2 Qorontoosi 8 - Kafa Linguistics Project

Yerusaalem Beeti Kittinneenaꞌoyich Tunemmi Gijjee Buushoo

¹ Wotta ta maneenaꞌote! Makidoonee showooch beeti kittinnee guuphinaꞌoyich Yeeri immiti wojjoon ittoshi ariyemmoyich qaawaabeeto noone.

² Wodde xuuxoon beeggitinaꞌone; tunebaani amoommon boonoshi giretaanona, boonoshi emiroo besho bi tunetoyich, beshaa beshiiꞌi immitinaꞌone.

³ Boonoshi hakkee wottoon baach tuneyaanoon, boonoshi hakkoyee beshiton boonoshi hajjee daaggoona immitinaꞌo boonoshi tunoon miixaabeeto taane.

⁴ Yaafeenaꞌoyich tunemmi gijjee buushoon buushoona qoodeyecho tuneya qaawiꞌi, “Ebi emiroon daaggibote” iꞌi noon manjii qolletinaꞌone.

⁵ No gabitoyee beshooniye boonoshi tuniito; bulliyee shiichiꞌi boonoshi qelloon Doono Yesuus Kiristoosich beshii immiyeete; daakkiꞌi wotta Yeerichi daaggoommon boonoshi qelloon beshiiꞌi nooch immitinaꞌone.

⁶ Ebich ebi shuunoon shiichiꞌi wonnito Titoosi tunetoyich, andoo wotta ebi gaawe ittoshi shuunee wojjoon tuggooch bi bechemmoyich biin qolleto noone.

⁷ Mooyo bullina, Yeerichi toommeexi mullee tooꞌiyoona, yibbaatoona, ariyoona, giidoon qoophaanoon maddoona, noon ittoshi shunonoo beshaa besho ittoshine; ebiyoommon mulloochee tiijjiꞌi imona beshaa besho ittoshi tunemmoyich qaawaabeeto noone.

⁸ Tuniibote immi gommona ebin ittoshich getaache; tunebaani bareenaꞌo gaachoyich am shaahoon boonoshi qiicceebeeto gaata bekkiyoona, ittoshi shuno am shaahe iberoo bi tunoon beegoyichiye ta gettaabeeto.

⁹ No Doono Yesuus Kiristoosichi gaawe wojjoon ariito ittoshine; aroo amoommon gaannecho bi tunetaanoona, bi giroona gaannecho ittoshi tunemmoyich, ittoshicha iꞌi girechon tunehe.

¹⁰ Ebi mooyoyich ittoshin ciicona; aannooba imo ikkeetoyich baach tuneyaanoon, ebi mooyon shiichiꞌi gabito ittoshine.

¹¹ Imma ittoshi gabitoommon, andoo are ittoshi gabiton ittoshi ceechemmoyich, ittoshich beetoommon tiyi shuunebote.

¹² Imoyich daaggiti asho bi beegaata, Yeeri qaawiibeeto, biich beetoochee imonalli, aalloochee toonoone.

¹³ Ta ishichaabeeto, bareenaꞌo kashetaa ittoshi toommooch shaago bi tunemmoyich tuneyaanoon, ittoshi bullich tato bi tunemmoyichiye.

¹⁴ And ittoshich beetoochee ittoshi immito boonoshich shappiton ceechemmone; aroochee gubb wotta boonoshich beetoochee ittoshich shappiton ceechemminaꞌone; ebina mooyo tato tunemmone.

¹⁵ Ebiyoo, “Woddiiꞌi kicitoyich daakkeeto aalloone; giishiiꞌi kicitoyich shappito aalloone” getaa bi kooreetoommoniye.

¹⁶ Ittoshin gaachoyich no gabaa beetoommon Titoosiyoo wotta ebiyoommon ittoshich bi gabemmoyich tuniiti Yeeri galleteebe.

¹⁷ No ciicoyich deꞌa itone; ebi ikkeeto baach tuneyaanoon, ebi mooyona ittoshin gaachoon bi shunnitoyich bi daaggoona ittoshi waan hammii beetone.

¹⁸ Wotta mishiraachee qaaroon getona kittinnee guuphinaꞌo bullina naadeeti no manoon biinna tookkaa ittoshi waan daachiibeeto noone.

¹⁹ Ebi baach toonoone; Doono Yeerichi oogee yiiroonaa gaawe no daaggoona bekkemmoyich, ebi gijjee wojjoon no daamiyooba noonna tookki bi hammemmoyich kittinnee guuphinaꞌona wotta kaachetone.

²⁰ Ebi mulloochee tiijjaa icheti wojjoon no kicaa beehoobinaa no daammaa shakkii beehoobina, koniyoona noon bi qoonaachemmoyich no qelloon quyaabeeto noone.

²¹ Doono Yeeri aafooch ikkeeto baach tuneyaanoon, ashi aafoochoo wotta gaaweto tuneton tuniyoyich qaawaabeeto noone.

²² Wotta wodde wottoon wodde mooyona xiishaa manjiiꞌa no ariiti bare no manoon boonoshina tookkaa daachiibeeto noone; biyoo ittoshin oogichii bi gibenee beetoyich, ittoshin gaachoyich woddoon qiiccee beetone.

²³ Titoosichon ariyoo qaawii beetoyich, ittoshin gaachoyich taanna tookkii shuuneebeeti ta addaaroone; biinna tookkii hammiibeeti bare no maneenaꞌochon ariyoo qaawii beetoyich, kittinnee guuphinaꞌo wocheti wocheyechinaꞌonaa Kiristoosin oogii beetinaꞌonane.

²⁴ Ebich boonoshin ittoshi shunonaa ittoshi toommooch nooch beeti geecoona tato bi tunoon kittinnee guuphinaꞌo bullich bekkiibote.