2 Qorontoosi 4 - Kafa Linguistics Project

Mishiraachee Qaaroon Getona Gibeneeto Tuno

¹ Ebich Yeeri bi maaroona hini shuunoon nooch bi immitoyich taahaachone.

² No, no qelloona yeelliibeeti aashee mooyo bullin shuuneyaachone ito noone; dawushoona shuuneyaachone; Yeerichi qaaroon kootoona baccaachone. Tunebaani iberoon xallayiꞌi getona Yeeri aafooch am shaahe asho gaata no tunoon asho bulli bi mulloona ariyemmoyich tuniihone.

³ No mishiraachee qaaro qereeto bi tunetaanoona, bi qereeto, aallooch hammii beetinaꞌoyichiye.

⁴ Hini alemoon hajjiibeeti gonde nuggishoo Kiristoosi toommooch mulloon tooꞌiyaaneenaꞌo Yeerichi shaahoo tuneti Kiristoosichi oogee yiiree mishiraachee qaaree bekkoon boonoshi beegaachemmoyich, boonoshi gaboon wolliihe.

⁵ No awaajjaabeeto Yesuus Kiristoosi Doono bi tunoonalli, no qelloon toonoone; Yesuusicha iyaꞌa no qelloon ittoshich guunon tuniihone.

⁶ “Manderooch bekko bekkebe” iti, Kiristoosichi barooch wacciibeeti bi oogee yiiree ariyoon bekkiibeeti bekkoon imma no mullee daggooch aaxxiito, Yeerine.

⁷ Tunebaani ebi ooge hakkoo Yeerichoani, noocho bi tunee qayo bekkemmoyich, nuuqqee qiicoochoommon tunaꞌa no maac ebi oogeton aaxxe mooyon yecheto noone.

⁸ Wodde gommona xukkehone; tunebaani kechaa kelloon mucceyaachone. “Aabichibona?” iyaꞌa shaammehone; tunebaani gibenoon kuxaachone.

⁹ Duꞌehone; tunebaani Yeeri noon dufaanoone. Yexaa dihiyone; tunebaani qitaachone.

¹⁰ Yesuusichi kashee giidoo wotta no ashittinoochaa bi bekkemmoyich, bulli aaboon Yesuusichoommon qitemmo nooch bi shaahaa gabaabee guuddaa beehone.

¹¹ Yesuusichi kashee giidoo wotta qitemmi no ashittinoochaa bi bekkemmoyich, kashechi no, Yesuusichi naboona bulli aaboon qitooch beshiitaa ichaabeeto noone.

¹² Ebich qitoo noonna, kashoo ittoshina shuunee beetone.

¹³ Tunebaani “Gibenehoye; ebich gettehoye” getaa bi kooreetoommon, ebi are iberiyee ayaano nooch beetoyich, nowoo wotta iberiibeeto noone; ebichoo gettaabeeto noone.

¹⁴ Doono Yesuusin qitoochee tiijjiti Nuggishoo, noonoo wotta Yesuusina tookki tiijjiree, ittoshina tookki bi aafooch giddiyemmo bi tunoon ariibeeto noone.

¹⁵ Ebi bulli bi tuneto, ittoshicha getenane; ebiyoo Yeerichi wojjoo beshaa beshe wodde asheenaꞌoyich bi shagaa, Yeerichi oogee yiiroyich tunemmi galleto woddemmoyichiye.

Mullee Tooꞌiyoona Beemo

¹⁶ Ebich taahaachone; maachi no ashittino yicciteenolla, maaci no ashittino qemi qemona andiree beetone.

¹⁷ Hini andich baach beeti kette iritoo ebine getteyaani beshaa beshe oogeto tuneti bulli yemeenee oogee yiiroon nooch daniyemmone.

¹⁸ Ebich bekkeyaanoonalli bekkee beeton ciinaachone; bekkeebeeto andich baachiye; tunebaani bekkeyaano bulli yemeeneechone.