2 Saameeli 10 - Kafa Linguistics Project

Daawiti Amooneenaꞌonaa Sooriyeenaꞌonon Kochii Wochoo

¹ Ebiyee gubb, Amoonee taatoo Nahaashi qitiye. Bi bushoo Hanuuni bi xaaꞌooch kereeꞌi taatehe.

² Daawitiyoo “Bi nihoo Nahaashi taach deeti deꞌoommon, bi bushoo Hanuunich deemo taach qaawiihe” iye. Ebina bi nihoochi eefon bi cacheyoon boonoshi gettemmoyich, Daawiti bi asheenaꞌon wochee daachiihe. Daawitichi asheenaꞌo Amoonee showooch hammii shaggiyeete.

³ Tunebaani Amoonee iraasheenaꞌo boonoshi doono Hanuunich ishichiyeete: “Daawiti ebi cacheyechinaꞌon ne waan bi deejjito, ne aabbin oogiiꞌi neech shaahii beete? Toonoone; no katemoon kochii aalliyoyich, qiidi boshe boonoshi beeggemmoyich toone?” iyeete.

⁴ Ebich Hanuuni Daawitichi asheenaꞌon yechiꞌi, qati baddi boonoshi ishaanoon caggiye. Boonoshi tahoon shimetoochaa maaccii, shokkaachoon echiiꞌi daachiihe.

⁵ Boonoshiyoo oogichiꞌi yeelleheete. Daawiti ebin waayeꞌi, wocheyechinaꞌon boonoshi waan daachiihe. Biyoo “Ittoshi ishaanoo diccimmi wottoon, Yaarika yagibote; aroyee gubb wottemmo ittoshine” iye.

⁶ Amoonee asheenaꞌo Daawiti boonoshin bi tiyaaroon ariiheete; ebich Beet Rehoobinaa Tsobaahinoochee hiye hume Sooriyee ginee naayinaꞌon, Maꞌaki taatoon ikke hume bi asheenaꞌona tookkii, wotta Xoobee aaraa gutte hume asheenaꞌon kiraayiyeete.

⁷ Daawiti ebin waayeꞌi, Yoꞌaabin Israꞌeelee ginee naayinaꞌo bullina tookkii daachiihe.

⁸ Amooneenaꞌo boonoshi katemoochee kechiꞌi, katemee kellooch yaaroona neexeheete. Tsobaahinaa Rehoobinoochee waati Sooriyeenaꞌo, Xoobinaa Maꞌakinoochee waati asheenaꞌoo bara kechiꞌi, xalle gaddooch neexeheete.

⁹ Yoꞌaabiyoo aafinaa gubbina gino biin giichito tunoon ariihe; ebich Israꞌeelee ginee naayinaꞌo daggoochee arichetinaꞌon kaacciꞌi, Sooriyeenaꞌo ciinooch neechiye.

¹⁰ Echeti bi ginee naayinaꞌo toommooch bi manoo Abishayin ukkiriiꞌi, Amooneenaꞌo ciinooch neechiye.

¹¹ Yoꞌaabiyoo ishichiye: “Sooriyeenaꞌo taan kochii wochigaata, hamiree taan gaachebe; Amooneenaꞌo neen kochii wochigaata, ta waaree neen gaachemmo taane.

¹² Illa shataanoon kupphebone; no asheenaꞌonaa no Nuggishoochi katemeenaꞌonoyich kuppheree koyebone. Doono Yeeri bi daaggoon baach ceechibe” iye.

¹³ Aroochee Yoꞌaabinaa bi asheenaꞌona Sooriyeenaꞌon kocha boonoshi waan giddeheete. Sooriyeenaꞌoo wocee aalleheete.

¹⁴ Amooneenaꞌo Sooriyeenaꞌo wocee aalloon beeggiꞌi, boonoshiyoo Abishayi aafoochee woceꞌi katemooch wottee giyiyeete. Aroochee Yoꞌaabi Amooneenaꞌona koyoochee wotteꞌi Yerusaalem hammiye.

¹⁵ Sooriyeenaꞌo Israꞌeeleenaꞌo boonoshin kochii wochoon beeggiꞌi, boonoshi ginee naayinaꞌo bullin ikkooch kiciyeete.

¹⁶ Taatoo Hadadezeeri Efiraaxisi aachee beqach beeti Sooriyeenaꞌo waan wochoon daachiiꞌi, boonoshi woyemmoyich tuniihe. Boonoshiyoo Hadadezeerichi ginee iraashoo Shobaakina tookkii Helaam hammiyeete.

¹⁷ Daawiti ebin waayeꞌi Israꞌeelee ginee naayinaꞌo bullin kiciye; biyoo boonoshin yechii, Yoordaanoosin kimmiꞌi Helaam hammiye. Sooriyeenaꞌoo yaaroona neexeꞌi biinna koyeheete.

¹⁸ Sooriyeenaꞌo Israꞌeeleenaꞌo aafoochee wocee aalleheete. Daawitinaa bi asheenaꞌona gaari toommooch tuneꞌi koyeebeeti shabaatte balle asheenaꞌonaa aabbe hume hareshechinaꞌonon wuxiyeete. Ginee naayinaꞌochi iraashoo Shobaakinoo kochii mayiiheete; biyoo aroochaa qitiye.

¹⁹ Hadadezeerich hajjeebeeti taateenaꞌo bulli Israꞌeeleenaꞌo boonoshin kochii wochoon ariiheete. Ebich Israꞌeeleenaꞌona tookkii shuneꞌi boonoshich hajjeeheete. Aroyee gubb, Sooriyeenaꞌo Amooneenaꞌon gaachemmon shattiyeete.