2 Qorontoosi 6 - Kafa Linguistics Project

¹ Illa Yeerina tookkii shuuneebeeto tunaꞌa ittoshin no qollaabeeto, ittoshi deqqiti Yeerichi wojjoon duuboon ittoshi tuniyaachemmoyichiye.

² Yeeri ishichiye: “Ta wojjoon neech ta bekkiyemmi saato shagaa, neechon waayehoye; neen ta wodiyemmi aabo shagaa, neen gaachehoye” iye. Ebiyoche, Yeerichi wojjoon ne danemmi saato hanaachiye; ne wodemmi aaboo andiye.

³ Yeerich no maddaabeeti maddoo bare asheenaꞌona bi qoonneyaachemmoyich, ikke mooyona koninolla no tephaachemmoyich no qelloon quyaabeeto noone.

⁴ Wotta yulloon, iritoon, xuuxoonoo haaꞌiyoona bulli gommona Yeerichi maddecho no tunoon bekkiibeeto noone.

⁵ Yexxeto noone; cucheto noone; dofee asheenaꞌo no toommooch caagee boonoshi tiyaa iriteeto noone; shuunoona maraateto noone; tokketoon mucceto noone; shaaceto noone.

⁶ Xallittinoona, ariyoona, haaꞌiyoona, deꞌittinoona, nooch beeti Yaafe Ayaanoona mulloochee tiyiti shunoona,

⁷ ibere yibbaatoona, Yeerichi hakkoona shuunoona, no qanne kishoonaa yooche kishoonooch ginee koyee qiicoommo tuneti cadiqoon yeshona, Yeerichi maddecho no tunoon bekkiibeeto noone.

⁸ Ikkikkeenaꞌo noon oogii beetinaꞌone; bareenaꞌo noon giishii beetinaꞌone; ikkikkoochaa gonde mooyo no toommooch yibbaatee beetone; ikkikkoochaanoo galleteebeeto noone. Iberoon yibbaataabee dawushecho getteebeeto noone.

⁹ Aricheti asho tuneebee aricheyaanoommon tuniitaa ciicheto noone; qitito no shaahitaa kashoona beeto noone; duꞌehone, tunebaani qitaachone.

¹⁰ Ayinikkiti mooyo no toommooch bi shaggitaa, bulli aaboon emiriyone; girecho no tunetaa, meetinaꞌon gaannecho tuniihone; amolla nooch aallo bi tunetaa, bulli mooyo noochone.

¹¹ Hini Qorontoosi asheenaꞌote! Xallaayaꞌa ittoshich getteto noone; mulloochee tiijjaꞌa ittoshin shunneto noone.

¹² Nooch beeti shunoon ittoshich woonaano noone; tunebaani ittoshi shunon nooch woonnito ittoshine.

¹³ Ta bushiishoommon ittoshi tunetoyich ittoshich ishichiyoye: Ittoshin no shunnetoommon wochiree noon shunote.

Kupphe Shalligichoo

¹⁴ Kiristoosi toommooch mulloon tooꞌiyaaneenaꞌona tookki tambe gommona xandeyaahote. Cadiqoonaa hukkoonoyich amee xibittino beete? Bekkoonaa manderoonoyich amee ikkittino beete?

¹⁵ Kiristoosinaa daabiloosinoyich amee shuno beete? Woyee Kiristoosi toommooch mulloon tooꞌiiti ashoonaa tooꞌiyaanoonoyich amee ikkittino beete?

¹⁶ Yeerichi yaafee kexonaa shahalloonoyich amee danittino beete? No, beeyechi Yeerichi yaafee kexo noone; Yeeri ishichiye: “Boonoshina tookki beeyemmo taane; boonoshi daggooch shaꞌemmo taane; boonoshi Nuggishoo tunemmo taane; boonoshiyoo ta macceenaꞌo tunemminaꞌone” iye.

¹⁷ Ebich wotta Doono Yeeri ishichiye: “Boonoshi daggoochee keyiree baritinaꞌon tunebote. Axaaxoona eeꞌeti mooyon yechaahote; tawoo ittoshin taacho tuniyemmo taane.

¹⁸ Ittoshichoo Nihoo tunemmo taane; ittoshiyoo taach anaami bushiishoonaa maache bushiishoonon tunemmo ittoshine, iye Beshe Hakkechi Doono Yeeri.”