2 Kiinoo 8 - Kafa Linguistics Project

Solomooni Shuuneti Baribare Shuuneenaꞌo

¹ Solomooni Doono Yeerichi yaafee kexonaa bi taatee kexonon haggii bi qanniiti hiye nati ciirooch,

² Kiraami biich immiti katemeenaꞌon wochinnoon shuuneꞌi Israꞌeeleenaꞌon arooch kotiihe.

³ Aroochee Solomooni Hamaat Tsobaaha hammiꞌi kochii yechiye.

⁴ Barahooch beeti Tadimoori katemoon shuuniihe; Hamaatee showooch maayoonaa baribare mooyona kiceyemmi katemeenaꞌon shuuniihe.

⁵ Wotta Dambee Beet Horooninaa Deshi Beet Horooninooch uxeroo, shaaqqoonaa tuggoona beeti manje katemeenaꞌon shuuniihe.

⁶ Baalaati katemoon, biich beeti, maayoonaa baribare mooyona kiceyemmi katemeenaꞌo bullin, gaarinaꞌochi katemeenaꞌo bullinaa hareshechinaꞌochi katemeenaꞌonon shuunehe; shuuno bi qaawito bullin Yerusaalem, Libanoosee showoonaa bi taatee showoo bullinooch shuunehe.

^7-8 Israꞌeeleenaꞌo boonoshin wuxii aalliyaanoon qayaa are showooch echeti, Israꞌeeleenaꞌo tuneyaani asheenaꞌochi shiijjereenaꞌon, eboshiyoo Hiteenaꞌon, Amooreenaꞌon, Ferizeenaꞌon, Hiweenaꞌonaa Yebuseenaꞌonon Solomooni guuno tuniiꞌi maddiihe; hanaach beddaahaa guuninaꞌone.

⁹ Tunebaani Solomooni Israꞌeeleenaꞌo daggoochee koninolla guuno tuneree bi shuunoon boonoshi shuunemmoyich tuniyaanoone. Boonoshiyoo bi ginee naayinaꞌo, iraasheenaꞌo, bi gaarichi ukkireenaꞌonaa bi hareshechinaꞌona tunee beeheete.

¹⁰ Boonoshi daggooch wotta guunon tuneꞌi maddee beetinaꞌon ciini shuuniyemmi, gutte ballaa aache iraasheenaꞌo beetinaꞌone.

¹¹ Aroochee Solomooni, “Doono Yeerichi taabooto giyiti xaaꞌoo yaafoo bi tunetoyich, ta mechee Israꞌeelee taatoo Daawiti kexooch beemo biich qaawiyaache” iꞌi, Farooni busheen Daawiti Katemoochee biich bi haggiiti kexooch daammiye.

¹² Solomooni yaafee kechi aafooch bi shuuniiti Doono Yeerichi deejjee gudooch micciibeeti deejjoon Doono Yeerich deejjiye.

¹³ Bi deejjito, Muusi gettitoommon, baari baaree aaboon, ebiyoo shambetooba, agenee keyi baarooba, wotta nateexi keejje baarooba, ebi geto Shittoo Giyaani Kochi Baarooba, Maayi Qecci Baaroobinaa Bashee (Yambaaree) Baaroobinane.

¹⁴ Bi nihoo Daawiti dojjiti doyoommon qeesheenaꞌon boonoshi maddi maddooch, Leweenaꞌon wotta shoddoona boonoshi galletemmonaa qeesheenaꞌon boonoshi gaachemmonon tuniihe. Yeer asho Daawiti gettitoommon, kellechinaꞌon boonoshi kaalli kaalloona kelleenaꞌo bullin boonoshi quyemmoyich tuniihe.

¹⁵ Ginjabeeteenaꞌochonaa baribare mooyinaꞌochonon ciinnii beetona taatoo boonoshich gettiti getoochee qeesheenaꞌonaa Leweenaꞌona okk hach getaaneenaꞌone.

¹⁶ Ebiyooba Solomooni shuuneya bi gabiti shuunoo bulli, ebiyoo Doono Yeerichi yaafee kexon hecoochee tiijjiꞌi tacooch beddaahaa beeti shuunoo bulli kaamehe. Ebina Doono Yeerichi yaafee kexo qanniye.

¹⁷ Aroochee Solomooni Edoomee showooch beeti, baharee gasheexi Etsiyoon Geberi katemoonaa Elaati katemoonooch hammiye.

¹⁸ Kiraami markabeenaꞌonaa baharee yawechi asheenaꞌonon bi asheenaꞌona biich daachiihe. Boonoshiyoo Solomoonichi asheenaꞌona tookkii Ofiiree showooch hammiyeete. Aroochee aaraa uuche hume kiilo giraamee aachoon taatoo Solomoonich deebiyeete.