2 Qorontoosi 12 - Kafa Linguistics Project

Phawuloosi Beeggiti Yaaꞌoo

¹ Geecoo gaacaallo bi tunetaanoona, geecoo taach qaawii beetone; eke and Doono Yesuus waanee taach bekketi yaaꞌeecho waan wottebon.

² Kiristoosicho tuneti ikke uroon ariiho; ebi tunehooba meenona tuneba kashoona, ta ariyaache; Yeeri ariihe. Ebi uro aaraa awudde natoyee aaf keejjinnee shimaayooch beddaahaa tiijjaa hammiye.

³ Ebi uro meenona tuneba kashoona, ta ariyaache; Yeeri ariihe.

⁴ Yannetooch tiijjaa hammiye; asho koniyoona yibbaatemmoyich daaggeyaani, getteyoo hakkeyaani qaaroon aroochaa waayehe.

⁵ Ebiyoommi uroochon geeciyoye; tunebaani ta qellichon hakka guutoo ta tunoyee beshetaa geecaache.

⁶ Geeciya ta qaawigaatoona, iberoon ta gettaa beetoyich tuushoo toono taane; tunebaani koniyoona bi beeggii beetonaa bi waayee beetonoyee beshoon tuniiree taan bi haddaachemmoyich ta geecoochee kishemmo taane.

⁷ Ebi taach bekketi, worganikkiti wodde mooyinaꞌona ta geecaachemmoyich, ta meenon angixochoommon kochii shooddiibeeti, ebiyoo taan guripphiibeeti Sheexaanee wocheyecho taach ichehe; bi ichetoo, beshoon ta geecaachemmoyichiye.

⁸ Ebi mooyo ta waanee bi wokkemmoyich, keejje wottoon Doono Yesuusin qollehoye.

⁹ Tunebaani aroo wochiꞌi, “Ta wojjoo neech beddiye; ta giidoo kupphiiree bi shuunemmo, hakka guutoo tunoonaniye” iye. Ebich Kiristoosichi giidoo ta toommooch yiiremmoyich, aabiyeenona beshiiree oogeti emiroona hakka guutoo ta tunoona geecemmo taane.

¹⁰ Illa giidoon ta danemmo, hakka guutoo ta tunehoobane; ebich Kiristoosicha iyaꞌa ta maraategaata, ta naakkegaata, ta iritee gaata, ta duꞌegaata, ta xuuxegaatoo, oogichii taan emirikkiye.

Qorontoosi Kittinneenaꞌoyich Phawuloosi Oogichii Gaboo

¹¹ Tuushoochoommon getteto taane; ebin ta gettemmoyich tuniito ittoshine; taan naada bedo ittoshine; koni ta gaata aricheyaani asho ta tunetaanoona, arichetinaꞌo getteeti mishiraachechinaꞌoyee amoonolla shappaache.

¹² Ibere mishiraachecho ta tunoon bekkiibeeti mooyinaꞌo ittoshi waan ta beehooba, ooge haaꞌiyoona ta ceechiti shuuneenaꞌone; eboshiyoo worganikkiti malletoo, gaakkechi shuunoonaa giidechi mooyonane.

¹³ Ittoshi toommooch shaago tunee qayoyee beshetaa, bare kittinnee guuphinaꞌoyee ittoshin ta shappiito, amoonane? Ebi gondo tuneꞌi ittoshich bi bekkegaata, taan maaribote.

¹⁴ Illa ittoshi waan keejjinnoon womoyich qannito taane; ittoshi toommooch shaago tunoon qaawaache. Ta qaawaabeeto ittoshinalli, ittoshi gijjoon toonoone. Boonoshi bushiisheenaꞌoyich gijjoon kicemminaꞌo niheenaꞌonaa indeenaꞌonalli, bushiisheenaꞌo boonoshi niheenaꞌonaa indeenaꞌonoyich kicaacheete.

¹⁵ Ta ittoshicha iyaꞌa taach beeto bullin qayaa ta qelloonona beshii ta imigaata, taan oogeton emirikkiye. Illa ebi shaahoon ittoshin ta shunnaa beetaa, taan ittoshi shunniibeeto ebiyoommi giishecheeniye?

¹⁶ Tunetaa ittoshi toommooch shaago tuneyaano taane; tunebaani ittoshin maroona yechiton tuniiꞌi taachon gaboo qayaano ittoshine.

¹⁷ Ittoshi waan wochaa ta daachiiti asheenaꞌoochee ikkoonolla ittoshin dawushitote?

¹⁸ Titoosi ittoshi waan bi hammemmoyich qollehoye; biinna tookkishoo hammemmi kittinnee manoon daakkaa daachiihoye. Titoosi ittoshin dawushite? Biinnaa taanna ikke kashoona tunaꞌa shuuneyaano noone? Ikke qocoona tunaꞌa beetaano noone?

¹⁹ And beddaahaa ittoshi gabiibeeto, no qellichon taggeebeeto tuniiꞌiniye? No shunechinaꞌote! Kiristoosina tunaꞌa no gettaabeeto Yeeri aafoochiye; ebi bullin no gettaabeeto, ittoshin eenniyoyichiye.

²⁰ Ittoshi waan ta waahooba, diqqich ta gabitoommon tuneree daneyaachemmo ittoshine; tawoo wotta ittoshi gabitoommon tuneree daneyaachemmo taane. Hayo, qanaato, kaaro, “Ta besh taane” geto, oono, ashi shigee shaaꞌiyoo, geecoo, cangecho ittoshi waan beemo qayaache iyaꞌa shattaabeeto taane.

²¹ Wochinnoon ittoshi waan ta waahooba, ta Nuggishoo ittoshi aafooch taan cooniyemmone iyaꞌa shattaabeeto taane; ebiyee aaf boonoshi shuuneti axaaxoochee, ebiyoo tiyaariibeeti mooyoochee, shunee mamoochee, yeelliibeeti kaayoocheenoo Yeer waan wotteyaani meetinaꞌochi naboona diqqich ayini eeppemmo taane iyaꞌa shattaabeeto taane.