2 Kiinoo 35 - Kafa Linguistics Project

Yosiyaasi Beshee Baaroon Baaroo

¹ Yosiyaasi Yerusaalemaa Doono Yeerich Beshee Baaroon baariye. Batti batti agenee aaraa awuddinnee qemooba, Beshee Baaree bago guureehe.

² Qeesheenaꞌon boonoshi shuuni shuunooch neechiye; Doono Yeerichi yaafee kechi maddoona boonoshin kupphiihe.

³ Boonoshi qelloon Doono Yeerich yaafiti, Israꞌeeleenaꞌon dojjiibeeti Leweenaꞌoyich ishichiye: “Yaafee taabootoon, Daawiti bushoo, Israꞌeelee taatoo Solomooni shuuneti yaafee kexooch kotiibote. Ebiyee damba ittoshi gogooch shaagi beeyaahote. Illa and ittoshi Nuggishoo Doono Yeerinaa bi asheenaꞌonoyich maddebote.

⁴ Israꞌeelee taatoo Daawitinaa bi bushoo Solomoonina dojjiti doyoommon ittoshi yari yara, ittoshi kuxi kuxona qannibote.

⁵ “Lewoo tuneyaani ittoshi maneenaꞌon ittoshi gaachemmoyich, boonoshi yari yara qoodeeree xaaꞌi xaaꞌoon yeshiree, yaafeeti xaaꞌooch neexebote.

⁶ Beshee Baaree bagoonoo guuribote; ittoshiyoo yaafeebote. Doono Yeeri Muusina bi gettitoommon, ittoshi maneenaꞌoyich bagoon bashi qanniibote” iye.

⁷ Yosiyaasi arooch beeti asheenaꞌo Beshee Baaree deejjoon boonoshi deejjemmoyich, shaashe hume bagoonaa emmishoonon, keejje hume wuronoo bi hajjee gijjoochee immiye.

⁸ Iraasheenaꞌoo asheenaꞌoyich, qeesheenaꞌonaa Leweenaꞌonoyich boonoshi daaggoona deejjeyemmi gijjeenaꞌon immiyeete. Doono Yeerichi yaafee kechi ukkireenaꞌo tuneti Hiliqiyi, Zakaariyaasinaa Yehiꞌeelina Beshee Baaree deejjooch giddemmi gutte humaa shiritte balle bagoonaa emmishoonon, keejje balle wuronoo immiyeete.

⁹ Leweenaꞌochi ukkireenaꞌo Konaniyi, bi maneenaꞌo Shemayaahinaa Netaanelina, Hashabiyi, Yeꞌeelinaa Yozabaadina Beshee Baaroyich tunemmi uuche hume bagoonaa emmishoonon, uuche balle wuronoo Leweenaꞌoyich immiyeete.

¹⁰ Baaroon baaroyich bulli mooyo qannitoyee gubb, taatoo gettitoommon, qeesheenaꞌo boonoshi xaaꞌooch, Leweenaꞌoo boonoshi kuxi kuxooch neexeheete.

¹¹ Baaree bagoonaa emmishoonon bashiyeete. Leweenaꞌoo gooqqoon gaxxiyeete; qeesheenaꞌo boonoshi kishoochee boonoshi deqqiti damoon wuciyeete.

¹² Muusichi Sheeree Macaafooch bi kooreetoommon, micciibeeti deejjoon Doono Yeerich boonoshi deejjemmoyich, boonoshi yari yaroonaa boonoshi kuxi kuxona qoodeeti asheenaꞌoyich qoodii immiyeete; wurinaꞌonoo ebiyoommon tuniiheete.

¹³ Boonoshiyoo Beshee Baaree deejjoon qoceetoommon michiyeete. Yaafeeti buuroon shexxooch, guboonaa distoonooch kiijjiyeete. Kaateꞌi asho bullich qoddiyeete.

¹⁴ Ebiyee gubb, boonoshinaa qeesheenaꞌonoyich qanniiheete. Ebiyoo Harooni bushiisheenaꞌo tuneti, qeesheenaꞌo xum beddaahaa micciibeeti deejjoonaa awuyonon deejjii beetinaꞌo boonoshi tunetoyichiye. Ebich Leweenaꞌo boonoshinaa qeesheenaꞌonoyich qanniiheete.

¹⁵ Daawiti, Asaafi, Hemaaninaa taatoochi yaaꞌechi Yedutuunina qociitoommon, Asaafi yareenaꞌo tuneti shoddechinaꞌo boonoshi xaaꞌooch beetinaꞌone. Kello bulliich beeti kellechinaꞌo quyeebeeti xaaꞌoochee baroo boonoshich qaawiyaanoone; ebiyoo boonoshi maneenaꞌo tuneti Leweenaꞌo boonoshich qannii beetoyichiye.

¹⁶ Ebiyoommon Beshee Baaroon baaroonaa micciibeeti deejjoon Doono Yeerichi deejjee gudooch giddiyoona, taatoo Yosiyaasi gettitoommon, ebiyooba qanniye.

¹⁷ Ebiyooba arooch daneti Israꞌeeleenaꞌo Beshee Baaroon baariyeete; Shittoo Giyaani Kochi Baaroonoo ebiyoommon shabaatte qemon baariyeete.

¹⁸ Keemechi Saameelichi yemeenoochee tiijjii, ebiyoommi Beshee Baaroo Israꞌeelee showooch baaree ariyaanoone. Yosiyaasi, qeesheenaꞌo, Leweenaꞌo, arooch beeti Yihudee asheenaꞌo bulli, Israꞌeelee asheenaꞌo bullinaa Yerusaalemi asheenaꞌona baaritoommon, baariti Israꞌeelee taatoo ikkolla aalloone.

¹⁹ Ebi Beshee Baaroo Yosiyaasi taateti aaraa shimittinnee natooba baareehe.

Yosiyaasichi Taatee Yemeenee Ciiro

²⁰ Ebi bulliyee gubb, Yosiyaasi yaafee kexoyich ebi bullin bi tuniichaa, Gibitsee taatoo Neki Efiraaxisi aachi gashooch beeti Karikemish koyooch kechiye. Yosiyaasiyoo biinna koyeya kechiye.

²¹ Nekiyoo, “Yihudee taatoocho, neennaa taannon amo daniihe? Ta waato ta etteenaꞌon kochani, neenna koyeya toonoone. Ta afaafinemmoyich Yeeri taach gettitone. Taanna tookkii beeti Yeeri neen bi aalliyaachemmoyich, ebi mooyon tuniyoochee wottebe” iꞌi wocheyechinaꞌon daachiihe.

²² Tunebaani Yosiyaasi koyeya kuxxiyani, bi waanee wotteyaanoone. Doono Yeeri Nekina gettiton waayoon qaawaanoone. Bi aricheyaachemmoyich bi tahoon shaddiꞌi, Megidi gaddoochaa biinna koyeya hammiye.

²³ Shangechinaꞌo Yosiyaasin kochiyeete. Biyoo bi naayinaꞌoyich “Oogichaa ta mayetoyich, hiniichee taan kichibote” iye.

²⁴ Ebich bi naayinaꞌo gaariichee kindii, bare bi gaariich kotiiꞌi, Yerusaalem deebiyeete. Aroochaanoo qitiye. Bi qaabbechinaꞌo maashooch duukkehe. Yihudee showoonaa Yerusaaleminooch beeti asheenaꞌo bulli biich eeppiyeete.

²⁵ Erimiyaasiyoo Yosiyaasich shooshehe. Shoosheebeeti anaaminaꞌo bullinaa maacheenaꞌo bullina hanaach beddaahaa ebi shooshoon shoosheebee Yosiyaasin shalligii beetinaꞌone. Ebiyoo Israꞌeeleenaꞌoyich doyoo tuneꞌi, Shooshee macaafooch kooreetone.

²⁶ Yosiyaasi shuuneti eche shuunoonaa Doono Yeerichi Sheeree Macaafooch bi kooreetoommon bi tuniiti deꞌe mooyona

²⁷ batti battichoochee tiijjii ciireexooch beddaahaa, bulli mooyo Israꞌeelee taateenaꞌonaa Yihudee taateenaꞌonochi macaafooch kooreetone.