2 Kiinoo 5 - Kafa Linguistics Project

¹ Ebiyoommi gommona Solomooni Doono Yeerichi yaafee kexooch bi shuuneti shuunoo bulli ciirehe. Biyoo bi nihoo Daawiti Yeerich kichiti birewoon, aachoonaa qiico bullinon deebiꞌi yaafee kechi ginjabeetooch kotiihe.

Taabooto Yaafee Kexooch Womo

² Aroochee Solomooni, Doono Yeerichi wogee taabootoon Daawiti Katemoo Tsiyoonee boonoshi deebemmoyich, Israꞌeelee geeneenaꞌon, yoodee ukkireenaꞌo bullinaa Israꞌeelee asheenaꞌochi yaree ukkireenaꞌonon Yerusaalem ceeggiye.

³ Ebina Israꞌeeleenaꞌo bulli, shabaattinnee agenooch baareebeeti baarooba taatoo aafooch kiceeheete.

⁴ Israꞌeelee geeneenaꞌo bulli waammona Leweenaꞌo taabootoon tiijjiyeete.

⁵ Taabootoon, danee duukkaanoon, danee duukkaanee daggooch beeti yaafeeti qiico bullinoo deebiyeete. Ebi qiiceenaꞌon qeesheenaꞌonaa Leweenaꞌona deebiyeete.

⁶ Taatoo Solomooninaa bi aafooch kiceeti Israꞌeelee iitoo bullina taabootee aafoochaa boonoshi meetoochee tiyitona haddaa ciyaani bageenaꞌonaa gatteenaꞌonon deejjiyeete.

⁷ Qeesheenaꞌo Doono Yeerichi wogee taabootoon yaafee kexooch beeti, bi xaaꞌooch, Yaafe Xaaꞌeexi Yaafooch giijjiꞌi, kiruubeenaꞌochi qoshee dechiich kotiiheete.

⁸ Kiruubeenaꞌoo taabootee toommooch boonoshi qoshoon yaggiꞌi, taabootoonaa bi yareenaꞌonon qerii beeheete.

⁹ Yareenaꞌo genjeenaꞌo boonoshi tunetoyich, Yaafe Xaaꞌeexi Yaafoyee aaf beeti Yaafe Xaaꞌoochaa bekkee beeheete; tunebaani yaafee kexoyee maachaa bekkeyaaneenaꞌone. Ebi yareenaꞌo hanaach beddaahaa arooch beetinaꞌone.

¹⁰ Israꞌeeleenaꞌo Gibitsee boonoshi keyiyooba, Doono Yeeriyoo boonoshina tookkii wogoon bi giyiyooba, Kooreebi guudoochaa Muusi kotiiti gutte yalle xaqqeenaꞌoyee besh taabootee maacooch amolla aalloone.

Doono Yeerichi Oogee Yiiroo Bekko

¹¹ Qeesheenaꞌo Yaafe Xaaꞌoochee kechiyeete. Arooch beeti qeesheenaꞌo boonoshi kaalloon quyeyaanoon boonoshi qelloon yaafitinaꞌone.

¹² Shoddechi Leweenaꞌo bulli, eboshiyoo Asaafi, Hemaani, Yedutuuni, boonoshi anaami bushiisheenaꞌonaa boonoshi maneenaꞌona muttee tuppoochee cicii yokketaa shippeti tahoon tahee, qaaxilloon, ooge ximboonaa giishi ximboonon yexxii kaachiibee, deejjee gudee gaꞌooch, aabi-keyo waanaa neexee beeheete. Boonoshina tookkiinoo balli hiye qeesheenaꞌo tiroon (waaringoon) huggii beeheete.

¹³ Tiroon huggii beetinaꞌonaa shoddechinaꞌona Doono Yeerin galletee oogiibee: “Deꞌo bi tunetoyich, bulli yemeenoon shoodecho bi tunetoyich, Doono Yeerin galletebote” iibee ikke kashoona qaaroon oogichiꞌi, tiroona, qaaxilloonaa shoddee qiico bullina Doono Yeerin galleteheete. Boonoshi galletemmona, qubo Doono Yeerichi yaafee kexooch ceenniye.

¹⁴ Doono Yeerichi oogee yiiroo Doono Yeerichi yaafee kexooch bi ceennitoyich, qeesheenaꞌo qubee naboona neexeꞌi maddoon mawiiheete.