2 Qorontoosi 7 - Kafa Linguistics Project

¹ Illa ta shunechinaꞌote! Ebi gibeno nooch bi beetoyee, no meenonaa no ayaanoonon eeꞌiibeeti mooyo bulliichee no qelloon xalliibone; Yeerin shatibee, no yaafittinoon ceeno tuniibone.

Phawuloosi Emiroo

² Ittoshi mulloon nooch qechibote; koninolla xuꞌaano noone; koninolla gondoon shuuniyaano noone; koninolla dawushaano noone.

³ Ta ishichaabeeto, ittoshi toommooch nalloyich toonoone; shiichaꞌa ta gettetoommon, oogichaa ittoshin shunnaa no beetoyich, no qititaa, kashoonoo no beetaa, ittoshiyee baraachemmo noone.

⁴ Ittoshich aafee kupphoona gettaabeeto taane; ittoshi naboyich oogeton geecaabeeto taane; oogeton taan goggiito ittoshine; wodde iritoon beeggaabee no beetaa, ta emiroo beshaa beshoon meettii beetone.

⁵ Makidoonee showooch no shaggehooba, bulli gommona iritoon beeggehonalli, no meeno kashe xaaꞌoon daneyaanoone; maach beeti asheenaꞌo waanee kaaro, no mulloochoo shato beehe.

⁶ Tunebaani ayinii beetinaꞌon goggiibeeti Nuggishoo Titoosin no waan bi deejjoona noon goggiitone.

⁷ No goggeto, bi waatoyich baach toonoone; tunebaani taan ittoshi sharaatoon, “Ebin tuniiya bedaachone” iꞌi ittoshi ayinoon, taach neexoyich ittoshi qanaatoonoo bi getaa, ittoshi waanee bi daneti goggoona goggeto noone. Ebich and aafichoyee beshoon emirito taane.

⁸ Aaf ta kooriti wochoochaa ittoshin ayinikkito ta tunetaanoona, ta kooroyich “Aakkiya ebin tuniitote?” getaache; “Aakkiya ebin tuniitote?” ta itaanolla, are ta kooriti wocho giisheche wottoon baach ittoshin bi ayinikkoon beeggeto taane.

⁹ Ta emirito, and ebi ittoshi ayinoo gonde shuunoochee ittoshi wottemmoyich bi tuniitoyichalli, ittoshi ayinitoyich toonoone. No naboona ikke gaacolla ittoshich bi shappaachemmoyich, Yeerichi daaggoommon ayinito ittoshine.

¹⁰ Yeerichi daaggoommon tuneebeeti ayinoo axaaxee gommoochee Yeer waan wochoona wodooch shakkii beetone. Ebich “Aakkiya ebin tuniitote?” getteyaache. Tunebaani hini alemeexi ashi ayinoo qitooch shakkii beetone.

¹¹ Ebi Yeerichi daaggoommon tuneti ayinoo am shaahe maac kuxo tunoon, xuꞌoochee xalloo ittoshi tunoon bekkiyoyich am shaahe qanaatoon, gonde moochi toommooch am shaahe kaaroon, am shaahe shaton, taach ittoshich beeti am shaahe sharaatoon, mulloochee tiyiti am shaahe qanaatoonaa xuꞌecho toommooch nalloonon ittoshi daggooch tuniite! Ebi mooyoyich bulli gommona xalloo ittoshi tunoon miixiito ittoshine.

¹² Illa are wochoon ittoshich ta kooriteenolla, am shaahoon noon ittoshi shunniibeeto gaata Yeeri aafooch ittoshich bekketo tunetaa ittoshi shalligemmoyichalli, xuqqiti ashicha iyaꞌa woyee xukketi ashicha iyaꞌa toonoone ta koorito;

¹³ no goggetoo ebichi naboyichiye. No goggetoyee beshoon Titoosichi emiroona no wotta oogichaa emirito noone; ebiyoo bi mulloon ittoshi bulli kashiitoyichiye.

¹⁴ Ittoshich taach beeti geecoon ebiyee aaf biich getteto taane; ittoshiyoo taan yeelliyaano ittoshine; ittoshich getteeti mooyo bulli iberoo bi tunoommon, ebi ittoshichon Titoosich no getteti geecoo iberoo tuneꞌi danetone.

¹⁵ Ebich ittoshi bulli biich deꞌa getona, oogeti shatona oogiibee biin aabichiꞌi ittoshi iibbiito gaata gabiibee, ittoshich beeti bi shuno woddee woddee qeyitone.

¹⁶ Tawoo bulli gommona ittoshin gibeno ta hakkitoyich, beshoon emirito taane.