2 Kiinoo 7 - Kafa Linguistics Project

Yaafee Kexo Diireyoo

¹ Solomooni corootoon bi ciichimmona, qaaqqoo shimaayoochee kindiꞌi micciibeeti deejjoonaa bare deejjoonon maahe. Doono Yeerichi oogee yiiroo yaafee kexooch ceenniye.

² Doono Yeerichi oogee yiiroo Doono Yeerichi yaafee kexooch bi ceennitoyich, qeesheenaꞌo yaafee kexooch gimon hakkaaneenaꞌone.

³ Israꞌeelee asho bulli qaaqqoo kindoon, Doono Yeerichi oogee yiiroo yaafee kechi toommooch bi beemonoo beeggiꞌi, baroona showooch guufeechii, “Doono Yeeri deꞌoone; bulli yemeenoon shoodechone” iibee goyinneheete; galleteenoo iyeete.

⁴ Aroochee taatoo Solomooninaa asheenaꞌo bullina Doono Yeeri aafooch deejjoon deejjiyeete.

⁵ Taatoo Solomooni hiyaa gutte hume wuronaa balli hiye hume bagoonon deejjiye. Ebiyoommon taatoonaa asheenaꞌo bullina Yeerichi yaafee kexon yaafiyeete.

⁶ Qeesheenaꞌo boonoshi xaaꞌooch neexeheete. Leweenaꞌoo wotta, wonna Daawiti shoddoona Doono Yeerin galletoyich bi shuuneti shoddee qiicoon yexxii kaachiibee, “Bulli yemeenoon shoodechone; Doono Yeerin galletebote” iibee shoddoona Doono Yeerin galletee beeheete. Qeesheenaꞌo boonoshi ciinoochaa tiroon huggii beetaa, asheenaꞌo bulla neexee beeheete.

⁷ Solomooni Doono Yeerichi yaafee kechi ciinooch beeti, addibaabee daggeexi xaaꞌoon yaafiye. Aroochaa micciibeeti deejjoon, ikkittinee deejjee awuyonoo giddiihe. Ebin bi tuniitoo, gooshoochee bi shuuniiti deejjee gudo micciibeeti deejjoon, maayi buuroonaa awuyonon deejjoyich bi giishetoyichiye.

⁸ Arooba Solomooni biinna tookkii beeti Israꞌeeleenaꞌo bullina tookkii, ebi geto Hamaati katemooch beshe kaattoochee tiijjii Gibitsee aacooch beddaahaa beeti showoochee kiceeti ooge iitoona tookkii, shabaatte qemi baaroon baariye.

⁹ Shabaatte qemon deejjee gudoon yaafiyeete; wotta shabaatte qemon baaroon boonoshi baaritoyich, shimittinnee qemooba yaafeeti kiceyoon kiceeheete.

¹⁰ Shabaattinnee agenee hiyaa keejjinnee qemooba, taatoo asheenaꞌon boonoshi kexi kexooch daachiihe. Doono Yeeri Daawitich, Solomooninaa bi asheenaꞌo tuneti Israꞌeeleenaꞌonoyich bi tuniiti deꞌe mooyoyich oogichii emiriibee hammiyeete.

Solomoonich Wochinnoon Doono Yeeri Bekko

¹¹ Solomooni Doono Yeerichi yaafee kexonaa bi taatee kexonon haggii qanniihe. Doono Yeerichi yaafee kexonaa bi taatee kexonooch shuuneya bi mulloona bi gabito bullin shuunee ciichiye.

¹² Doono Yeeriyoo xumoona bekkeꞌi Solomoonich ishichiye: “Ne corootoon waayeto taane; hini xaaꞌoon taach deejjoo giddemmi yaafee kexo bi tunemmoyich kaacceto taane.

¹³ “Amiyo dihaachemmoyich shimaayoon ta hicaa, woyee showoon bi yexxemmoyich gechoon ta deejjaa, woyee qeqqichiibeeti biiyoon ta asheenaꞌo toommooch ta deejjaa,

¹⁴ ta shigoona ceekketi ta asheenaꞌo boonoshi qelloon giishiiꞌi boonoshi qollegaata, taan boonoshi qaawigaata, boonoshi gonde gommoochee boonoshi wottegaatoo, shimaayoochaa boonoshi qolloon waayemmo taane; boonoshi axaaxoon maaremmo taane; boonoshi showoonoo wodiyemmo taane.

¹⁵ And hini yaafee kexo waan ciinnemmo taane; hini xaaꞌoochaa corooteebeeti corootoonoo elle waayemmo taane.

¹⁶ Andoo ta shigo aroochaa bulli yemeenoon bi ceekkemmoyich, hini yaafee kexon kaacceto taane; yaafiyanoo ito taane. Ta aafoonaa ta mulloona bulli aabooch arooch tunemmone.

¹⁷ “Newoo ne nihoo Daawitichoommon, ta getoon ne waayegaata, ta getteto bullin ceechaa ne tuniigaata, ta qociyoonaa ta doyoonon ne quyegaatoo,

¹⁸ ne nihoo Daawitich, ‘Israꞌeeleenaꞌon qeejjemmi asho ne yaroochee mucceyaachemmone’ iyaꞌa wogoon ta giyetoommon, ne taatee qeenon manjiyemmo taane.

¹⁹ “Tunebaani neennaa ne asheenaꞌona taan qajjiꞌi ittoshi wottegaata, ittoshich ta immeti doyoonaa sheeroonon ittoshi qayigaata, hammiinoo bare nuggishoyich ittoshi goyinnee madde gaatoo,

²⁰ ittoshich ta immeti showoochee ittoshin waaxxemmo taane; ta shigo arooch bi beeyemmoyich ta yaafiti hini yaafee kexon duppemmo taane; aageteenaꞌo bulli ebi mooyon tochibee cooqqiremmoyich tuniyemmo taane.

²¹ Hini yaafee kexo and worganeeto bi tunetaanoona, bi gaꞌoona beshee beetinaꞌo bulli worganeebee, ‘Doono Yeeri hini showoonaa hini yaafee kexonochi toommooch ebiyoommi mooyon bi tuniito, amoyich tunehe?’ gettemminaꞌone.

²² Boonoshiyoo wochiree, ‘Gibitsee boonoshin kichiti boonoshi qaabbechinaꞌochi Nuggishoo Doono Yeerin qajjiichii, bare nuggisheenaꞌon boonoshi dabbitoyich, boonoshi goyinnee maddetoyich, ebi gonde mooyo bullin boonoshi toommooch deebiye’ gettemminaꞌone” iye.