2 Qorontoosi 13 - Kafa Linguistics Project

Ciireexi Shalligichoo

¹ Illa ittoshi waan ta waagaata, and hinina keejjinnoone. Yaafe Macaafooch bi kooreetoommon, “Bulli mooyo gutte woyee keejje miixoona manjiye.”

² Guttinnoon hammaꞌa ittoshina tookkaa ta beehooba ta gettetoommon, andoo wotta ittoshiyee wokkaꞌa beechaa gettaabeeto taane; ittoshi waan wottaa ta waahooba, ebiyee aaf axaaxoon shuunetinaꞌonaa echeti asheenaꞌo bullinoyich ariqqeyaachemmo taane.

³ Ittoshiyoo Kiristoosi taanna tuneꞌi gettiibeeto bi tunoon xiishiya qaawiibeeto ittoshine; ittoshi daggooch bekkeebeeto bi giidoani, bi hakkee guutoo toonoone.

⁴ Biyoo hakka guutoo tuneꞌi masqalee toommooch yoodaa bi qititaanona, and Yeerichi giidoona kashoona beetone. Nowoo wotta biichoommon hakka guutoo tuneto noone; tunebaani ittoshina tookkii noon daniibeeti mooyona Yeerichi giidoona biinna tookki kashechon tuneree beeyemmo noone.

⁵ Kiristoosi toommooch mullee tooꞌiyoona beeto ittoshi tunoon, eke ittoshi qelloon phire boshe beegote. Yesuus Kiristoosi ittoshi ikkikkoo mullee daggooch beemon ariyaachote? Ebi tuno qayigaata, beddito tuneꞌi daneyaano ittoshine getone.

⁶ No beddito tuneꞌi no danoon ariyemmo ittoshi tunoon gibenaabeeto noone.

⁷ Amee gonde mooyonona ittoshi tuniyaachemmoyich Yeer waan corootaabeeto noone; bedditon tuneree no bekkemmoyich toonoone; tunebaani no amoommon bedaano no shaahitaanona, ittoshi gaaweton ittoshi tuniyemmoyichiye.

⁸ Iberee qaaro gaminnemmoyich baach tuniyoon hakkehonalli, iberee qaaro gaminaachemmoyich bayon hakkaachone.

⁹ Hakka guutoo no tunetaa, ittoshi giidecho tunemmona noon emirikkiye; no corootaabeeto kaamoo ittoshi tunemmoyichiye.

¹⁰ Ebich ittoshin ta happemmoyich tuneyaanoon, ittoshin ta eenniyemmoyich Doono Yesuusi taach bi immiti hakkoommon, ittoshi waan ta waahooba ittoshi toommooch ta manjaachemmoyich, hini wochoon batt ittoshiyee wohooch beechaa koorito taane.

Ciireexi Diggiyoo

¹¹ Illa ta maneenaꞌote! Emiribote. Kaamoo tunebote. Ta ciicoon waayebote. Ikke mulloona tunebote. Diggoona beebote. Shunee Nuggishoonaa diggee Nuggishoona tuneti Yeeri ittoshina tookki tunemmone.

¹² Yaafeeti gommona shumeyoona ittoshinaa ittoshina ikkoo baroon diggiibe.

¹³ Hiniich beeti, yaafeenaꞌo bulli ittoshin diggii beetinaꞌone.

¹⁴ Doono Yesuus Kiristoosichi wojjoo, Yeerichi shuno, Yaafe Ayaanee ikkittinoo ittoshi bullina tookki tunebe.