2 Qorontoosi 1 - Kafa Linguistics Project

Diggiyoo

¹ Yeerichi daaggoona Kiristoos Yesuusichi mishiraachecho tuneti Phawuloosinaa no manoo Ximootiyoosina waanee, Qorontoosi kittinnee guuphonaa Akaayee showoo bulliich beeti yaafeenaꞌonoyich:

² No Nihoo Yeerinaa Doono Yesuus Kiristoosinochi wojjoonaa diggoona ittoshich tunebe.

Phawuloosi Yeerin Galleto

³ Ariqqechi Nihoo, bulli aaboon goggiibeeti Nuggishoo, no Doono Yesuus Kiristoosichi Nuggishoonaa Nihoona tuneti Yeeri galleteebe.

⁴ Biyoo amee iritolla no toommooch shaggimmi aabo bullin noon goggii beetone. Ebich amee iritolla boonoshi toommooch shagaa, asheenaꞌo iriteebeeti aabo bullin, no wotta Yeeri noon goggiitoommi gommona boonoshin goggiyoon hakkiyone.

⁵ Kiristoosi toommooch shaggiti iritoo no toommooch woddetaa no qoodeetoommon, ebiyoommon wotta Kiristoosina Yeer waanee daneebeeti goggo nooch woddetaa qoodeyecho tunemmo noone.

⁶ Wotta iritoo no toommooch shaggiibeeto, goggoonaa wodoonon ittoshi danemmoyichiye; no goggaabeeto wotta, no toommooch shaggitoommi iritoo ittoshi toommooch shagigaata, goggeree haaꞌiyee hakkoon ittoshi danemmoyichiye.

⁷ No iriteetoommon ittoshi iritee gaata, Yeeri noon bi goggiitoommon ittoshinoo wotta goggiyemmo bi tunoon ariibeeto noone; ebich ittoshi toommooch nooch beeti gibeno manjoone.

⁸ No maneenaꞌote! Isiyee showooch no beehooba, no toommooch shaggiti iritoon ittoshi ariyemmoyich qaawaabeeto noone. Ebi no toommooch shaggiti iritoo no hakkoyee beshii bi getaa, “Illa wodaachone” iyaꞌa qitoyich no kuxxemmi wottooniye noon bi maggeto.

⁹ Iberoon qitee nalloo no toommooch nalleetochoommon nooch waayeetone; tunebaani ebi tuneto, qititon qitoochee tiijjiibeeti Yeerinalli, no qelloon no gibeneyaachemmoyichiye.

^10-11 Biyoo ebin shaahiibeeti qitoochee noon wodiihe; andoo wodiyemmone; ittoshiyoo wotta Yeerin qolloona noon ittoshi gaache beetaa, gubboo wotta noon wodiyemmo bi tunoon gibenaabeeto noone; wodde corootoona Yeerichi wojjoon no danetaa, meeti asheenaꞌo no naboona Yeerin galletemminaꞌone.

Qorontoos Hamon Phawuloosi Qajjiti Naboo

¹² No geecaabeeti mooyo ebine: Hini showeexi asheenaꞌo daggooch, beshoonoo ittoshi daggooch no beemo, Yeeri nooch immiti yaafittinoonaa xalle mulloona bi tunoon no mullo miixee beetone. Ebin no tuniito, Yeer waanee no danaabeeti wojjoonalli, meechi ariyoona toonoone.

^13-14 Shemmeree ittoshi shalligemmoyee beshetaa bare mooyon ittoshich kooraachone; and noochon qoodiꞌi ittoshi shalligii beeton gubb ciichiree shalligemmo ittoshi tunoon gibenaabeeto taane; ebichi naboona no Doono Yesuusi wottee waahooba, ittoshina no geecitoommon, ittoshiyoo wotta noonna geecemmo ittoshine.

¹⁵ Ebin gibenaꞌa, guttinnoon diiroon ittoshi danemmoyich gabaꞌa, shiichaa ittoshi waan womoyich gabaa kuxxoye.

¹⁶ Ta gabito, ittoshi waanina besheree Makidoonee showooch hamonaa Makidoonee showoochee wotteree ittoshi waan shagonoyichiye; aroochee Yihudee showooch ta hammemmoyich taan ittoshi deggemmoyichiye.

¹⁷ Ebin tuniiya ta gabiyooba, ta tuniyaa beeton ariyaanoon gaboon shaddiibeeniye ta tuniito? Woyee hini alemeexi asheenaꞌo tunii beetoommon, ikke heciyoona eeha iichii, wochinnoon toonoone ii beeti gaboona shaddaabeeto ittoshich shaahii beetote?

¹⁸ Yeeri gibeneeto bi tunetoyich, ittoshich no gettaabeeti qaaro eeha iichii, wotta toonoone ii beeti gutte heciyoona toonoone.

¹⁹ No, ebi geto Sillaasinaa taanna, Ximootiyoosiyoo, ittoshi daggooch no beehooba, Yeerichi Bushoo Yesuus Kiristoosichon ittoshich no getteto eeha ii beeti qaaroonalli, eeha iichii, wotta toonoone ii beeti gutte heciyoona toonoone.

²⁰ Yeeri nooch gibenikkiti gibeno bulli Kiristoosinane eeha bi getteeto; ebichiye Yeerichi oogee yiiroyich Kiristoosina ameena no ii beeto.

²¹ Kiristoosina, ittoshina tookkii noon kupphii beetonaa biich no maddemmoyich noon huuttitona Yeerine.

²² Wotta biicho no tunee xiishee malletoon no toommooch geddito, gubb nooch bi immemmi wojjoonoo bekkiibeeti Yaafe Ayaanoon yechiyoo tuniiꞌi no mullooch kotiitoo, biine.

²³ Wochinnoon Qorontoos womo ta qajjeto, ittoshin ayinikkaache iyaꞌa ittoshich ta ariqqetoyichiye. Ebi iberoo bi tunoyich Yeeri ta miixoone.

²⁴ Yeeri toommooch mullee tooꞌiyoona manjii ittoshi neexoon ariito noone; ebich ittoshina tookkaa no shuunaabeeto ittoshi emiremmoyich qaawaꞌaanalli, ittoshi mullee tooꞌiyee toommooch doonjittinoon qaawaꞌa toonoone.