2 Pheexiroosi 2 - Kafa Linguistics Project

Koote Dojjechinaꞌo Waanee Qelloon Quyo

¹ Wonna Israꞌeeleenaꞌo daggooch kootoon keemmiibeeti keemechinaꞌo beetinaꞌone; ebiyoommon wotta koote dojjechinaꞌo ittoshi daggoochee tiyemminaꞌone. Eboshiyoo boonoshin biishee wodiiti Doono Yesuus Kiristoosin nookkeree, kittinneenaꞌochi mullee tooꞌiyoon aalliibeeti koote doyoon shokiibee giijjemminaꞌone; ebina kaatee aalloon boonoshi toommooch deebemminaꞌone.

² Meetinaꞌo yeelliibeeti boonoshi gonde qocoon dabbemminaꞌone; eboshi naboona iberee gommo naakkemmone.

³ Gijjoon boonoshi hiriggoochee tiyitona boonoshi halliti mooyon getibee ittoshin boggemminaꞌone; wonnee tiijjiꞌi Yeerichi nalloo boonoshi toommooch kindiya qannitone; boonoshi aallo yagaachemmone.

⁴ Yeeriyoo axaaxoon shuuneti maraakeenaꞌoyich ariqqeyaanoon, shiweree qaaqqooch duppiꞌi hoone manderooch tuneree nallee aabooch beddaahaa boonoshi quyeyemmoyich bi tuniitoyee;

⁵ wonna showee toommooch beeti asheenaꞌoyich ariqqeyaanoon, axaaxechi asheenaꞌo toommooch aalliibeeti aacon kindiiꞌi, cadiqee gommichon boonoshich gettiibeeti Noohin bare shabaatte asheenaꞌona tookkii bi wodiitoyee;

⁶ axaaxoon shuunoyich gabii beetinaꞌon cuuꞌiya Sodoominaa Gomoorinon tulloo tunii michii aalliiꞌi boonoshi toommooch bi nallitoyee;

^7-8 cadiqo tuneti Looxiyoo boonoshi daggooch beebee boonoshi hukkee shuunoon beegonaa waayoona qemi qemona oogeton xuuxeebee ebi are hukkechinaꞌochi yeelliibeeti qocoona oogeton iriteeti are cadiqe uro Looxin bi wodiitoyee;

^9-10 Doono Yeeri biin oogii beetinaꞌon boonoshi toommooch shaggiti iritoochee aabichiree bi wodiyemmo gaata, axaaxechinaꞌon, beshoon wotta eeꞌiibeeti meechi qaatoon ceechii beetinaꞌonaa boonoshiyee damba beeton qallayii beetinaꞌonon naxeree nallee aabooch beddaahaa aabichi bi quyemmo gaata arii beetone. Hini are koote dojjechinaꞌo aaf kuppheenaꞌonaa geecechinaꞌona tuneꞌi damba shimaayooch beeti oogee yiirechinaꞌon boonoshi naaggii beegaata, yeelleyaacheete.

¹¹ Tunebaani maraakeenaꞌo giidoonaa hakkoona boonoshiyee amoommon beshitinaꞌo boonoshi tunetaanoona, Doono Yeeri aafoochaa eboshi toommooch naageebee boonoshin taggeyaaneenaꞌone.

¹² Ebi are asheenaꞌo boonoshi ariyaani mooyoyich naagee beetinaꞌone; olletaa aalloyich shiijjeti, boonoshi halloona shalligoon hakkaani kubbi cooxoomminaꞌone; kubbi cooxinaꞌoo olletaa aalloommon ebiyoommon aallemminaꞌone.

¹³ Boonoshi gonde shuunoommona qochetaa xuuxoon beeggemminaꞌone; areddee aaboona meechi qaatoon ceechoo boonoshich oogeti emiroone. Gifirooch boonoshi beegaata kiineenaꞌonaa eeꞌeenaꞌona tuneꞌi buuraaqiibee ittoshi ikkittinee madooch tookkii kotee beetinaꞌone.

¹⁴ Maacheen beeggii beshiiyaaneenaꞌone; beddiye iꞌi axaaxee shuunoochee wotteyaaneenaꞌone. Ikke gaboona manjaani asheenaꞌon dawushii beetinaꞌone; hiriggoon doyiti mullo boonoshich beetone; uppeti shiijjereenaꞌone.

¹⁵ Kaame gommon qajjiꞌi muriccitinaꞌone; Beꞌoorichi bushoo Balaamichi gommon dabbitinaꞌone. Biyoo gondoon shuunoona daneebeeti gijjoon qaatiye.

¹⁶ Tunebaani Balaami Yeerichi getoon bi shaaddetoyich, noonaalli miime kure ashi qaaroommi qaaroona yibbaataꞌa are keemechon kaaraa bi geyee shuunoochee wochiyane.

¹⁷ Eboshi gaacaalli, shuuqqiti aachi xuuphoomminaꞌone; yubee yongo yongeꞌi shaccii aalliibeeti quboomminaꞌone; boonoshinoo dunne manderoo quyee beetone.

¹⁸ Geeciibee tuushee yibbaatoon yibbaatee beetinaꞌone; axaaxoona beetinaꞌo daggoochee muriccii kechii beetinaꞌon, bekkech batt boonoshi kecha iyaa, yeelliibeeti meechi qaatoona dawushii beetinaꞌone.

¹⁹ Areenaꞌo boonoshi qelloona eeꞌe shuunoyich hajjeeti guuninaꞌo tuneechii, bareenaꞌon “Guuchittinoochee kechemmo ittoshine” iibee gibenikkii beetinaꞌone. Asho, biin hajjiti mooyo amoyicholla guunone.

²⁰ No Doononaa noon Wodiyechona tuneti Yesuus Kiristoosin ariiꞌi, hini alemee eeꞌe shuunoochee boonoshi kechitoyee gubb, wochinnoon are eeꞌe shuunoona olleeꞌi boonoshi yechegaata, aafi boonoshi beemoyee beshoon gubbi beemo sheeqqito tunemmone.

²¹ Cadiqee gommon boonoshi ariitoyee gubb, boonoshich icheti yaafe getoochee gubb boonoshi wottoyee, are cadiqee gommon boonoshi ariyaan gaata, boonoshich gaaweshone.

²² “Kunaanoo bi cooyoon nappheya wottehe”; wotta “Gudini machaa bi itoyee gubb wochinnoon dengooch gedereya wottahane” ii beeti tochoo boonoshina iberetone.