2 Saameeli 13 - Kafa Linguistics Project

Aminooninaa Tamaarinochi Mooyo

¹ Daawiti bushoo Abisoloomich Tamaari getteyaabeeti mallet gaawe manee beehan. Biinoo Daawiti bushoo Aminooni shunniye.

² Aminooni bi manee Tamaarin bi shunoochee tiyitona xuuxeꞌi biiyehe; ebiyoo gidiidee bi tunetoyich, biin dano maggoo tuneꞌi biich bi bekketoyichiye.

³ Aminoonich Yonadaabi getteebeeti accechi addaaro beehe. Biyoo Daawiti manoo Shimeꞌichi bushoone.

⁴ Yonadaabi Aminoonin “Taatoochi bushoocho, qemi qemona ne tuummaabeeto, amoyichiye? Ebin amoyich taach getaachine?” iye. Aminooniyoo “Ta manoo Abisoloomi manee Tamaarin ta shunnetoyichiye” iye.

⁵ Yonadaabiyoo biich ishichiye: “Ishigaata, biiyeton shaahiree qeenooch qebe. Ne nihoo neen cacheya bi waahooba, biich ‘Ta manee Tamaari waaree maayoon taach bi immemmoyich daaggibe. Biyoo maayoon ta aafoochaa, ta ciini beetaa, qanniiree bi giddiitaa, bi kishoochee deꞌiree mamona’ gete” iye.

⁶ Ebina Aminooni biiyeton shaahiꞌi qeyiye. Taatoo biin cacheya waahe. Aminooniyoo biich “Ta manee Tamaari waaree, ta ciini beetaa, giisheche koshon kachii taach bi giddiitaa, bi kishoochee deꞌi ta maayemmoyich daaggibe” iye.

⁷ Daawitiyoo Tamaar waan, taatee kexooch wocheꞌi, “Ne manoo Aminooni kexooch hamiree maayoon biich qanniibe” iye.

⁸ Ebich Tamaari bi manoo Aminooni kexooch hammahan. Biyoo qeyiꞌi beehe. Tamaari bukoon daammaa xiriqqahan. Bi ciinnii beetaa, xekaꞌa kachiihan.

⁹ Daammaꞌa bi aafoochaa qondoochee kichiyan. Tunebaani maayemmon qajjiye. Biyoo “Asheenaꞌo bullin ta aafoochee kichibote” iye. Asheenaꞌo bulliyoo bi aafoochee kechiyeete.

¹⁰ Aroochee Tamaarin “Ne kishoochee deꞌiree ta maayemmoyich, maayoon ta qeyaabeeti gatooch deebe” iye. Biyoo are bi kachiiti koshon yechaꞌa, bi manoo Aminooni beeti gatooch daammahan.

¹¹ Daammaa bi waan bi giddiimmona, biin ciixee yechiꞌi, “Ta maneene, ne waataa tookki qebone” iye.

¹² Biyoo ishichiyan: “Ta manoocho, tuneyaache; taan giidoona yechaahine. Ebiyoommi mooyo Israꞌeeleenaꞌo daggooch tunee ariyaanoone. Ebi yeelliibeeti mooyon tuniyaahine.

¹³ Tawochi aabichireeshiye ashi aafoon ta ciinnemmo? Wotta newoo Israꞌeeleenaꞌo daggooch cooneeshiye ne gettemmo. Taatoyich ne gettemmoyich neen qollehoye. Biich ne getaa, taan neech bayaachemmone” iyan.

¹⁴ Tunebaani bi getteton waayemmon qajjiye. Biyoo areyee beshe giidecho bi tunetoyich, giidoona yechiꞌi, biin qeyiye.

¹⁵ Aroochee Aminooni biin oogichii shixxiye. Biin bi shixxiti shixo, shiichiꞌi biin bi shunniti shunoyee beshiye. Aminooniyoo “Tiyi hambe” iye.

¹⁶ Tunebaani are biich ishichiyan: “Tuneyaache; taan kichaa ne daachiyoo, shiichaa ta toommooch ne tuniiti mooyoyee beshe gonde mooyone” iyan. Tunebaani bi ebin waayemmon qajjiye.

¹⁷ Biich maddeebeeti bi aafee bushoon ceeggiꞌi, “Ebi ureen ta aafoochee kichiichi, bi hillooch kelloon hici tuggebe” iye.

¹⁸ Ebina bi aafee bushoo biin kichiichii, kelloon hicciye. Biyoo arooba taatoochi gidiide bushiisheenaꞌo taheebeeti, kishoochaa genjoo tuneti, genje tahoon tahetine.

¹⁹ Tamaariyoo tulloon bi shimbooch shakkahan; bi taheti genje tahoon keexxahan. Bi kishoon bi qellooch geddaꞌa, cookaa eeppaabee hammahan.

²⁰ Bi manoo Abisoloomiyoo biich ishichiye: “Ne manoo Aminooni toone ebin ne toommooch tuniito? Ta maneene, ebin konichona gettaahine; bi ne manoone. Ebi shaahoon oogichiree aaxxiyaahine” iye. Tamaariyoo Abisoloomi kexooch ayinaa buuchaꞌa kotahan.

²¹ Taatoo Daawiti ebi bullin waayeꞌi, oogeton ippee kaarehe. [Tunebaani Aminooni mulloon ayinikkemmi mooyon tuniyaanoone. Ebiyoo bi gutenee bushoo bi tunetoyich, wotta biin shunnii bi beetoyichiye.]

²² Abisoloomi Aminoonich gondoon tuneba deꞌoon, amoonolla qaareyaanoone. Ebiyoo bi maneen giidoona bi yechitoyich, Aminoonin bi shixxitoyichiye.

Abisoloomi Aminoonin Wuxoo

²³ Gutte natoyee gubb, Abisoloomi Efreemi katemee gaꞌooch beeti, Baꞌaal Hatsooraa bi bageenaꞌochi eexon cakkii bi beetoyich gifiroon geddiye. Biyoo taatoo bushiisheenaꞌo bullin arooch ataalliye.

²⁴ Abisoloomi taatoo waan hammiꞌi ishichiye: “Ebiyoche, ne guuno ta, ta bageenaꞌochi eexon cakkiyaa ta beetoyich, gifiroon geddeto taane. Ebich taatoo neennaa ne naayinaꞌona arooch ittoshi danemmoyich qollehoye” iye.

²⁵ Taatoo, “Ta bushoocho, tuneyaache; no bulli hamigaata, neech maggemmone” iye. Kupphiiꞌi bi qolletaanona, taatoo hamon qaawaanoone. Tunebaani biin diiriye.

²⁶ Abisoloomiyoo “Ishigaata, ta manoo Aminooni noonna tookki bi hammemmoyich tuniibe” iye. Taatoo “Neenna tookki bi hammemmo, aakkiyane?” iye.

²⁷ Tunebaani kupphiiꞌi bi qolletoyich, Aminooninaa bare bi bushiisheenaꞌo bullina Abisoloomina tookki boonoshi hammemmoyich daaggiye. [Abisoloomiyoo taatoochoommi gifiroon qanniihe.]

²⁸ Biyoo bi aafee bushiisheenaꞌoyich ishichiye: “Aminooni woyinee uyoon uchii michiꞌi, bi ashittino qeecon manjii ciinote; tawoo ‘Aminoonin wuxibote’ ta getigaata, wuxibote. Ebin ittoshi tuniyemmoyich getteto ta tunetoyich, shattaahote; maac kuxo tunebote; kupphebote” iye.

²⁹ Ebina Abisoloomi aafee bushiisheenaꞌo Abisoloomi boonoshich gettitoommon tuniiꞌi Aminoonin wuxiyeete. Echeti taatoochi bushiisheenaꞌo bulli boonoshi biceroon yebbeꞌi woceheete.

³⁰ Hammiibee gommooch boonoshi beetaa, “Abisoloomi ne bushiishoo bullin ciichitone; ikkolla echeto aalloone” ii beeti woroo Daawitich shaggiye.

³¹ Taatoo tiyii neexehe; bi tahoonoo keexxiye; beneenoo iye. Biinna tookkii beeti bi naayinaꞌo bulliyoo wotta bi gaꞌooch neexeechii boonoshi tahoon keexxiyeete.

³² Tunebaani Daawiti manoo Shimeꞌichi bushoo Yonadaabi ishichiye: “Ta doonocho, ne bushiisheenaꞌo bullin wuxitinaꞌone getiree gabiyaahine. Aminooni baachiye qitito. Ebiyoo Aminooni bi manee Tamaarin giidoona bi yechiti aaboochee tiijjiꞌi, Abisoloomi gabii kuxxiti mooyo bi tunetoyichiye.

³³ Ebich ‘Taatoochi bushiisheenaꞌo bulli qititinaꞌone’ getteeti woroon iberiyaahine. Aminooni baachiye qitito” iye.

³⁴ Arooba Abisoloomi kechii maxxehe. Bekkech areegaata, katemee xaqqee uxeree toommooch neexeechii, qayeebeeti ginee naayo kaama ciinniꞌi, Horonayimi gommo waanee meeti asheenaꞌo geppoon kindii beetee beeggiye. Biyoo taatoo waan hammiꞌi, bi beeggiton gettiye.

³⁵ Yonadaabiyoo taatoo Daawitich “Ebiyoche, taatoochi bushiisheenaꞌo waatinaꞌone. Ne guuno ta gettetoommon, tunetone” iye.

³⁶ Biyoo ishin gettii bi ciichimmona, bekkech taatoochi bushiisheenaꞌo cookii eefeebee shaggiyeete. Taatoonaa bi naayinaꞌo bullinoo oogichii eeppiyeete.

³⁷ Abisoloomi maxxeꞌi Geshuuree taatoo, Amihuudi bushoo Talimayi waan hammiye. Daawitiyoo bi bushoo Aminoonich qemi qemona eeppii muushenee beehe.

³⁸ Abisoloomi maxxeꞌi bi hammiti Geshuuree showooch keejje naton kotehe.

³⁹ Taatoo Daawiti Aminooni qititoyich bi muusheneti muushenoochee goggeꞌi, bi bushoo Abisoloomin sharaatee beehe.