2 Qorontoosi 3 - Kafa Linguistics Project

Yeerinaa Ashoonochi Daggooch Beeti Andire Wogo

¹ Wochinnoon no qelloon naadoyich giyehone? Woyee ikkikkeenaꞌo tunii beetoommon ittoshich woyee ittoshi waanee galletee koorichoo nooch qaawiibeeto tunehe?

² Asho bulli shemmee ariibeeti, no mullooch kooreeti no koorichoo geto ittoshine.

³ No maddee naboona daneti Kiristoosichi koorichoo ittoshi tuno xalla arichetone; hini koorichoo bi kooreeto beeyechi Yeerichi Ayaanoonalli, qalemoona toonoone; ashi mullee toommoochalli, xareeti xaqqee toommooch toonoone.

⁴ Ebin no gettaabeeti naboo Kiristoosina Yeerin no gibenaa beetoyichiye.

⁵ Ebi shuunoon shuuno no hakkemmoyich hakkoon no daneto Yeer waaneenalli, no qelloona no, amoonolla tuniyoyich “Hakkoo nooch beete” geton ciroona hakkaachone.

⁶ Biyoo Yaafe Ayaanoonalli kooreeti sheeroona tuneyaani andire wogee maddecho no tunemmoyich noon bedditon tuniihe. Kooreeti sheeroo wuxiye; tunebaani Yaafe Ayaano kashoon immiye.

⁷ Wonna sheeroo kooreeto, xareeti xaqqee toommoochiye; sheeroo immehooba, Yeerichi oogee yiiroo waccii bekketone; Muusichi barooch wacciibeeti bekko aallee aallee hammiibeeto bi tunetaanoona, Israꞌeeleenaꞌo Muusichi barooch manjiiꞌi ciinon hakkaaneenaꞌone. Illa qitoon deebiti maddoo ebiyoommi oogee yiiroona bekketo bi tunegaata,

⁸ Yaafe Ayaanee maddoo aroyee am shaahe beshaa beshe oogee yiirecho tunehe?

⁹ Asheenaꞌo toommooch naxoon deebiibeeti maddoo ebi shaahe oogee yiirecho bi tunegaata, asheenaꞌon cadiqiibeeti maddoo am shaahe beshe oogee yiirecho tunehe?

¹⁰ Iberoon, and beshe oogee yiiroo bekketoyich, ebi are wonna oogee yiirecho tuneꞌi beebee echeto aafi bi oogee yiiroon muccetone.

¹¹ Beshemmi mooyo ebi shaahe oogee yiirecho bi tunetoyee, manjiree beeyemmi mooyo am shaahe beshe oogee yiirecho tunehe?

¹² Illa ebiyoommi gibeno nooch beetoyich, aafoon kuppheꞌi getoyich shataachone.

¹³ Muusi tuniitoommon tuniyaachone; biyoo aallee hammiibeeti bi baree waccee ciiroon Israꞌeeleenaꞌo beegaachemmoyich, bi baroon kaappiye.

¹⁴ Areenaꞌochi mullo muumetone; wonnee wogoon boonoshi shemmee beegaata, ebi are kaafo tiyaanoon hanaach beddaahaa boonoshi mulloon kaappitone; ebi are kaafoon wokkiibeeto Kiristoosi baachiye.

¹⁵ Iberoone; hanaach beddaahaa, Muusichi Sheeree macaafoon boonoshi shemmeebeeti aabo bullin boonoshi mullo kaappetone.

¹⁶ Tunebaani asho koniyoona Doono waan bi wottehooba, ebi are kaafo tiyiye.

¹⁷ Illa Doono Ayaanoone; Doonochi Ayaano beeti are xaaꞌooch guuchittinoochee keyo beetone.

¹⁸ Ebich no bulli kaappeyaani baroona Doonochi oogee yiiroon heeraawoochoommon wacciibeeto noone; hini oogee yiiroo Ayaano tuneti Doono waanee bi waa beetoyich, Doonochi malletoon no shaahemmoyich, oogee yiiroochee beshe oogee yiirooch noon shaddii beetone.