooli bushoo Ishiboshesin yechii, Yoordaanoosin kimmiꞌi Mahanayim muricciꞌi hammiye.

⁹ Aroochaa Abeneeri Ishiboshesin Gilaadee showooch, Aseeree showooch, Yezireelee showooch, Efreemee showooch, Biiniyaamee showoonaa Israꞌeelee showoo bullinooch taatiihe.

¹⁰ Saaꞌooli bushoo Ishiboshesi Israꞌeelee showooch bi taatehooba bi eeno aabbe natone. Biyoo gutte naton taatehe. Tunebaani Yihudee asheenaꞌo Daawitin dabbiyeete.

¹¹ Daawiti Kebiroon beechii Yihudee yoodeenaꞌo toommooch bi taateto, shabaatte nattaa qatone.

Israꞌeeleenaꞌonaa Yihudee Asheenaꞌonochi Daggooch Tuneti Koyo

¹² Ikke areddoon Neeri bushoo Abeneerinaa Saaꞌooli bushoo Ishiboshesichi naayinaꞌona Mahanayimee tiyiꞌi Gibeꞌoon hammiyeete.

¹³ Aroochee Tseruuyichi bushoo Yoꞌaabinaa Daawitichi naayinaꞌona kechii Gibeꞌoon beeti, ooge aachi oppo beetooch hammiꞌi boonoshina daneheete. Boonoshiyoo aachi oppee okkinaa hachinon tunee ciineeꞌi koteheete.

¹⁴ Aroochee Abeneeri Yoꞌaabin “Ittoshinaa noonna daggoochee gurimaasheenaꞌo tiyiree koyebeete” iye. Yoꞌaabiyoo “Tunebe; tiyiree koyebeete” iye.

¹⁵ Ebina Biiniyaami yoodoonaa Saaꞌooli bushoo Ishiboshesinoyich aaraa gutte asheenaꞌo, wotta Daawitich aaraa gutte asheenaꞌo tunee tiyiꞌi haddeeheete.

¹⁶ Aroochee asheenaꞌo boonoshi ikkikkoona boonoshi ettoon qelloona yechiꞌi naabooch koyaa, boonoshinaa boonoshina yesheꞌi dihiyeete. Ebiichee tiyitona Gibeꞌoon beeti are xaaꞌoo Aci Goraadee Showoo getaa ceekkehe.

¹⁷ Aroochee gino duullii duullii hammiye, Daawitichi asheenaꞌo Abeneerinaa Israꞌeeleenaꞌonon kochii wochiyeete.

¹⁸ Tseruuyichi keejje bushiisheenaꞌo arooch beetinaꞌone. Eboshiyoo Yoꞌaabi, Abishayinaa Asaheelinane. Asaheeliyoo gaddoona woccaabeeti xiixxechoommon afaafinaa woccechone.

¹⁹ Biyoo qanna yoocha getaanoon, Abeneerin yookkii dabbiye.

²⁰ Abeneeriyoo gubb guuddii wotteꞌi, “Asaheelo, ebi neene?” iꞌi echehe. Biyoo “Eeha, taane” iye.

²¹ Abeneeriyoo “Qanne badd woyee yooche badd guudi ikke gurimaashoon yeshiree, bi qiicoon boge” iye. Tunebaani Asaheeli womiꞌi biin dabbiye.

²² Abeneeri wochinnoon biich, “Taan yookkii dabboon qaye; neen ta wuxemmoyich ne qaawaabeeto, amoyichiye? Eechiichi ne manoo Yoꞌaabichi aafoon aabichireeshiye ta ciinnemmo?” iye.

²³ Tunebaani Asaheeli womiꞌi yookkii dabbiye. Ebich Abeneeri ginee guxoona bi maacooch kochiye. Ginoo hottiꞌi gubbaa kechiye. Biyoo dihiꞌi arooch qitiye. Asaheeli qitiꞌi beeti xaaꞌooch shaggiti asho bulli neexee beehe.

²⁴ Tunebaani Yoꞌaabinaa Abishayina Abeneerin yookkii dabbiyeete. Boonoshiyoo yookkiibee Gibeꞌooni barahooch daammiibeeti gommooch, Giyaahi katemoochaa aabi-keyo waan beeti, Aama boonoshi shaggiyee aabe giyahan.

²⁵ Aroochee Biiniyaamee asheenaꞌo Abeneer waan giddee kiceeꞌi geppee cillooch neexeheete.

²⁶ Abeneeriyoo Yoꞌaabin ceeggiꞌi, “Goraado asheenaꞌon bi wuxi aallii beeyemmo bulli yemeenooniye? Ebichi ciiro oogeton caamo bi tunoon ariyaachine? Ne asheenaꞌo boonoshi maneenaꞌon yookkii dabboochee boonoshi wottemmoyich getaanoon ne cikki beeyemmo, aati wottooniye?” iye.

²⁷ Yoꞌaabiyoo “Beeyechi Nuggishoo Yeeri beege; ishin ne getaanegaata, ta asheenaꞌo boonoshi maneenaꞌon yaach maadda beddaahaa yoohi dabbeshinaꞌone” iye.

²⁸ Ebich Yoꞌaabi tiroon huggiye; bi huggimmona, bi asheenaꞌo bulli Israꞌeeleenaꞌon yookkii dabboon qajjiyeete; koyoo ebina neexehe.

²⁹ Abeneerinaa bi asheenaꞌona aroobee xumo bullin Yoordaanoosi bamboona qaxiriyeete; Yoordaanoosinoo kimmiyeete. Aroochee qaxiriibee aabo daggehaa, Mahanayim shaggiyeete.

³⁰ Yoꞌaabiyoo Abeneerin yookkii dabboochee wotteꞌi, bi asheenaꞌon ikkooch kiciye. Daawitichi asheenaꞌo daggoochee, Asaheeli giyaanoon, aaraa yiixiye asheenaꞌo aallo arichehe.

³¹ Tunebaani Daawitichi asheenaꞌo Abeneerichi asheenaꞌoochee keejje ballaa shicha bede Biiniyaameenaꞌon wuxitinaꞌone.

³² Asaheelichi dubenoon tiijjiꞌi, Beetilehem beeti bi nihoochi maashooch duukkiyeete. Aroochee Yoꞌaabinaa bi asheenaꞌona aroobee xumo bullin qaxiriibee, showee harooch Kebiroon shaggiyeete.