2 Saameeli 15 - Kafa Linguistics Project

Abisoloomi Daawitichi Taatittinoon Deqqa Tuniiti Mooyo

¹ Ebiyee gubb Abisoloomi gaarin, haresheenaꞌon, wotta biyee shiichi aaf woccemmi aache asheenaꞌonoo qanniihe.

² Biyoo maaddi maaddoona tiyiꞌi, katemee kellooch daammiibeeti gommooch neexee beehe. Asho koniyoona bi taggoon taatoyich giddiiya bi waammona, Abisoloomi biin ceeggiꞌi, aabekkee bi waato gaata echee beehe. Uro Israꞌeeleenaꞌo daggoochee koni yoodo gaata bi tunoon bi gettimmona,

³ Abisoloomi biich wochiꞌi, “Ebeege; ne mooyo kaamoonaa tatoonane; tunebaani ne mooyon bi waayemmoyich taatoo kotiiti asho koniyoona aalloone” ii beehe.

⁴ Biyoo daakkiꞌi ishichii beehe: “Hini showee toommooch abo nallecho tunebota! Taggoo woyee mooyo biich beeti asho koniyoona ta waan bi waataa, biich dayinnetoona nallesho taane” ii beehe.

⁵ Asho koniyoona biich goyinneya bi waan giddemmona, Abisoloomi bi kishoon yaggii yechiꞌi shummii beehe.

⁶ Biyoo taatoo waan taggoyich waabeeti Israꞌeelee asho bullich ebin tunii beehe. Ebina Israꞌeeleenaꞌo mulloon bi waan wochiye.

⁷ Awudde natoyee gubb, Abisoloomi taatoyich ishichiye: “Doono Yeerich ta mookketi mookkoon Kebiroon hamiree ta ceechemmoyich, taach daaggibe.

⁸ Ne guuno ta, Sooriyee showooch, Geshuur beechaa, ‘Iberoon Doono Yeeri taan Yerusaalem wochiꞌi bi deebigaata, Kebiroonaa biich goyinnemmo taane’ iyaꞌa mookketo taane” iye.

⁹ Taatoo biin, “Diggoona hambe” iye. Ebina Abisoloomi tiyiꞌi Kebiroon hammiye.

¹⁰ Areegaata, Abisoloomi “Shametee qaaroon ittoshi waayegaata, ‘Abisoloomi Kebiroonaa taatete’ getiree cookibote” gettemmi wocheyechinaꞌon Israꞌeelee yoodeenaꞌo bulli waan aashoona daachiihe.

¹¹ Biyoo Yerusaalemee gutte balle asheenaꞌon biinna tookki boonoshi hammemmoyich ataalliye. Boonoshiyoo tuneebeeti mooyon amoonolla ariyaanoon, diqqoona tiyii hammiyeete.

¹² Abisoloomi deejjoon giddiibee, Daawitin ciicciibeeti asheenaꞌo daggoochee ikkoo tuneti Akixofeelin bi katemoo Giloonee bi woyemmoyich wochehe. Taatoo toommooch boonoshi koceeti koceyoo manjii manjii hammiye. Abisoloomin dabbiibeeti asheenaꞌoo meettii meettii hammiyeete.

Daawiti Yerusaalemee Kechiꞌi Aasho

¹³ Wocheyecho Daawit waan waaꞌi, “Israꞌeeleenaꞌo mullo Abisoloom waan wottetone” iye.

¹⁴ Ebich Daawiti biinna tookkii Yerusaalem beeti bi naayinaꞌo bullich ishichiye: “Ittoshi tiyaa muricone. Ebi tuno qayigaata, no daggoochee, Abisoloomi kishoochee muricon hakkemmo koniyoona aalloone. Kaateree hiniichee keyone. Eechoo no qayigaata, afaafinoona waa noon yeshiree, no toommooch gonde mooyon tuniyemmone. Hini katemeexi asheenaꞌonoo wuxi aalliyemmone” iye.

¹⁵ Taatoochi naayinaꞌo biich “Taatoo no doono ne shunnemmon tuniyoyich, ebiyoche qannito noone” iyeete.

¹⁶ Ebina taatoo kechii qaxiriye; bi taatee kexon quyiyoyich bi echiiti aashire bi naamacheenaꞌo baach echeechaa, bi kechi asheenaꞌo bulli bi hillooch dabbiyeete.

¹⁷ Taatoo kechii qaxiraa, asheenaꞌo bulli bi hillooch dabbiyeete. Boonoshiyoo katemee ciirooch beeti ikke kechi gaꞌooch neexeheete.

¹⁸ Bi naayinaꞌo bulli bi aafoona besheheete; taatoochi quyee naayinaꞌo tuneti Kereeteenaꞌo bullinaa Feleeteenaꞌo bullina, wotta Gaatee biin dabbiꞌi waati shiritte balle asheenaꞌo bi aafoona besheheete.

¹⁹ Gaati katemee asho Itayich taatoo ishichiye: “Noonna tookkaa ne hammaabeeto amoyichiye? Ne showoyee maach beeti iibboonaa shiqqoona ne tunetoyich, wotteree taatoo Abisoloomina tookki kotebe.

²⁰ Yiich waati neen, amoyich hanaach noonna tookki ne yallyallimemmoyich tuniibote? Amooch ta hammaabeeto gaatoona ariyaano taane. Illa and ne asheenaꞌon yeshiree wottebe. Doono Yeeri neech bi deꞌittinoonaa bi gibeneyoonon bekkiibe” iye.

²¹ Tunebaani Itayi taatoyich wochiꞌi, “Beeyechi Doono Yeeri beege! Wotta ta doono ne kashoona wogehoye; qitoo tuneba wodoo, taatoo ta doono ne tunemmo aabiichona, ta ne guuno arooch tunemmo taane” iye.

²² Daawitiyoo Itayin, “Ishigaata hambe; beshebe” iye. Ebina Gaati katemee asho Itayi bi asheenaꞌo bullinaa biinna tookkii beeti bi kechi asheenaꞌo bullinon yechiꞌi beshehe.

²³ Asheenaꞌo beshee beetaa, are showee asho bulli eefehe. Taatoo Qedirooni aachi qaaꞌoon kimmiye. Asheenaꞌo bulliyoo kimmiꞌi, barahoo beeto waan hammiyeete.

²⁴ Qeesheenaꞌo tuneti Sadooqinaa Abiyataarina wotta arooch beetinaꞌone. Lewi yoodoochee ikkikkeenaꞌo Yeerichi wogee taabootoon shaaggiꞌi arooch beetinaꞌone. Boonoshiyoo Yeerichi taabootoon kindii kotiiheete; asheenaꞌo bulli katemoochee kechii boonoshi ciiremmi wottoon, wochinnoon tiijjaaneenaꞌone.

²⁵ Taatoo, Sadooqich ishichiye: “Yeerichi taabootoon katemooch wochi daambe. Doono Yeeri aafoochaa gidoon daneto ta tunegaata, bi taan wochi deebiree, taabootoonaa bi qeyi kexonon wochinnoon ta beeggemmoyich tuniyemmone.

²⁶ Tunebaani taanna emiraano bi tunegaata, biich gaaweto tuneꞌi bekketon tuniibe; tawoo ebin deꞌoyich qannito taane” iye.

²⁷ Taatoo daakkiꞌi Sadooqich ishichiye: “Illa mooyon beeggaabeeto neene. Ne bushoo Ahimaazinaa Abiyataari bushoo Yonaataaninon yeshiree katemooch diggoona wottebe; neennaa Abiyataarina gutte ittoshi bushiishoon yeshiree hambote.

²⁸ Tawoo ittoshi waanee wocho waammi wottoon barahooch beshiibeeti aachi kimooch quye beeyemmo taane” iye.

²⁹ Ebich Sadooqinaa Abiyataarina Yeerichi taabootoon Yerusaalem wochiyeete; boonoshiyoo arooch koteheete.

³⁰ Daawitiyoo eeppiibee, Zayitee Michi guudon kaama kechiye. Biyoo ayinito bi tunoon bekkiyoyich baade baatoon tuneꞌi, wotta tahoon bi qellooch ukeꞌi hammiye. Biin dabbii beetinaꞌo ebiyoommon wotta tahoon boonoshi qellooch ukeꞌi eeppiibee kaama kechiyeete.

³¹ Akixofeeli Abisoloomina tookkii koceetinaꞌo daggoochee ikkoo bi tuno Daawitich getteehe. Daawitiyoo “Doono Yeero, Akixofeeli boyoon duubo ne tuniyemmoyich neen qollehoye” iꞌi corootiye.

³² Daawitiyoo geppee toommooch beeti, Yeerich goyinnee xaaꞌooch bi shaggaahaa, Arikee asho Hushayi bi tahoon keexxiꞌi, bi shimboochoo buttoon shakkiꞌi biinna daneya waahe.

³³ Daawiti biich ishichiye: “Taanna tookkaa ne hamigaata, taach shaagooniye ne tunemmo.

³⁴ Tunebaani katemooch wotteree, Abisoloomin ‘Taatoocho, ebiyee aaf ne nihoochi naayo ta tunetoommon neech naayo tunemmo taane’ ne getigaata, Akixofeeli boyoon duuboon tuniyemmo neene.

³⁵ Qeesheenaꞌo Sadooqinaa Abiyataarina arooch neenna tookki tunemminaꞌone. Taatoo kexoochee ne waayemmi amee mooyonona, boonoshich gete.

³⁶ Boonoshi gutte bushiisheenaꞌo, eboshiyoo Sadooqi bushoo Ahimaazinaa Abiyataari bushoo Yonaataanina boonoshina tookkii arooch beetinaꞌone. Ne waayemmi mooyo bullin boonoshina taach wochebe” iye.

³⁷ Ebina Abisoloomi Yerusaalem bi shaggaahaa, Daawitichi boyecho tuneti Hushayi katemooch waahe.