2 Saameeli 17 - Kafa Linguistics Project

Hushayi Abisoloomich Gondoon Boyo

¹ Andoo daakkiꞌi Akixofeeli Abisoloomich ishichiye: “Aaraa gutte hume asheenaꞌon kaaciree, mayi xum Daawitin yoohi dabbibone.

² Biyoo taahi, bi mochoo nirere bi beetaa, dane kochemmo taane. Biinoo keqqichemmo taane. Biinna tookkii beeti bi asheenaꞌo bulliyoo woce aallemminaꞌone. Taatoon baach wuxemmo taane.

³ Woꞌee bi keno waan bi wottoommon, asheenaꞌo bullin ne waan wochemmo taane. Ne qaawaabeeto ikke ashi qitoon baach bi tunetoyich, asheenaꞌo bulli diggoo tunemminaꞌone” iye.

⁴ Ebi Akixofeeli boyeti boyo Abisoloominaa Israꞌeelee geeneenaꞌo bullinon emirikkiye.

⁵ Aroochee Abisoloomi, “Eke Arikee asho Hushayin ittoshi ceegaa bi gettimmon waayebone” iye.

⁶ Hushayi bi waan waammona Abisoloomi biich, “Akixofeeli nooch boyeti boyo ebine. Ebi bi boyeton tuniibona? Ebi tuno qayigaata, eke ne no tuniyemmon nooch gete” iye.

⁷ Hushayiyoo Abisoloomich ishichiye: “And Akixofeeli boyeti boyo gaaweto toonoone.

⁸ Ne aabbinaa bi asheenaꞌona ginee anaaminaꞌo boonoshi tunoon, wotta bi bushiishoon bokketi diibechoommon oogeton ippetinaꞌo boonoshi tunoon ariyaabeeto neene. Ebiyeenoo wotta ne nihoo koyee ariyechone. Xumoon asheenaꞌona tookki qeyaachemmone.

⁹ Ebi goora andona, ikke oppooch woyee ikke bare xaaꞌooch aashe beeyemmone. Shiichiꞌi no ginee naayinaꞌo daggoochee ikkikkeenaꞌo qitigaata, ebin waayeto koniyoona, ‘Abisoloomin dabbiti asho qitii ciirete’ gettemmone.

¹⁰ Ne nihoo giidechi koyecho, wotta biinna tookkii beetinaꞌo ginee anaaminaꞌo boonoshi tunoon Israꞌeeleenaꞌo bulli boonoshi arii beetoyich, ginee anaamo tuneti, daaheree mulloommi mullechi shataani asheenaꞌona keqqoona boonoshi mullo muujjemmone.

¹¹ “Ebich ta boyemmo ebiniye: Daanee Beershaab beddaahaa beeti, baharee gasheexi qacoommon woddeti Israꞌeeleenaꞌo bulli ne waan kiceebeete. Ne qelloona newoo, boonoshina tookki koyooch hambe.

¹² Daawiti beemmi xaaꞌoo aabiichona shagiree, biin kochemmo noone. Doshoo (caagibano) showooch kindoommon, bi toommooch kindemmo noone. Biyoo tuneba biinna tookkii beeti asheenaꞌo, boonoshi daggoochee ikkolla echeyaachemmone.

¹³ Xaqqee uxerechi katemooch bi giyi gaatoona, no asheenaꞌo bulli woderoon deebiree are katemoon bambooch geechi kindiyemminaꞌone. Ikke xaqqoona arooch echeyaachemmone” iye.

¹⁴ Aroochee Abisoloominaa Israꞌeeleenaꞌo bullina, “Akixofeeli boyeti boyoyee, Arikee asho Hushayi boyeto gaawiye” iyeete. Doono Yeeri Abisoloomi toommooch gonde mooyon tuniiya iꞌi gaaweto tuneti Akixofeeli boyo waayeyaachemmon tuniihe.

Abisoloomi Gabiti Gaboon Ariiꞌi Daawiti Murico

¹⁵ Hushayiyoo qeesheenaꞌo tuneti Sadooqinaa Abiyataarinoyich ishichiye: “Akixofeeli Abisoloominaa Israꞌeelee geeneenaꞌonoyich ebinaa ebinon boyetone. Tunebaani ta wotta ebinaa ebinon boyeto taane.

¹⁶ Ebich and kaate Daawitich wocheree, ‘Kaateree kimbani, amolla tunetaa barahooch beeti aachi kimooch qeyaahine. Ebi tuno qayigaata, neennaa neenna tookkii beeti asheenaꞌo bullinon ciroona aalliyemminaꞌone’ getote” iye.

¹⁷ Areegaata, Yonaataaninaa Ahimaazina katemooch giyiree boonoshi bekkeyaachemmoyich, Yerusaalemiyee maach wokkiꞌi beeti, En Rogeel quyee beeheete. Tuneti mooyo bullin ikke gonnee hammaa boonoshich gettaa beehan. Boonoshiyoo hammii taatoo Daawitich gettii beeheete.

¹⁸ Tunebaani ikke bushoo ebin beeggiꞌi, hammii Abisoloomich gettiye. Ebich boonoshi guttiyoo afaafinoona tiyii Bahuriim beeti ikke uroo kexooch hammiyeete. Ebi uroyich, bi kechi gaꞌooch aachi oppo beetone. Boonoshiyoo are oppooch giyiyeete.

¹⁹ Uroochi mechee yeebboon daammaa are oppee kellooch yaggiꞌa, bi toommooch maayoon ichiyan. Ebich ebin koniyoona ariyaanoone.

²⁰ Abisoloomi asheenaꞌo ure waan, are kexooch waaꞌi, “Ahimaazinaa Yonaataanina aayeete?” iꞌi echeheete. Ureyoo boonoshich wochaꞌa, “Aacon kimmiꞌi hammitinaꞌone” iyan. Boonoshiyoo qaawii mucceꞌi Yerusaalem wotteheete.

²¹ Asheenaꞌo hammitoyee gubb, Ahimaazinaa Yonaataanina oppoochee kechii hammiꞌi, mooyo bullin taatoo Daawitich gettiyeete. Boonoshiyoo biich “Akixofeeli ne toommooch ebinaa ebinon koccitone; kaate tiyiree aacon kimbe” iyeete.

²² Ebina Daawitinaa biinna tookkii beeti asheenaꞌo bullina tiyiꞌi, Yoordaanoosi aacon kimmiyeete. Showoo harimmi wottoon, asho bulli ikkolla echeyaanoon, Yoordaanoosi aacon kimmitone.

²³ Akixofeeli bi boyeti boyoon Abisoloomi tuniyaanoon qayon beeggiꞌi, bi kuree toommooch koroon haxxiꞌi tiyii, bi kexo beeti bi beeyi katemooch hammiye; mooyo bullin tachiichii, yoodee qitiye. Biyoo bi nihoochi maashooch duukkehe.

²⁴ Abisoloomi Israꞌeeleenaꞌo bullina tookkii Yoordaanoosi aacon kimmiye. Areegaata, Daawiti Mahanayimi katemooch shaggitone.

²⁵ Abisoloomi Yoꞌaabi qoodoon Amaasin ginee naayinaꞌo toommooch iraashiihe. Amaasiyoo Israꞌeelee asho tuneti Yeteeri bushoone. Bi indeyoo Nahaashi bushee, Yoꞌaabichi indee Tseruuyichi manee tuneti Abigeline.

²⁶ Abisoloominaa biinna tookkii beeti Israꞌeelee ginee naayinaꞌona Gilaadee showooch kaamboon geddiꞌi koteheete.

²⁷ Daawiti Mahanayimi bi shaggimmona Amoonee showooch beeti Raabi katemee asho, Nahaashi bushoo Shoobi, Lodebaari katemee asho, Ameli bushoo Makirinaa Gilaadee showooch beeti Rogelimi katemee asho Barizilayina biinna daneheete.

²⁸ Boonoshiyoo yeebboonaa tahetaa qeyeyemmi tahoonon, quppe saanoon, nuuqqoochee shuuneeti qiiceenaꞌon, teepphoon, sheqoon, buddinoon, bungee gaawoon, aatoon, michiyoon,

²⁹ eeyon, gurimoon, mookoon, bagoonoo Daawitinaa bi asheenaꞌona maayemmoyich deebiyeete. Boonoshiyoo ebin boonoshi deebito, “Asheenaꞌo barahoochaa shaacee shacheweꞌi mandaachetinaꞌone” iꞌiniye.