2 Qorontoosi 2 - Kafa Linguistics Project

¹ Ebich “Guttinnoon waaree ittoshin ayinikkaache” iyaꞌa, waataache immi gaboona neechiyoye.

² Ittoshin ayinikkito ta tunegaata, illa ta ayinikkiti ashoyee beshetaa, taan emirikkemmi asho konine?

³ Wochinnoon ta waahooba, taan emirikka bede asheenaꞌo taan boonoshi ayinikkaachemmoyichiye ebi are wochoon eechaꞌa ittoshich ta koorito. Ebiyoo, ittoshi bullich beeti ta gibeno manjoo bi tunetonaa ta emiroo ittoshi emiroo bi tunoonon ta ariitoyichiye.

⁴ Are wochoon ta koorito, oogeti ayinoona, mulloochee tiyiti xuuxoonaa wodde acimoonane; ta gaboo mulloochee tiijjaꞌa ittoshin ta shunon ittoshi ariyemmoyichalli, ittoshin ayinikkoyich toonoone.

Biin Ayinikkiti Ashoon Phawuloosi Maaroo

⁵ Ashoon ayinikkiti xuꞌechi uro koniyoona bi beegaata, giishetaa oogetaa bi ayinikkito ittoshi bullinalli, ta ikkeeton baach toonoone. Giishetaa ta ii beeto, mooyon maggiyoo qaawoo ta qajjetoyichiye.

⁶ Ebiyoommi uro toommooch meeto ittoshi sheeriti sheeroo beddiye.

⁷ Oogeti ayinooch bi dihaachemmoyich, wochiꞌi maaroonaa biin goggiyoona ittoshich qaawiihe.

⁸ Ebina iberoon biin ittoshi shunon ittoshi bekkiyemmoyich, ittoshin qollaabeeto taane.

⁹ Are aafi wochoon ittoshich ta kooriti naboo, bulli mooyona ta getoon waayeebeeto ittoshi tunoon manjii ariyoyich ta qaawitoyichiye.

¹⁰ Illa ittoshi maariti ashoon tawoo wotta maarito taane; ta maaremmi mooyo amolla bi beegaata, ittoshicha iyaꞌa Kiristoosi aafooch maarito taane.

¹¹ Ebin ta tuniibeeto, Sheexaanoo noon bi dawushaachemmoyichiye; bi gabiibeeti gonde gaboon tuushaano noone.

Xiroꞌadee Phawuloosi Kechiti Naboo

¹² Kiristoosichi mishiraachee qaaroon getoyich Xiroꞌadi katemooch ta shaggehooba, biich ta shuunemmoyich Doono Yesuusi kelloon qechiteenona,

¹³ ta manoo Titoosin dano ta qajjetoyich, ta mullo kasheyaanoone; ebich Xiroꞌadi katemeexi asheenaꞌon diggiiꞌa, Makidoonee showooch hammeho.

Kiristoosina Gondoochi Giidoon Kochii Wochoo

¹⁴ Yeerich galleto bede; gondoochi giidoon kochii wochiꞌi Kiristoosina keccetinaꞌochoommon bulli aaboon noon yaabii beetone; Kiristoosin ariyee cinno bulli xaaꞌooch bi beddemmoyich noonna shuunee beetone.

¹⁵ Wodii beetinaꞌonaa aallooch hammii beetinaꞌonochi daggooch beechaa Yeerich Kiristoosichi gaawe cinno noone.

¹⁶ Aallooch hammii beetinaꞌoyich wuxiibeeti qitee cinno, wotta wodii beetinaꞌoyich wodiibeeti kashee cinno noone. Illa ebi shuunoyich beddito konine?

¹⁷ Yeerichi qaaroon giixeebeeti, bare meeti asheenaꞌoommo toono noone; tunebaani Yeerina wocheeto noone; Kiristoosina tunaꞌa Yeeri aafooch xalle mulloona yibbaataabeeto noone.