2 Kiinoo 36 - Kafa Linguistics Project

Yihudee Taatoo Yoꞌakaazi Mooyo

¹ Yihudee asheenaꞌo Yosiyaasi bushoo Yoꞌakaazin bi nihoochi xaaꞌooch Yerusaalemaa taatiiheete.

² Yoꞌakaazi bi taatehooba, bi eeno hiyaa keejje natone. Yerusaalem beechii keejje agenoon qeejjiye.

³ Aroochee Gibitsee taatoo Yerusaalemaa bi taatittinoochee biin kindiihe. Yihudee showoo keejje humaa awudde balle kiilo giraamee birewoonaa shaashaa awudde kiilo giraamee aachoonon gibiro bi qoccemmoyich tuniihe.

⁴ Aroochee Gibitsee taatoo, Yoꞌakaazichi manoo Eliyaqimin Yihudee showoonaa Yerusaaleminooch taatiihe; bi shigoonoo Yoyaqiimi iꞌi shaddiye. Nekiyoo Eliyaqimichi manoo Yoꞌakaazin cuchii Gibits daammiye.

Yihudee Taatoo Yoyaqiimi Mooyo

⁵ Yoyaqiimi bi taatehooba, bi eeno hiyaa uuche natone. Yerusaalem beechii aaraa ikke naton qeejjiye. Bi Nuggishoo Doono Yeeri aafooch gonde mooyon tuniihe.

⁶ Baabloonee taatoo Nabukadinatsori Yihudee showoon kochii yechiye; Yoyaqiimin gooshee qoqqaannoona cuchiꞌi Baabloonee showooch daammiye.

⁷ Nabukadinatsori wotta Doono Yeerichi yaafee kechi qiicoochee daammiꞌi, Baabloonee showooch beeti bi taatee kexooch kotiihe.

⁸ Yoyaqiimi shuuneti eche shuunoo, bi tuniiti ciigiiti mooyonaa bi toommoochee daneti gonde mooyo bullina Israꞌeelee taateenaꞌonaa Yihudee taateenaꞌonochi kiinee macaafooch kooreetone. Bi bushoo Yoyakiini bi xaaꞌooch kereeꞌi taatehe.

Yihudee Taatoo Yoyakiini Mooyo

⁹ Yoyakiini bi taatehooba, bi eeno aaraa shimitte natone. Yerusaalem beechii keejje agenaa aashire qemon qeejjiye. Biyoo Doono Yeeri aafooch gonde mooyon tuniihe.

¹⁰ Naawooba taatoo Nabukadinatsori Baabloonee showooch biin cuchiꞌi daammiye; Doono Yeerichi yaafee kexeexi aaxxi qiicoonoo biinna tookkii daammiye. Bi manoo Sedeqiyaasin Yihudee showoonaa Yerusaaleminooch taatiihe.

Yihudee Taatoo Sedeqiyaasi Mooyo

¹¹ Sedeqiyaasi bi taatehooba, bi eeno hiyaa ikke natone. Yerusaalem beechii aaraa ikke naton qeejjiye.

¹² Bi Nuggishoo Doono Yeeri aafoochoo gonde mooyon tuniihe. Doono Yeerichi qaaroon biich gettiti keemechi Erimiyaasi aafooch bi qelloon giishiyaanoone.

Yerusaalemi Happeyoo

¹³ Sedeqiyaasi Yeerina biin wogiiti taatoo Nabukadinatsori toommooch hukkoon shuunehe. Israꞌeelee Nuggishoo Doono Yeer waan wottoon qajjii, bi mulloon manjiiꞌi babberoo tunehe.

¹⁴ Ebiyoommon wotta qeesheenaꞌochi wulleenaꞌonaa asheenaꞌona aageteenaꞌochi ciigiiti doyoon dabbiibee, Yerusaalemi beeti, Doono Yeeri yaafiti yaafee kexon eeꞌiibee, aafichoyee beshoon gibeneyee qayona beshii beshii hammiyeete.

¹⁵ Boonoshi qaabbechinaꞌochi Nuggishoo Doono Yeeri bi asheenaꞌonaa bi qeyi xaaꞌoonoyich bi ariqqetoyich, bi wocheyechinaꞌon wochii wochii deejjii beehe.

¹⁶ Tunebaani boonoshi, Doono Yeerichi wocheyechinaꞌon cooneheete; bi qaaroonoo hoxeheete; bi keemechinaꞌonoo qallayiyeete. Ebich Doono Yeeri kaaro bi maccee toommooch kindiye; ebi shaahe kaaroochee muricon hakkaaneenaꞌone.

¹⁷ Ebich Doono Yeeri Baabloonee taatoon boonoshi toommooch deejjiye. Ebi taatoo boonoshi gurimaasheenaꞌon yaafee kexoochaa goraadoona guuriye. Biyoo gurimaashoon tuneba gidiideen, geeneton tuneba geenee baayeton, ariqqaalloon wuxiye. Doono Yeeri bullinolla Nabukadinatsorichi kishooch beshiiꞌi immiye.

¹⁸ Nabukadinatsori Doono Yeerichi yaafee kexeexi qiico bullin giisho oogoo getaanoon, Yeerichi yaafee kexeexi gaannoon, taatoonaa bi iraasheenaꞌonochi gaanno bullin Baabloonee showooch daammiye.

¹⁹ Yeerichi yaafee kexon michiye; Yerusaalemi xaqqee uxeroon happiye; taatee kexinaꞌonoo qaaqqoona michiye; arooch beeti aaxxe qiico bullin aalliihe.

²⁰ Goraadoochee muricciti cureenaꞌon kecciꞌi, Baabloonee showooch daammiye. Faariisee taatoo taatemmi wottoon, biinnaa bi shiijjereenaꞌonoyich guuno tuneꞌi maddee beeheete.

²¹ Showoo shambetee kashee aaboon danehe; Erimiyaasina getteeti Doono Yeerichi qaaro ceennemmoyich, shabe nato ciiremmi wottoon, ashaalli xafo tuneꞌi bi beeti yemeeno bullin kashehe.

Ayihudeenaꞌo Boonoshi Showooch Wotto

²² Qiroosi Faariisee showooch bi taateti, batti batti natooba, Erimiyaasi noonoona getteeti, Doono Yeerichi qaaro bi ceennemmoyich, Doono Yeeri Faariisee taatoo Qiroosichi mullo bi tiyemmoyich tuniihe. Biyoo bi taatee showoo bulliich awaajjoon gettiihe; ebi awaajjoo ishichaa bi kooreyemmoyich tuniihe:

²³ “Faariisee taatoo Qiroosi ishichiye: Shimaajji Nuggishoo Doono Yeeri showee toommooch beeti taatittino bullin taach immitone. Yihudee showooch beeti Yerusaalem yaafee kexon biich ta haggemmoyichoo taach gettitone. Bi asheenaꞌoochee ittoshi daggooch beeti asho koniyoona bi Nuggishoo Doono Yeeri biinna tookki tunebe; tiyiree Yerusaalem hambe” iye.