2 Saameeli 14 - Kafa Linguistics Project

Abisoloomi Yerusaalem Wotto

¹ Tseruuyi bushoo Yoꞌaabi Daawiti Abisoloomin wochii wochii shalligiibeeto bi tunoon ariihe.

² Ebina Yoꞌaabi Teqoꞌa wocheꞌi, mullechi ikke ure aroochee bi woyemmoyich tuniihe. Biichoo ishichiye: “Muushenetin shaahiree, muushenee tahoon tahebe; huutoonoo huuteyaahine. Qititi bi xiboyich meeti aaboon muusheneti ureen shaahi bekkebe.

³ Aroochee taatoo waan hamiree, ebin taatoyich gete” iꞌi, bi gettemmi mooyon ureyich gettiye.

⁴ Ureyoo taatoo waan hammaꞌa, biich oogoon imoyich baroona showooch guufahan. Biyoo “Taatoocho, taan gaachebe” iyan.

⁵ Taatoo “Amoone ne iritoo?” iꞌi echehe. Biyoo ishichiyan: “Ta xuume ure taane. Ta keno qititone.

⁶ Ta ne gonneyich gutte anaami bushiisheenaꞌo beeheete. Boonoshiyoo ikke areddoon gaddoochaa yexeheete. Boonoshin shoobbemmo koniyoona arooch aallo bi tunetoyich, ikkoo baroon xoobbii wuxiye.

⁷ Ebina no xibeenaꞌo bulli ne gonnee ta toommooch tiyiꞌi, ‘Bi nihoo hajjito bullin woraashemmo bi tunetaanoona, bi manoon wuxiti ne bushoon nooch ne deebaa, bi manoon bi wuxitoyich biin wuxibone’ iyeete. Ebin boonoshi tuniigaata, bushaalle tunemmi taane. Boonoshiyoo ta gibeno tuneti, echeti ta bushoon wuxiree, ta kenoochi yoodoon kuxona bi shigoon showee toommoochee aalliyemminaꞌone” iyan.

⁸ Aroochee taatoo ureen “Ne kexooch wottebe; ta, ta qelloona ne mooyon tachemmo taane” iye.

⁹ Ureyoo “Taatoo ta doonocho, axaaxoo taannaa ta nihoochi kechi asheenaꞌonochi toommooch tunebe; neennaa ne taatittinoona xalloo tunebe” iyan.

¹⁰ Taatoo biich wochiꞌi, “Gonde mooyo amoonolla neech gettimmi asho bi beegaata, ta waan deebe; biyoo guttinnoon ne achooch shagaachemmone” iye.

¹¹ Aroochee ure, “Qititi ta bushoochi nichoon kichecho ta bushoon wuxiree bi aalliyaachemmoyich, ne Nuggishoo Doono Yeerina wogebe” iyan. Daawitiyoo wochiꞌi, “Beeyechi Doono Yeeri beege! Ne bushoochi qelli eexoochee ikkeyona showooch hollaachemmine” iye.

¹² Aroochee ure, “Ne gonnee ta, ikke mooyin baach taatoo ta doono neech ta gettemmoyich qollehoye” iyan. Biyoo “Gete” iye.

¹³ Ureyoo biich ishichiyan: “Ebiyoommi mooyon Yeerichi asheenaꞌo toommooch ne tuniito amoyichiye? Ne bushoo bi maxxetoochee wotte bi woyemmoyich tuniyoon ne qajjetoyich, ebi ne getteti mooyona ne toommooch nallito neene.

¹⁴ No bulli qitecho noone; wochii uubon hakkeyaani, showooch ufeti aacoommo noone. Yeeri ashi kasho aallemmoyich qaawaache. Ebiyee aalleti asho bi waanee wohiree bi beetaachemmoyich, biich gommon qaawiye.

¹⁵ “Andoo hiniich ta waato, asheenaꞌo taan shatiiton taatoo ta doono neech getoyichiye; wotta ne gonnee ta neen ta qolletaa ta qolleton taach tuniyemmo ne tunoon ta mulloona ta gabitoyichiye.

¹⁶ Ta getoon waayeree, Yeeri nooch immiti showoochee noon aalliiya qaawiibeeti ashi kishoochee taannaa ta bushoonon wodiyemmo neene.

¹⁷ “Ta ne gonneyoo ‘Taatoo ta doono ne, deꞌoonaa gondoonon barbariiꞌi ariyoona Yeerichi maraakoommo neene. Ebich taatoo ta doono ne qaaro taan goggiyemmone’ iyaꞌa gabiyoye. Ne Nuggishoo Doono Yeeriyoo neenna tookki tunebe” iyan.

¹⁸ Aroochee taatoo ureen, “And neen ta echemmi mooyon amoonolla taach aachiyaahine” iye. Ureyoo, “Taatoo ta doonocho, gete” iyan.

¹⁹ Taatoo, “Ebi moochi daggooch Yoꞌaabi kishoo aalle?” iꞌi echehe. Ureyoo wochaꞌa ishichiyan: “Taatoo ta doonocho, beeyechi ne kashoona wogehoye. Taatoo ta doono ne getteton nookko hakkeyaani mooyone. Iberoone; ne naayo Yoꞌaabine ebin ta gettemmoyich taan wocheto; wotta ne gonnee ta gettemmi mooyonoo taach gettito, biine.

²⁰ Biyoo ebin bi tuniito, ebi mooyon guudoona mashaamiyoyichiye. Tunebaani ta doono ne, Yeerichi maraakoochoommon ariyecho ne tunetoyich, hini showooch tuneebeeti mooyo bullin ariyaabeeto neene” iyan.

²¹ Aroochee taatoo, Yoꞌaabich, “Eke tunebe; ebi ne qaawiti mooyo tunemmoyich daaggito taane. Hamiree ta bushoo Abisoloomin wochi deebe” iye.

²² Yoꞌaabiyoo taatoyich oogoon imoyich baroona showooch guufehe; biyoo taatoon diiriye. Aroochee Yoꞌaabi, “Ta qolloon ne waayetoyich, taatoo ta doono ne aafoochaa gidoon daneto ta tunoon hanaach ariito taane” iye.

²³ Yoꞌaabiyoo tiyii Geshuuree showooch hammiꞌi, Abisoloomin Yerusaalem deebiye.

²⁴ Tunebaani taatoo, “Hiniichee wohiree bi kexooch beebe. Ta aafoon beegaachemmone” iye. Ebina Abisoloomi aroochee wokkiꞌi bi kexooch hammii kotehe; biyoo taatoona daneyaanoone.

Abisoloominaa Bi Nihoo Daawitina Shuno

²⁵ Malletee gaawoona Abisoloomina tatemmi asho ciroona Israꞌeelee showooch aalloone. Qelloochee tiijjiꞌi baatee yapherooch beddaahaa, bi achooch ikke bacholla aalloone.

²⁶ Bi qelli eexo biin bi maggee beetoyich, natooch ikke wottoon maachee beehe; maacheeti bi qelli eexo taatee kechi machoona qocaa, gutte balle sheqeelo tunee beehe.

²⁷ Abisoloomiyoo keejje anaami bushiisheenaꞌonaa Tamaari getteyaabeeti ikke maache busheenon shiyihe. Tamaariyoo mallet gaawe busheene.

²⁸ Abisoloomi ceeni gutte naton taatoona daneyaanoon, Yerusaalem kotehe.

²⁹ Aroochee Abisoloomi, bi waataa taatoo waan biin woche daachiya, Yoꞌaab waan wochoon daachiihe. Tunebaani Yoꞌaabi woyemmon qajjiye. Wochinnoon wochee bi daachiitaa, andoo woyemmon qajjiye.

³⁰ Aroochee Abisoloomi bi aafee bushiisheenaꞌoyich ishichiye: “Ebeegote; Yoꞌaabichi budo bi beeto, ta buchi gaꞌoochiye. Aroochoo sheqoo beetone. Hamiree aroon qaaqqoona michibote” iye. Ebina Abisoloomi aafee bushiisheenaꞌo sheqoon qaaqqoona michiyeete.

³¹ Aroochee Yoꞌaabi Abisoloom waan tiyii hammiꞌi, “Ne aafee bushiisheenaꞌo ta sheqoon qaaqqoona boonoshi michito, amoyichiye?” iꞌi echehe.

³² Abisoloomiyoo Yoꞌaabich ishichiye: “Ne waan ta wochetaa, waataache iyaꞌa ne qajjetoyichiye. Taatoo waan hamiree, ‘Geshuuree aakkiyane ta waato? Arooch ta beemmo gaata, taach gaawiye’ itone getiree ne gettemmoyich, neen wocheya qaawiyoye. Andoo tunetaa, hamiree taatoo aafoon beegona; gondo taach beegaata, bi taan wuxibe” iye.

³³ Ebich Yoꞌaabi taatoo waan hammiꞌi, Abisoloomi gettiton biich gettiye. Taatoo, Abisoloomi woyemmoyich wochiihe. Abisoloomi waa, taatoo aafooch baroona guufeꞌi goyinnehe. Taatoo biin shummiye.