2 Kiinoo 9 - Kafa Linguistics Project

Sheebee Taatee Solomoon Waan Womo

¹ Sheebee taatee worganikkiti Solomoonichi shalligoon waayaꞌa, turitoona biin phireya waahan. Meeti deennechon dabbiyaꞌa, qimaamoon, wodde aachoonaa aaxxe xaqqoonon gaaleenaꞌooch xaaniyaꞌa, Yerusaalem waahan. Solomoon waan giyaꞌa, bi mullooch beeti echo bullin biin echahan.

² Solomooniyoo bi echeto bullin wochiye. Solomooni biishaani turito amolla aalloone.

³ Sheebee taatee Solomoonichi ariyoon, bi haggiti taatee kexon,

⁴ bi madooch giddeebeeti maayoon, bi iraasheenaꞌochi kotee qocoon, bi guuninaꞌochi maddee yawoonaa boonoshi tahoonon, bi xoofechinaꞌonaa boonoshi tahoonon, Doono Yeerichi yaafee kexooch bi deejjiti, micciibeeti deejjoon beeggaꞌa, kashkuxoon worganahan.

⁵ Biyoo taatoyich ishichiyan: “Ta showooch beechaa, ne shuuneti shuuneechonaa ne ariyeechonon ta waayeti woroo iberoone.

⁶ Tunebaani waaꞌa ta hajjee aafoona ebi mooyinaꞌon ta beeggemmi wottoon iberiyaane taane. Tawoo ebi ta beeggeti moochi qatonolla waayeyaane taane. Ta waayeti woroyee beshe ariyecho neene.

⁷ Ne asheenaꞌo am shaahoon diireetinaꞌone! Bulli aaboon ne aafooch neexeꞌi, ariyoona ceenniti ne yibbaatoon waayeebeeti ne maddechinaꞌo am shaahoon diireetinaꞌone!

⁸ Neenna emiriꞌi, bi shigoona ne taatemmoyich tuniiti, ne Nuggishoo Doono Yeeri diireebe. Ne Nuggishoo Israꞌeeleenaꞌon shunniꞌi, bulli yemeenoon manjiree boonoshi beeyemmoyich bi qaawitoyich, dayinnetoonaa cadiqittinoona ne qeejjemmoyich boonoshi toommooch neen taatiihe” iyan.

⁹ Aroochee taatoyich awudde hume kiilo giraam bede aachoon, dofee qimaamoonaa aaxxe xaqqoonon immahan. Sheebee taatee, taatoo Solomoonich immetoommi gaawe qimaamo ciroona aalloone.

¹⁰ Ofiiree showoochee aachoon deebiti, Kiraamichi asheenaꞌonaa Solomoonichi asheenaꞌona naddee mixonaa aaxxe xaqqoonon wotta deebitinaꞌone.

¹¹ Taatoo naddee mixoochee Doono Yeerichi yaafee kexonaa bi taatee kexonochi daqqelloon, wotta shoddechinaꞌoyich giishi ximboonaa ooge ximboonon shuunehe. Ebiyoommi qiiceenaꞌo Yihudee showooch ciroona bekkee ariyaaneenaꞌone.

¹² Taatoo Solomooni Sheebee taatee qaawitonaa echetona bullin biich immiye. Biich bi deebetoyee beshe mooyon Sheebee taateyich immiye. Biyoo bi asheenaꞌona tookkaa bi showooch wottaꞌa hammahan.

Solomoonichi Gaanno

^13-14 Solomoonich nati natooch giyiibeeti aachoo hiyaa keejje hume kiilo giraam bedoone. Ebiyoo giixechinaꞌo giijjii beetoyee baroone. Arabee taateenaꞌo bullinaa woraaferasheenaꞌona biich aachoonaa birewoonon deebii beeheete.

¹⁵ Taatoo Solomooni aachoon qicciiꞌi gutte balle ogooge gaachoon shuuniihe; ikkikke gaachooch giyito, shiritte balle sheqeelee aachoone.

¹⁶ Ebiyoommon wotta aachoon qicciiꞌi keejje balle gishiishi gaachoon shuuniihe; ikkikke gaachooch giyito keejje balle sheqeelee aachoone. Taatoo eboshin, Libanoosi Shaaroo getteebeeti taatee kexooch kotiihe.

¹⁷ Aroochee taatoo dangeyi gashoochee ooge taatee qeenon shuuniiꞌi, xalle aachoona dikkiihe.

¹⁸ Taatee qeenooch kecheebeeti shiritte daqqeenaꞌo beetinaꞌone; taatee qeenona tookkii yeshiitaa aachoochee shuuneeti, baatoo kashemmi mooyo beetone; ebi qeechi okkinaa hachinooch kishee degeenaꞌo beetinaꞌone. Ebi degeenaꞌochi gaꞌooch gutte daaheree misilo neexeꞌi beetone.

¹⁹ Shiritte daqqooch, bi ikkikkoona yoochinaa qanninooch ikkikke daaheree misilo neexetone. Ebiyoommi taatee qeeno amee taatee showoocholla ciroona shuunee ariyaanoone.

²⁰ Taatoo Solomooni uchiibeeti xoofoo bulli shuuneeto, aachoocheeniye. Libanoosi Shaaroo getteebeeti taatee kechi qiico bulli shuuneeto, xalle aachoocheeniye. Solomoonichi taatee yemeenooch birewoo qallayeetone.

²¹ Taatoyich Kiraamichi asheenaꞌona tookkii Tarisheshee showooch hammiibeeti markabeenaꞌo beetinaꞌone. Ebi markabeenaꞌo keejj keejje natooch ikke wottoon, aachoon, birewoon, dangeyi gashoon, shakkoonaa sheexxoonon deebii beeheete.

²² Taatoo Solomooni, showee toommeexi taateenaꞌo bulliyee beshiti gaannechonaa shalligechona tunehe.

²³ Yeeri Solomoonich immiti shalligoon waayoyich, showoo bulliich beeti taateenaꞌo bi aafooch shagoyich qaawii beeheete.

²⁴ Boonoshiyoo boonoshi ikkikkoona nati natooch, birewee qiicoonaa aachee qiicoonon, tahoon, ginee qiicoon, qimaamoon, haresheenaꞌonaa bicereenaꞌonon wojjoon biich yechii waa beeheete.

²⁵ Solomooni, bi gaarinaꞌonaa bi haresheenaꞌonoyich awudde hume magedeenaꞌonaa aaraa gutte hume hareshechinaꞌona beetinaꞌone. Eboshinoo gaarinaꞌon bi kotiibeeti katemeenaꞌonaa bi beeti Yerusaaleminooch boonoshi beeyemmoyich tuniihe.

²⁶ Biyoo Efiraaxisi aacoochee tiijjii Filsixeemee showoonaa Gibitsee showee daaroonooch beddaahaa beeti taateenaꞌo bulli toommooch taatehe.

²⁷ Taatoo birewoo xaqqoochoommon Yerusaalem bi woddemmoyich tuniihe. Yigee mixonoo Shefeeli worebe showooch colleebeeti caaroochoommon bi woddemmoyich tuniihe.

²⁸ Haresheenaꞌo Solomoonich Gibitsee showoonaa showoo bullinoochee waa beeheete.

Qaminona Giddeti Solomoonichi Taatee Yemeeno

²⁹ Solomooni shuuneti eche shuunoo batti battichoochee tiijjii ciireexooch beddaahaa, keemechi Naataanichi kiinee macaafooch, Shiloohee asho tuneti Akiyi keemee macaafooch, Nebaaxi bushoo Yeroboꞌamichon yaaꞌoo beeggiti, yaaꞌechi Iidichi yaaꞌee macaafooch kooreetone.

³⁰ Solomooni Yerusaalem beechii Israꞌeelee showoo bulliich aabbe naton taatehe.

³¹ Solomooni qitiꞌi bi qaabbechinaꞌo waan xaꞌeehe; bi nihoo Daawiti Katemooch duukkehe. Bi bushoo Roboꞌami bi xaaꞌooch kereeꞌi taatehe.