2 Saameeli 18 - Kafa Linguistics Project

Abisoloomi Qitoo

¹ Aroochee Daawiti biinna tookkii beeti asheenaꞌon kiciye. Boonoshi toommoochoo humee iraasheenaꞌonaa ballee iraasheenaꞌonon iraashiihe.

² Daawiti bi ginee naayinaꞌon keejj beera qoodiye. Keejje beereexi ikkoon Yoꞌaabi kishooch, andoo keejje beereexi ikkoon Yoꞌaabi manoo, Tseruuyi bushoo Abishayi kishooch, wotta echeti keejje beereexi ikkoon Gaati katemee asho Itayi kishooch tuniihe. Taatoo boonoshich “Ta qelloona ta, ittoshina tookki hammemmo taane” iye.

³ Tunebaani asheenaꞌo ishichiyeete: “Ne, noonna tookki hamaachine. Gubb wottaꞌa no wocigaata, ebi boonoshich aaxxaani mooyone; no daggoochee qachi bede asholla qitigaata, ebiyoo boonoshich aaxxaani mooyone. Tunebaani ne no daggeexi aashire hume ashoyee besho neene. Ebich katemooch tuneechi nooch qaawiimmi mooyona baach noon ne gaachegaata gaawiye” iyeete.

⁴ Taatoo boonoshich wochiꞌi, “Gaaweto tuneꞌi ittoshich bekketon tuniyemmo taane” iye. Ebina taatoo uxeree kellee gaꞌooch neexee bi beetaa, asheenaꞌo bulli balloonaa humoona tuneꞌi yaaroona qaxiriyeete.

⁵ Taatoo, Yoꞌaabich, Abishayinaa Itayinoyich “Taacha getiree, ta bushoo Abisoloomi toommooch gonde mooyon tuniyaahote” iꞌi gettiye. Taatoo ginee iraasheenaꞌoyich gettiti ebi mooyon ginee naayinaꞌo bulli waayeheete.

⁶ Ebina Daawitichi ginee naayinaꞌo Israꞌeeleenaꞌon kocha gaddooch kechiyeete. Ginoo Efreemee shaaroochaa (kubboochaa) koyeehe.

⁷ Daawitichi ginee naayinaꞌo Israꞌeeleenaꞌon kochii wochiyeete. Arooba oogeton shattiiti qitii ciiro tunehe; hiye hume asheenaꞌoo qitiyeete.

⁸ Ginee naayinaꞌo showoo bulliich shaceꞌi koyeheete; goraadoona koyaa qititinaꞌoyee beshe asheenaꞌon shaaroo (kubbo) maahe.

⁹ Areegaata, Abisoloomi Daawitichi naayinaꞌona tookkii diqqoona danehe. Biyoo biceroon yebbeꞌi hammii bi beetaa, bi yebbeti biceroo wodde kacechi ooge michi dechaa besheya hammiye. Abisoloomi qello are michi kacooch yechehe. Bi yebbeti biceroo beshee hammimmona, aroo showoonaa shimaayoonochi gutte daggooch yeendereꞌi echehe.

¹⁰ Ikke uro biin beeggiꞌi, hammii Yoꞌaabich, “Abisoloomi ikke michi kacooch yeendereꞌi beeton beeggeto taane” iye.

¹¹ Yoꞌaabi ebin biich gettiti uroyich wochiꞌi, “Ama inne! Ne beeggeto gaata, amoyich bekkech showoon maanjaachine? Ebin ne tuniito gaata, aashire sheqeelee birewoonaa shimetee cuyee shachoonon neech immesho taane” iye.

¹² Tunebaani uro wochiꞌi Yoꞌaabich ishichiye: “Balle kishoon ebiyee beshiti birewoon taach ne immemmo gaatoona, taatoochi bushoo toommooch ta kishoon tiijjaache; ebiyoo no waayaa beetaa taatoo neech, Abishayinaa Itayinoyich ‘Ta bushoo Abisoloomi toommooch koniyoona gonde mooyon bi tuniyaachemmoyich quyebote’ bi itoyichiye.

¹³ Ebiyeenoo wotta, taatoochi getoon waayeyaache iyaa qajjaꞌa, Abisoloomi toommooch gondoon ta shuunemmo gaata, taatoo waanee aasheebeeti mooyo aallo bi tunetoyich, ne qelloona ne, taan gaacheyaanoon ta waanee wokkesho neene” iye.

¹⁴ Yoꞌaabiyoo uroyich “Ta ebi mooyon neenna tookki ebiyee beshoon yibbaata beetaache” iichii, keejje ginoon yechiꞌi hammii, andoo Abisoloomi mixooch yeendereꞌi kashoona bi beetaa, bi mullee kaamooch kochiye.

¹⁵ Yoꞌaabichi quyee naayinaꞌo tuneti aashire gurimaasheenaꞌo Abisoloomin giichiꞌi kochii wuxiyeete.

^16-17 Arooba Israꞌeeleenaꞌo bulli wocee aalleꞌi, boonoshi kexooch hammiyeete. Aroochee Yoꞌaabi koyo neexemmoyich tiroon bi hukkiitaa, ginee naayinaꞌo Israꞌeeleenaꞌon yookkii dabboon qajjiꞌi wotteheete. Boonoshiyoo Abisoloomi dubenoon shaaree (kubee) daggooch beeti, ikke ooge oppooch daammii duppiichii, xaqqoon bi toommooch gutiyeete.

¹⁸ Abisoloomi, “Ta shigoon ceekkiyemmi bushoo taach aalloone” iꞌi, batt kashoona beechii, bi shalligeyemmi haawulitoon Taatee Bambooch, bi qellich shuuniitone. Ebi haawulitoon bi shigoona bi ceekkitoyich, hanaach beddaahaa Abisoloomi Haawulito getaa ceekkee beetone.

Abisoloomi Qitoon Daawiti Waayo

¹⁹ Areegaata, Sadooqi bushoo Ahimaazi, “Doono Yeeri bi etteenaꞌo kishoochee biin bi wodiyee woroon woci hamiree, taatoyich getona” iye.

²⁰ Tunebaani Yoꞌaabi “Taatoo waan woroon yeshiree hanaach ne hamaachine. Taatoo bushoo qititoyich, hanaach ebin ne tuniyemmoyich neech daaggaache; bare aaboon ebin tuniyoon hakkihine” iye.

²¹ Aroochee Yoꞌaabi Topphiyee ashoon ceeggiꞌi, “Hamiree ebi ne beeggeton taatoyich gete” iye. Biyoo Yoꞌaabi aafoochaa showooch guufeechii, tiyiꞌi wocciye.

²² Sadooqi bushoo Ahimaazi wochinnoon Yoꞌaabich, “Amolla tunebe; hini Topphiyee ashoon dabbiree ta woccemmoyich baach daaggibe” iꞌi qollehe. Yoꞌaabiyoo wochiꞌi, “Ta bushoocho, ebin tuniyoyich amoyich qaawinne? Ebi woroon getona ne danemmi gaaco aalloone” iye.

²³ Biyoo wochiꞌi, “Amolla tuneba hami gettemmo taane” iye. Yoꞌaabiyoo “Ishigaata, hambe” iye. Ebina Ahimaazi Yoordaanoosi bambooch beeti gommona wocciꞌi, Topphiyee ashoyee shiichiye.

²⁴ Areegaata, Daawiti uxeree kellooch beeti maaci kelloonaa maachi kelloonochi gutte daggooch koteꞌi beehe. Qayecho kellee kaamooch beeti uxeree toommooch kechiye. Biyoo kaachii ciinniꞌi, bi ikkeeto woccii waabeeti uroon beeggiye.

²⁵ Are qayecho ebin ceeggiꞌi taatoyich gettiye. Taatoo “Bi ikkeeto bi tunegaata, woroon yechiꞌi waabeeto bi tuno arichetone” iye. Uroo katinnii katinnii waahe.

²⁶ Aroochee qayecho woccii waabeeti bare uroon beeggiꞌi, kellechon ceeggiꞌi, “Wotta bare uro bi ikkeeto woccii waa beetone” iye. Taatoo “Biyoo woroon yechiꞌi waabeeto bi tuno arichetone” iye.

²⁷ Qayecho wochiꞌi, “Aafichochi woco taach bi shaahiibeeto, Sadooqi bushoo Ahimaazichi wocoommoniye” iye. Taatoo “Aroo gaawe ashoone; gaawe woroon yeshi woyemmone” iye.

²⁸ Ahimaaziyoo taatoo waan cookiibee, “Mooyo bulli kaametone” iye. Aroochee baroona showooch guufeechii ishichiye: “Taatoo ta doono toommooch tiyiti asheenaꞌon beshiiꞌi immiti, ne Nuggishoo Doono Yeeri galleteebe” iye.

²⁹ Taatoo “Ta bushoo Abisoloomi diggeebeete?” iye. Ahimaaziyoo wochiꞌi, “Yoꞌaabi Topphiyee asho tuneti ne guunonaa taannon bi wochee beegaata, bi beetoochaa oogeti dulloon beeggeto taane. Tunebaani amo tuneto gaata, ta ariyaano taane” iye.

³⁰ Taatoo “Okk ebiich besheree neexebe” iye. Ebina biyoo ikke badd besheꞌi neexehe.

³¹ Aroochee Topphiyee asho waa shaggiye; biyoo ishichiye: “Mishiraachoon taatoo ta doonoyich yechaa waato taane. Doono Yeeri hanaach ne toommooch tiyitinaꞌo kishoochee neen wodiitone” iye.

³² Taatoo, Topphiyee ashoon “Ta bushoo Abisoloomi diggeebeete?” iꞌi echehe. Biyoo wochiꞌi, “Taatoo ta doonochi etteenaꞌonaa ne toommooch gonde mooyon tuniiya tiyii beetinaꞌona are ne bushoommon tunebeete” iye.

³³ Taatoo oogeton ayiniye. Uxeree kellee toommooch beeti kexooch kechiꞌi, aroochaa eeppiye. Biyoo hammiibee, “Ta bushoo Abisoloomo, ta bushoocho, ta bushoo Abisoloomo, ne qoodoon ta qitito gaata amo beete! Abisoloomo, ta bushoocho, ta bushoocho!” iibee eeppiye.