2 Saameeli 16 - Kafa Linguistics Project

Siibi Maayoonaa Uyoonon Daawitich Deebo

¹ Daawiti are geppee cilloochee giishechoon bi beshemmona, Mefibosheti naayo tuneti Siibi gutte balle koshon, ikke balle nuuphi shuuqqiti woyinee aafoon, ikke balle michi aafoonaa ikke mollexxee woyinee uyoonon gutte kuroona xaaniꞌi waabee, biinna danehe.

² Taatoo Daawiti Siibin, “Eboshin ne deebeto, aakkiyane?” iye. Siibiyoo wochiꞌi, “Kureenaꞌon taatoochi kechi asheenaꞌo yebbemmoyichiye; koshonaa michi aafoonon gurimaasheenaꞌo maayemmoyichiye; wotta woyinee uyoon barahoochaa maraatemminaꞌo uchemmoyichiye” iye.

³ Aroochee taatoo, “Ne doonochi bushoo Mefibosheti, aabiichiye bi beeto?” iꞌi echehe. Siibiyoo taatoyich wochiꞌi, “ ‘Israꞌeeleenaꞌo ta nihinihoochi taatittinoon taach hanaachi wochemminaꞌone’ ii gabiꞌi Yerusaalemiye bi beeto” iye.

⁴ Aroochee taatoo Siibich, “Illa ebiyee damba Mefibosheticho tuneto bulli neechone” iye. Siibiyoo “Ne aafooch dihaa goyinnoye; taatoo ta doonocho, ne aafoochaa gidoon daneton tunebone” iye.

Shimeꞌi Taatoo Daawitin Ufo

⁵ Taatoo Daawiti Bahuriimi katemooch bi shaggimmona, Saaꞌoolichi xibeenaꞌoochee ikkoo tuneti, Geeri bushoo Shimeꞌi biinna danehe; biyoo Daawitin kuxaanoon uppiibee waa beehe.

⁶ Taatoochi guudoona asheenaꞌo bullinaa biin quyechi bi naayinaꞌo bullina beetaanona, Shimeꞌi taatoo Daawitinaa bi naayinaꞌona waan xaqqoon awurehe.

⁷ Biyoo uppiibee, “Hiniichee aallebe; hiniichee aallebe; hini damee ashoocho! Gaacaalli uroocho!

⁸ Bi taatittinoon ne deqqeti Saaꞌooli kechi asheenaꞌochi damoon Doono Yeeri ne toommooch wochitone. Doono Yeeri taatittinoon ne bushoo Abisoloomi kishooch beshiiꞌi immitone. Damee asho ne tunetoyich, ne aallo batt shaggitone” iye.

⁹ Areegaata, Tseruuyi bushoo Abishayi taatoyich, “Hini qititi kunaanoo taatoo ta doonon bi uppemmo, amoyichiye? Bi beetooch besheree bi qettoon kuxona” iye.

¹⁰ Tunebaani taatoo ishichiye: “Tseruuyi bushiisheenaꞌote, ebiich ittoshin geddemmi mooyo beete? Doono Yeeri, ‘Daawitin ufe’ getaa uppiibeeto bi tunegaata, biin ‘Ebin amoyich tuniinne?’ geton hakkemmo, konine?” iye.

¹¹ Aroochee Daawiti Abishayinaa bi naayinaꞌo bullinoyich ishichiye: “Ta hajjee bushoo ebiyoche taan wuxiya qaawii beetone. Ishigaata, hini Biiniyaamee yoodo tuneti uro, ebin bi tuniyoo worganikkeshone? Doono Yeeri bi uppemmoyich bi tuniitoyich, ittoshi qayaa ufe.

¹² Diqqich Doono Yeeri ta xuuxoon beegiree, ebi ufon hanaach taach deꞌoona wochemmo tunemmone” iye.

¹³ Aroochee Daawitinaa bi asheenaꞌona gommon qaxiriyeete; Shimeꞌiyoo geppee gaadoona tatooch hammiibee uppii, xaqqoonaa buttoonon boonoshi waan duppii beehe.

¹⁴ Taatoonaa biinna tookkii beeti asheenaꞌona maraateꞌi are aachi kimooch shaggiyeete; ebich arooch kasheheete.

Akixofeeli Abisoloomich Boyeti Boyo

¹⁵ Abisoloominaa biinna tookkii beeti Israꞌeeleenaꞌo bullina Yerusaalem waaheete; Akixofeeliyoo biinna tookkii beetone.

¹⁶ Daawitichi boyechi, Arikee asho Hushayi Abisoloom waan waahe. Biyoo Abisoloomin “Taatoocho, ne eeno genjebe; ne eeno genjebe” iye.

¹⁷ Abisoloomiyoo Hushayin “Ne shunechoyich ne gibeneyoo, ebine? Amoyich ne shunechona tookkaa hamaachine?” iye.

¹⁸ Hushayi Abisoloomich wochiꞌi ishichiye: “Ebi toonoone; Doono Yeeri, hini asheenaꞌonaa Israꞌeeleenaꞌo bullina kaaccitoyichiye ta tunemmo; biinna tookkishoo beeyemmo taane.

¹⁹ Ebiyeenoo wotta, ta doonochi bushoyich maddaanoon, konichiye ta maddemmo? Ne nihooch ta maddoommon neech maddemmo taane” iye.

²⁰ Aroochee Abisoloomi Akixofeelin, “Eke boyebote; amoon tuniibona?” iye.

²¹ Akixofeeliyoo Abisoloomich ishichiye: “Taatee kexon boonoshi quyemmoyich echiichii bi hammiti, ne nihoochi naamacheenaꞌo waan giyiree boonoshin qebe. Ebina ne nihoona tookkaa ciroona kuxeto ne tunoon Israꞌeeleenaꞌo bulli waayemminaꞌone. Neenna tookkii beeti asheenaꞌochi mochoo kupphemmone” iye.

²² Asheenaꞌo Abisoloomich taatee kechi toommooch duukkaanoon xogiyeete. Israꞌeeleenaꞌo bulli ciinnii beetaa, Abisoloomi arooch giyiꞌi bi nihoochi naamacheenaꞌon qeyiye.

²³ Aroobee yemeenooch, Akixofeeli boyeebeeti boyo bi waayeebeeto, Yeerichi qaaroon waayoommoniye. Ebiyoommon Daawitinaa Abisoloomina Akixofeeli boyoon waayee beeheete.