2 Qorontoosi 11 - Kafa Linguistics Project

Koote Mishiraachechinaꞌo

¹ Giisheche ta tuushoon ittoshi haaꞌiigaata gaawiye; eke taan haaꞌiibote.

² Yeeri ittoshin bi qanaatee beetoommon, ebiyoommon ta wotta ittoshin qanaataabeeto taane. Ebiyoo shaakkeyaani gidiidechoommon ikke anaamoyich ittoshin ta immetoyichiye; aroo Kiristoosine.

³ Tunebaani dingero bi acona Hewaanin bi dawushoommon, diqqich ittoshi gaboo duubetaa Kiristoosich beeti ibere xalle ittoshi shunoon qajjemmo ittoshine iyaꞌa shattaabeeto taane.

⁴ Eechaa ta shattaabeeti naboo, ikke asho ittoshi waan waaꞌi no getteti Yesuusin tuneyaanoon bare Yesuusin, woyee ittoshi deqqiti Yaafe Ayaanoon tuneyaanoon bare ayaanoon, woyee ittoshi deqqiti mishiraachee qaaroon tuneyaanoon bare qaaroon, ittoshich bi getaa, eehiiree cikki qajjemmo ittoshine iyaꞌaniye.

⁵ Ta gaboochaa, ebi “Aricheti mishiraachechinaꞌo” gettee beetinaꞌoyee ikke mooyonolla shappaache.

⁶ Yibbaatee hakkoo taach aallo bi tunetaanoona, ariyoo taach beetone; ebinoo bulli aaboon bulli gommona ittoshich xalla bekkiito noone.

⁷ Yeerichi mishiraachee qaaroon shumaayaallo ta getona, ittoshin oogiyoyich ta qelloon ta giishiyoona, axaaxoon shuune beeyehote?

⁸ Ittoshich ta maddemmoyich bare kittinnee guuphinaꞌo waanee shumaayoon ta deꞌo boonoshin bogoommone.

⁹ Ittoshina tookkaa ta beetaa taan bi iritiyooba, Makidoonee showoochee waati maneenaꞌo taach shappito bullin deebitinaꞌone; ebich ittoshi daggoochee koni toommoochona shaagoon tuneyaano taane. Mooyo bullina ittoshi toommooch shaagoon ta tuneyaachemmoyich ta qelloon quyeto taane; gubbichoo ta qelloon quyemmo taane.

¹⁰ Koniyoona Akaayee showoochee ebi ta geecoon bayon hakkaache; ebin taach beeti Kiristoosichi iberoona gettoye.

¹¹ Ittoshi toommooch shaagoon tuneyaache iyaꞌa ta getteto, ittoshin shuno ta qajjetoyichiye? Ittoshin shunnaabeeto ta tunoon Yeeri arii beetone.

¹² Tunebaani “Mishiraachecho noone” ii beeti ebi asheenaꞌo noochoommon shuunee beetinaꞌo shaahiree boonoshi geecemmi gommon bayoyich, and ta tuniyaa beetoommon wotta gubbichoo tuniyemmo taane.

¹³ Eboshiyoommi asheenaꞌo Kiristoosichi mishiraachechinaꞌon shaahiya boonoshi qelloon shaddiibeeti koote mishiraachechinaꞌonaa dawushechi shuunechinaꞌonane.

¹⁴ Ebiyoo worganikkiti mooyo toonoone; Sheexaanolla bekkee maraakoon shaahiya bi qelloon shaddii beetone.

¹⁵ Illa bi maddechinaꞌo cadiqee maddechinaꞌon shaahiya boonoshi qelloon boonoshi shaddigaata, ebi dallaawe mooyo toonoone; boonoshi ciiro boonoshi shuunoommo tunemmone.

Phawuloosi Toommooch Shaggiti Xuuxo

¹⁶ Wochinnoon gettoye: Asho koniyoona tuushoon shaahiiree taan ciinnaaye; tuushoo ta shaahigaatoona, giishechoon ta geecemmoyich tuushoon shaahiiree ellebote.

¹⁷ Ebiyoommon geecoona ta gettaa beegaata, tuushoochoommonalli, Doono taan gete bi getaa toonoone.

¹⁸ Meeti asheenaꞌo hini showeexi mooyona boonoshi geecii beetoyich, tawoo wotta ebiyoommon geecaabeeto taane.

¹⁹ Shalligecho ittoshi tunetoyich, tuusheenaꞌochi tuushoon emiroona cikkii qajjiibeeto ittoshine.

²⁰ Ebiyoommon koniyoona ittoshin guunon bi tuniitaa, ittoshin bi bogaa, ittoshi waanee gaacoon danoyich ittoshin bi olletaa, ittoshin bi qallayaa, ittoshi gaakkooch bi tappetaa, cikkii qajjiibeeto ittoshine.

²¹ Taan yeelliibeeto bi tunetaanoona, ebi mooyinaꞌon tuniyoyich kuppho tune no qayon gettoye. Tunebaani tuushoochoommon gettoye: Koniyoona geecoyich aafoon bi kupphegaata, tawoo wotta ebiyoommon aafoon kupphemmo taane.

²² Hibiree shiijjereenaꞌone? Tawoo wotta Hibiree shiijjeroo taane. Israꞌeelee yoodeenaꞌone? Tawoo wotta Israꞌeelee yoodo taane. Abrahamichi yareenaꞌone? Tawoo wotta Abrahamichi yaroo taane.

²³ Kiristoosichi maddechinaꞌone? Geyechi ashoochoommon gettoye: Ta boonoshiyee besh taane; boonoshichoyee beshoon aajjeto taane; boonoshichoyee beshoon wodde wottoon cucheto taane; boonoshichoyee beshoon oogeton yexxeto taane; wodde wottoon qitoyich beddaahaa beddeto taane.

²⁴ Uuche kaalloon, shaashaa yiixiye wottoon Ayihudeenaꞌo yaraafoona taan yexxitinaꞌone;

²⁵ keejje wottoon gumboona yexxeto taane; ikke wottoon xaqqoona yexxeto taane; markaboona ta hammaa beetaa, keejje wottoon markabo tiishehe; ikke heeyonaa ikke xumoonon baharee toommooch beeho.

²⁶ Wodde wottoon gommi shaꞌoona beeho; “Aaco taan maayemmone” immi keqqoona, “Bokkeenaꞌo taan wuxemminaꞌone” immi keqqoona, “Ta yoodeenaꞌo tuneti Ayihudeenaꞌo taan wuxemminaꞌone” immi keqqoona, “Aageteenaꞌo taan wuxemminaꞌone” immi keqqoona, katemeexi keqqoona, baraheexi keqqoona, bahareexi keqqoona, koote kittinnee maneenaꞌo waanee tuneebeeti mooyona keqqoona, beeho.

²⁷ Wodde aayonaa yulloona, wodde wottoon tokketee muccoona, shaacoona, shachewoona, beeho; abete kashoona qeyaa heecheto taane; ta tahemmo aalletaa wodde wottoon aqqoo taan wuxitone.

²⁸ Echeti mooyo bullin aaxxiyaanoon, qemi qemona taan maggeebeeto kittinnee guuphinaꞌochi mooyone.

²⁹ Ikke asho maraategaata, biinna tookkii maraateyaachote? Ikke asho tephee bi dihigaata, ippeyaachehote?

³⁰ Geecoo taach qaawiibeeto bi tunegaata, ta geecemmo hakka guutoo ta tunoon bekkiibeeti mooyonane.

³¹ Bulli yemeenoon galleteeti Doono Yesuusichi Nuggishoonaa Nihoona tuneti Yeeri kootti ta qayon arii beetone.

³² Damaasiqa ta beehooba, taatoo Aretaasiyee desh tuneꞌi qeejjiibeeti Damaasiqi katemeexi iraashoo taan yecha qaawiꞌi katemee kelloon quyii beehe;

³³ asheenaꞌo xaqqee uxeree toommooch beeti kechi mallee kelloona taan kichiꞌi mokkoona boonoshi kindiitaa, bi kishoochee muriccaa wodiyoye.