2 Qorontoosi 10 - Kafa Linguistics Project

Bi Toommooch Giddeti Taggoyich Phawuloosi Wochiti Wochoo

¹ Ta Phawuloosi, ta qelloona ittoshina tookkaa ta beehooba “gaꞌi deꞌo” getteeto, ittoshiyee ta wohiyooba “aaf kuppho” getteeto, Kiristoosichi shiimoonaa ariqqoona ittoshin qollaabeeto taane.

² Meechi gaboona shaꞌee beeton shaahiiꞌi noochon yibbaateebeeti ikkikke asheenaꞌoyich aafee kupphoona geton gabaabeeto taane. Tunebaani ittoshi waan ta waahooba, aafee kupphoona ta gettemmoyich ittoshi tuniyaachemmoyich ittoshin qollaabeeto taane.

³ Hini alemooch beeto no tunetaanoona, no koyaabeeto hini alemeexi asheenaꞌochoommon toonoone.

⁴ No koyee qiico hini alemeexo toonoone; tunebaani Yeer waanee daneebeeti giidoona mishigoon happoyich kupphoone.

⁵ Ashi gajjiteyoonaa Yeerichi ariyee toommooch geecoona tiyiibeeti mooyo bullinon happemmo noone; Kiristoosich deꞌa boonoshi gettemmoyich ashi gaboo bullin keccemmo noone.

⁶ Kiristoosich ittoshi deꞌa geton manjii no ariitoyee gubb, deꞌa getti qayo bullin sheeroyich qannito noone.

⁷ Ittoshi aafooch bekkee beeton baachiye ittoshi ciinniibeeto; koniyoona Kiristoosicho bi tunoon iberiito bi tunegaata, aroo Kiristoosicho bi tunoommon, nowoo wotta Kiristoosicho no tunoon wochi bi qelloona gabibe.

⁸ Doono Yesuus Kiristoosi nooch bi immiti hakkoona beshoon ta geecigaatoona, yeelleyaache; ebi hakkoon nooch bi immito, ittoshin no eenniyemmoyichalli, ittoshin no happemmoyich toonoone.

⁹ Ittoshich ta kooraabeeti koorichoochaa ta qaawaabeeto, ittoshin keqqichiya shaahaaye.

¹⁰ Ikkikkeenaꞌo “Phawuloosi kooriibeeti koorichoo maggoonaa giidechonane; tunebaani aroo no waan bi beehooba giidaalloone; bi yibbaatoo qallayeetone” ii beetinaꞌone.

¹¹ Ishichiibeeti asheenaꞌo ittoshiyee wohooch beechaa no kooraa daachiibeeti wocheenaꞌonaa katinnaa ittoshina tookkaa beechaa no shuunaabeeti shuunoonochi daggooch amee barittinolla aallo bi tunoon gabibeete.

¹² Boonoshin wochii galleteebeeti ikkikkeenaꞌona tookkaa no qelloon haddoyich woyee no qelloon goomiyoyich aafoon kuppheyaachone; tunebaani areenaꞌo boonoshi qelloon wochii boonoshina tachoona, boonoshi qelloonoo wochii boonoshina goomiyoona shalligechinaꞌo tooneenaꞌone.

¹³ Tunebaani ittoshi beetooch no shaggemmi wottoonona, Yeeri nooch immiti shuunee daaroona geeciyonalli, beshaa beshoon geecaabeeto toono noone.

¹⁴ Kiristoosichi mishiraachee qaaroon getoyich ittoshi beetooch no shaggehoobolla, Yeeri nooch daareti shuunoyee besheyaano noone; ittoshiyoo arooba ittoshi beeto are shuunee daaree daggoochiye.

¹⁵ Ebich nooch icheti daaroyee beshaꞌa bareenaꞌo aajjitona beshaa beshoon geecaachone; ebiyee Kiristoosi toommooch ittoshich beeti mullee tooꞌiyoo diccimmona, ittoshi daggooch beeti no shuunee daaro beshoon gabini hammemmo bi tunoon gibenehone.

¹⁶ Ebich bare ashi daarooch shiichiꞌi shuuneeti shuunoona geecaanoon, ittoshiyee bekk beeti showooch mishiraachee qaaroon geton hakkiyone.

¹⁷ Tunebaani, “Geecemmo Doono Yeerina geecibe.”

¹⁸ Asho galleteyoyich beddito tuno bi hakkemmo, Doono Yeeri biin galleteteenalli, biin wochii bi galletetaa toonoone.