2 Pheexiroosi 1 - Kafa Linguistics Project

¹ Yesuus Kiristoosichi guunonaa mishiraachechona tuneti Simoon Pheexiroosi waanee, No Nuggishoonaa noon Wodiyechona tuneti Yesuus Kiristoosi cadiqo bi tunetoyich, Kiristoosi toommooch nooch beeti, aaxxoo tuneti mullee tooꞌiyoon no danetoommon danetinaꞌoyich:

² Yeerinaa no Doono Yesuusinon ariyoona wojjoonaa diggoona ittoshich woddebe.

Ashoon Yeeri Ceegonaa Kaacona

³ Yesuus Kiristoosi bi oogee yiiroonaa bi deꞌittinoonoochee no qoodeyemmoyich, noon ceeggiton no ariyoona yaafeeti kashoonaa Yeerin oogiibeeti qocoona no beeyemmoyich bi Nuggishittinee giidoona qaawiibeeti mooyo bullin nooch immiye.

⁴ Ebina aaxxoonaa oogetona tuneti gibenoon nooch gibenikkiye; ebi gibenoon bi gibenikkito, hini alemeexi asheenaꞌo toommooch beechii, duubiibeeti gonde qaatoochee muriciree Nuggishoochi shuriyoochee qoodeyechon ittoshi tunemmoyichiye.

⁵ Ebich kuppheree shuunebee Kiristoosi toommooch ittoshi mullee tooꞌiyee toommooch deꞌittinoon, deꞌittinee toommooch ariyoon,

⁶ ariyee toommooch qellee quyoon, qellee quyee toommooch haaꞌiyoon, haaꞌiyee toommooch Yeerin oogiibeeti qocoona beemon,

⁷ Yeerin oogiibeeti qocoona beemi toommooch manittinee shunoon, manittinee shunee toommooch shoodeyoon daakkibote.

⁸ Ebi mooyinaꞌo ittoshich beegaata, woddeenoo boonoshi getigaata, no Doono Yesuus Kiristoosin ariyoona, gaacechonaa aafechonon ittoshin tuniyemminaꞌone.

⁹ Ebi mooyinaꞌo biich aalli asho, katinooch beeti mooyinaꞌon baach ciinniibeeto woyee aaf doogoone; ebiyee aafi bi axaaxoochee bi xalloon battetone.

¹⁰ Ebich ta maneenaꞌote! Ittoshi ceekkoonaa kaachoonon manjiyoyich, aafichoyee beshoon kupphebote. Ebi mooyinaꞌon ittoshi tuniigaata, ittoshin tephi dichemmi mooyo ciroona aalloone.

¹¹ Ebina no Doononaa noon Wodiyechonon tuneti Yesuus Kiristoosichi bulli yemeenee taatittineech gimi hakkoo ittoshich ichemmone.

¹² Ebich ebi mooyinaꞌon ariito ittoshi tunetaanoona, ittoshi waan beeti iberee qaaroona manjito ittoshi tunetaanoona, wochi wochiree ittoshich shalligichemmo taane.

^13-14 No Doono Yesuus Kiristoosi taach xalla bi gettitoommon, ta meenonaa ta kasheena barbaremmi aabo katinnito bi tunoon ta ariitoyich, batt kashoona beebee ebi mooyinaꞌon wochii wochiꞌi shalligichiibee ittoshin qaalliyoo taach qaawiibeeto tuneꞌi bekkehe.

¹⁵ And ta qiiccaabeeto, ta qititoyee gubb, bulli aaboon ebi mooyinaꞌon ittoshi shalligemmoyichiye.

Kiristoosichi Oogee Yiiroon Beeggiti Miixeenaꞌo

¹⁶ “No Doono Yesuus Kiristoosi oogeti giidoona woyemmone” iyaꞌa no gettaa beegaata, ittoshich no arichiito, bi oogee yiiroon no hajjee aafoona beeggaꞌaanalli, maroona asho yibbaateti tochoon waayaꞌa toonoone.

¹⁷ Worganikkiti shimaajji oogee yiirechi, damba Yeer waanee “Biinna ta emiriti, ta shuni Bushoo hinine” ii beeti qaaro biich waahooba, Nihoo Yeeri biin oogiihe; oogee yiiroonoo biich immiye.

¹⁸ Nowoo yaafeeti guudi toommooch biinna tookkaa no beetaa, hini qaaro shimaayoochaa bi gettii beetaa waayehone.

¹⁹ Ebich keemechinaꞌo keemmiti qaaroon beshoon xiishaꞌa iberiibeeto noone; showoo harimmi wottoon haree xojjeno aaxxoommon Kiristoosichi bekko ittoshi mullooch bi aaxxemmi wottoon, asho mandere xaaꞌooch aaxxeebeeti ceechoon bi yeshoommon hini keemee qaaroon ittoshi yeshigaata, ittoshich gaaweto tunemmone.

^20-21 Bulliyee shiichiree ebin shalligibote: Asheenaꞌo Yaafe Ayaanoona yaabeeꞌi Yeeri boonoshich immiti wochoon gettiyeetalli, keemo ciroona ashi daaggoona waataanoone. Ebich asho koniyoona Yaafe Macaafooch kooreeti keemoon bi hajjee gaboona tachiꞌi biishoon hakkaache.