2 Pheexiroosi 3 - Kafa Linguistics Project

Yesuus Kiristoosichi Guttinnee Womon Qanniꞌi Quyo

^1-2 Ta shunechinaꞌote! And ittoshich ta kooraa beeti wocho hini guttinnee wochoone. Ebiyee aaf yaafe keemechinaꞌo gettiti qaaroon, wotta mishiraachechinaꞌo ittoshich dojjiti no Doononaa noon Wodiyechonochi getoon ittoshich shalligichaabee, ebi gutte ta wochoona tate gaboon ittoshi gabemmoyich ittoshin shuurikkiya koorito taane.

³ Yemeenee ciirooba boonoshi hajjee gonde qaatoon dabbemmi cooqqirechinaꞌo cooqqiribee woyemminaꞌo tunoon shiichiree ariibote.

⁴ Boonoshiyoo “ ‘Woyemmo taane’ iꞌi bi gibenikkito and illa aaye? No qaabbechinaꞌo qititinaꞌone; tunetaa showoonaa shimaayoona halleetoochee tiijjiꞌi and beddaahaa bulli mooyo aafi bi beemoochee shaddeyaanoone” gettemminaꞌone.

⁵ Wonna Yeeri bi gettiti qaaroona showoonaa shimaayoonon bi halloon shalligoon qaawaacheete; showoonoo aacoochee aacona shuunehe;

⁶ wotta aaco wonna showee toommooch beeti mooyo bullin maaꞌi aalliihe.

⁷ Are qaaroona wotta and hini beeti showoonaa shimaayoona Yeerin oogiyaani asheenaꞌo aallemmi nallee aabooch beddaahaa qaaqqoyich quyeetinaꞌone.

⁸ Ta shunechinaꞌote! Ittoshi hini ikke mooyon batteyaahote: Doono Yeer waanaa ikke qemo hume natoommo, hume natoo ikke qemoommone.

⁹ Ikkikkeenaꞌoyich bi shaahii beetoommon, Doono bi gibenikkiti qaaroon ceechoyich yagaachemmone; tunebaani koniyoona aalleyaachemmoyich, asho bulli bi axaaxoochee Yeer waan bi wottemmon shunniꞌi, ittoshicha iiniye bi haaꞌiibeeto.

¹⁰ Doonochi aabo gaayoochoommon diqqoona shaggemmone; arooba shimaayoo oogeti qaaroona gigebee aallemmone; shimaayooch beeti mooyinaꞌo bulli qaaqqoona miciree aallemminaꞌone; wotta showoonaa bi toommooch beeti mooyinaꞌo bullina miciree aallemminaꞌone.

^11-12 Ebi bulli ebiyoommon aallemmo bi tunegaata, Yeerichi aabo shagon quyebee, kaate bi woyemmoyichoo afaafinikkibee, yaafeeti qocoonaa Yeerin oogiibeeti beemonon beemo am shaahoon ittoshich qaawiibeeto tunehe? Arooba shimaayoo miciree aallemmone; shimaayooch beeti mooyinaꞌoo oogeti qaaqqee gaamoona muuyi aallemminaꞌone.

¹³ Tunebaani bi gibenikkiti gibenoommon, cadiqittino beeyemmi andire shimaayoonaa andire showoonon quyaabeeto noone.

¹⁴ Ebich ta shunechinaꞌote! Ebi mooyinaꞌon quyebee, Yeeri aafooch kiinaallo, bachaallo, tuneree mullee diggoona beebee ittoshi danemmoyich kupphebote.

¹⁵ No Doono Yeeri haaꞌii bi beeto ittoshi wodoyich bi tunoon shalligibote. No shunnaabeeti no manoo Phawuloosi Yeeri biich immiti ariyoona ittoshich bi koorito ebiniye.

¹⁶ Bi kooriti wocho bulliich wotta ebi mooyon gettitone; ebi are wocheenaꞌo daggooch shalligoyich iritiibeeti ikkikke mooyo beetone; ariyaaneenaꞌonaa ikke gaboona manjaani asheenaꞌona kooreeti bare Yaafe Macaafeexi qaaroon boonoshi wuuqqoommon, Phawuloosi kooriton wotta wuuqqii beetinaꞌone; eboshiyoo boonoshi toommooch aalloon deebii beetinaꞌone.

¹⁷ Illa ta shunechinaꞌote! Ebin shiichiꞌi ariito ittoshine; ebich ittoshi qelloona ebi are hukkechinaꞌochi muricoon dabbiree Yeeri toommooch beeti ittoshi mullee tooꞌiyee manjoochee ittoshi dihaachemmoyich, ittoshi qelloon ariibote!

¹⁸ Wotta no Doononaa noon Wodiyechona tuneti Yesuus Kiristoosi immiibeeti wojjoon danoonaa biin ariyoona dicote. Biich andoo, bulli yemeenoonoo oogee yiiroo tunebe. Ameena.