2 Kiinoo 4 - Kafa Linguistics Project

Yaafee Kechi Maddooch Heechiti Qiiceenaꞌo

¹ Taatoo Solomooni, bi gidoo hiye hiroo, bi maaco hiye hiroo, bi neexo aashire hiroo tuneti gooshee deejjee gudoon shuuniihe.

² Aroochee ooge gamini goonoon gooshoochee shuuniihe. Ebi goonoo guude gawo tuneechii hachi bi noonoochee okki bi noonooch beddaahaa aashire hiroo, bi neexo uuche hiroo, bi guude gawo shaashe hiroone.

³ Bi noonoyee desh ikkikke hiroon wokkiꞌi aashiri aashire gattee misileenaꞌo gutte yaaroona beetinaꞌone; eboshiyoo goonoo gooshoochee shuuneehooba ikkochii yeshiitaa shuuneetinaꞌone.

⁴ Goonoo koteto, aaraa gutte gattee misilee toommoochiye. Ebi gatteenaꞌo boonoshi beeto, keemo dambi-waan, keemo aabi-gimo waan, keemo deshi-waan, wotta keemo aabi-keyo waan, boonoshi gubboon maac boonoshi aafoonoo maach wochiꞌiniye.

⁵ Ebi goonoo ikke ciixi qach bede taggoone; bi noonoo siinoochoommon, mocee bungoochoommonoo yeeppoone; shiche hume neetira bede aacon yechii beetone.

⁶ Aroochee wotta aashire gishiishi gooneenaꞌon shuuniiꞌi uuchoon deshi-waan, uuchoon dambi-waan kotiihe. Ebi gishiishi gooneenaꞌo micciibeeti deejjoyich giddeebeeti gijjeenaꞌochi meeno aroochaa macheyemmi gooneenaꞌone; ooge gamini goonooch beeti aaco qeesheenaꞌo aroochee machemmi aacone.

⁷ Shiichiꞌi getteetoommon, aachoochee aashire ceechee kotoon shuuniiꞌi, uuchoon deshi-waan, uuchoon dambi-waan, yaafee kechi maacooch kotiihe.

⁸ Wotta aashire madelloon shuuniiꞌi, uuchoon deshi-waan, uuchoon dambi-waan, yaafee kechi maacooch kotiihe. Balle quppe saaneenaꞌonoo aachoochee shuuniihe.

⁹ Qeesheenaꞌoyich tunemmi addibaaboon, ooge addibaaboonaa bi kellee shaaqqeenaꞌonon shuuniihe; kellee shaaqqeenaꞌonoo aachoona dikkiihe.

¹⁰ Goonoonoo yaafee kexoochaa aabi-kechaa deshi-waani qachi gocooch kotiihe.

¹¹ Huraami gubeenaꞌon, maankeenaꞌonaa quppe saaneenaꞌonon shuunehe. Ebina Huraami taatoo Solomoonich shuuneya bi wonniti, Yeerichi yaafee kechi qiiceenaꞌon shuunee ciichiye.

¹² Biyoo gutte giimbeenaꞌon, giimbeenaꞌochi cillooch beeti guboommi gutte mooyinaꞌon, ebi guboommi gutte mooyinaꞌon qeremmi dabboommi gutte mooyinaꞌon,

¹³ giimbeenaꞌochi cillooch beeti, guboommi gutte mooyinaꞌon boonoshi qeremmoyich, gutte dabbeenaꞌochi gutti gutte yaaroona awudde balle romaanee michi aafoon,

¹⁴ goonee koteenaꞌonaa gishiishi gooneenaꞌonon,

¹⁵ gamini ooge goonoonaa bi dechiich beeti aaraa gutte gattee misileenaꞌonon,

¹⁶ gubeenaꞌon, maankeenaꞌon, gomeenaꞌonaa eboshich tunemmi, baribare qiico bullinon shuunehe. Huraam Abbi Doono Yeerichi yaafee kexoyich taatoo Solomoonich qiiceenaꞌo bullin bi shuuneto wacciibeeti gooshoocheene.

¹⁷ Taatoo Solomooni eboshin bi shuuniito, Yoordaanoosi bambeexi Sukootinaa Tsereedinochi gutte daggooch beeti, nuuqqoo acheebeeti xaaꞌoochaanane.

¹⁸ Solomooni meeti qiiceenaꞌon bi shuuniitoyich shuunooch heechiti gooshoo ambiche kiilo giraamo gaata ariyoon hakkito aalloone.

¹⁹ Solomooni Yeerichi yaafee kexoyich tunemmi qiiceenaꞌo bulli aachoochee boonoshi shuuneyemmon tuniihe; eboshiyoo, aachee deejjee gudo, yaaree kosho kotemmi madelleenaꞌo,

²⁰ shiichiꞌi getteetoommon, Yaafe Xaaꞌeexi Yaafee ciinooch aaxxemmi xalle aachoochee shuuneeti, maqirajjoonaa bi ceecheenaꞌona,

²¹ xalle aachoochee shuuneeti, bechee bungee misileenaꞌo, ceecheenaꞌonaa guceteenaꞌona,

²² ceechee aaxxee woshiqee ciitoon qephemmi qafeteenaꞌo, quppe saaneenaꞌo, ixaanee qiiceenaꞌonaa qaaqqee buno yecheyemmi qiiceenaꞌonane. Eboshi bulli aachoochee shuuneetinaꞌone. Yaafe Xaaꞌeexi Yaafooch giyeebeeti kellee shaaqqeenaꞌonaa yaafee kechi kella giyeebeeti shaaqqeenaꞌona aachoona dikkeetinaꞌone.