2 Kiinoo 34 - Kafa Linguistics Project

Yihudee Taatoo Yosiyaasi Mooyo

¹ Yosiyaasi bi taatehooba, bi eeno shimitte natone. Yerusaalem beechii shaashaa ikke naton qeejjiye.

² Biyoo Doono Yeeri aafooch kaame mooyon tuniihe. Bi qaabbechi Daawitichi gommon dabboochee qanna yoocha getaanoone.

Bare Nuggisheenaꞌoyich Goyinneebeeti Xaaꞌeenaꞌon Yosiyaasi Aalliyoo

³ Bi taateti shimittinnee natooba, batt busheebee, bi qaabbechi Daawitichi Nuggishoyich maddooch giyiye. Aaraa guttinnee natooba, Yihudee showoonaa Yerusaaleminon guudi toommeexi goyinnee xaaꞌeenaꞌoochee, Asheeri misileenaꞌoochee, qiicaa shuuneeti nuggisheenaꞌonaa ukkaa shuuneeti misileenaꞌonoochee xalliyooch giyiye.

⁴ Bi daaggoona Baꞌaaleenaꞌochi deejjee gudeenaꞌo happeeheete. Biyoo boonoshi gaꞌooch beeti ixaanee deejjee gudeenaꞌon yiikkee aalliihe. Asheeri misileenaꞌon, qiicaa shuuneeti misileenaꞌonaa ukkaa shuuneeti misileenaꞌonon tiichii buricciꞌi bi yiikketoyee gubb, ebi aroon boonoshich deejjiibee echeti asheenaꞌochi maashee toommooch shacciye.

⁵ Qeesheenaꞌochi shaawushoon boonoshi deejjee gudee toommoochaa michiye. Ebin tuniyoona Yihudee showoonaa Yerusaaleminon xalliihe.

⁶ Biyoo Minaasi, Efreeminaa Simooninochi showooch, Nifitaalee showoochoo beddaahaa beeti katemeenaꞌonaa boonoshi guudoona beeti happeeti xaaꞌeenaꞌonooch ebiyoommon tuniihe;

⁷ Israꞌeelee showoo bulliich beeti deejjee gudeenaꞌonaa Asheeri misileenaꞌonon happiye. Shahalleenaꞌonoo buddinochiye; ixaanee deejjee gudeenaꞌon tiichii buricciye. Aroochee Yerusaalem wottehe.

Doono Yeerichi Sheeree Macaafo Dano

⁸ Yosiyaasi bi taateti aaraa shimittinnee natooba showoonaa yaafee kexonon bi xalliitoyee gubb, Atsaliyaahi bushoo Shafaanin, katemee iraashoo Maseyaahinaa Yoꞌakaazi bushoo kiinee koorechi Yoꞌaahinon bi Nuggishoo Doono Yeerichi yaafee kexon boonoshi andiriyemmoyich daachiihe.

⁹ Boonoshiyoo qeeshee guudo Hiliqiy waan hammiyeete; kellee quyechi Leweenaꞌo kiciꞌi Doono Yeerichi yaafee kexooch giijjiti gijjoo qeeshee guudo Hiliqiyich ichehe. Ebi gijjoo Minaasi yoodeenaꞌo waanee, Efreemi yoodeenaꞌo waanee, Israꞌeelee cureenaꞌo waanee, Yihudi yoodo bullinaa Biiniyaami yoodo bullina waanee, Yerusaalem beeti asho bulli waanee kiceeti gijjoone.

¹⁰ Ebi gijjoo Doono Yeerichi yaafee kexon ciini boonoshi shuuniyemmoyich ukkireti asheenaꞌoyich ichehe. Boonoshiyoo yaafee kexon shuunee andirii beetinaꞌoyich qocciyeete.

¹¹ Yihudee taateenaꞌo cikkii qayaa tiisheti kexinaꞌon shuunoyich xaqqoonaa mixonon boonoshi kememmoyich anaaxeenaꞌonaa gimbeyneenaꞌonoyich gijjoon immiyeete.

¹² Asheenaꞌo shuunoon gibeneeton tunoona shuuneheete. Boonoshi toommooch ukkireti, shuunoonoo shuuniibeeti Leweenaꞌo, Meraari gumboochee Yahaatinaa Abidiyina, wotta Qohaati gumboochee Zakaariyaasinaa Meshulaaminane. Leweenaꞌoochee shoddee qiicoona shoddoon ariyecho bulli,

¹³ magge shuunoon shuunechinaꞌonaa baribare shuunechinaꞌonochi toommooch ukkiretinaꞌone; echeti Leweenaꞌo wotta koorechinaꞌo ukkireenaꞌonaa kellechinaꞌonane.

¹⁴ Doono Yeerichi yaafee kexooch giyiti gijjoon kichii boonoshi beetaa qeeshoo Hiliqiyi Muusina icheti Doono Yeerichi Sheeree Macaafoon danehe.

¹⁵ Hiliqiyiyoo koorechi Shafaanich “Sheeree Macaafoon Doono Yeerichi yaafee kexoochee daneto taane” iye. Aroochee macaafoon Shafaanich immiye.

¹⁶ Shafaaniyoo macaafoon taatoyich daammiꞌi, biich ishichiye: “Nooch ne getteto bullin shuuneto noone;

¹⁷ Doono Yeerichi yaafee kexooch beeti gijjoon kichaꞌa, shuunoon ciinnii shuunii beetinaꞌonaa shuunee beetinaꞌonoyich immeto noone” iye.

¹⁸ Aroochee koorechi Shafaani taatoyich “Qeeshoo Hiliqiyi ikke macaafoon taach immitone” iye. Macaafoonoo taatoyich shemmehe.

¹⁹ Taatoo sheeree qaaroon bi waayehooba, bi tahoon keexxiye.

²⁰ Biyoo Hiliqiyich, Shafaani bushoo Ahiqaamich, Miki bushoo Abidoonich, koorechi Shafaaninaa bi naayo Asayaahinoyich ishichiꞌi gettiye:

²¹ “Hamiree taachon, Israꞌeelee showoonaa Yihudee showoonooch echeti asheenaꞌochon, hini daneti macaafooch kooreeti mooyon Doono Yeerin echebote. No qaabbechinaꞌo Doono Yeerichi qaaroon quyo boonoshi qajjitoyich, hini macaafooch kooreeto bulliyoommon tuniyoon boonoshi qajjitoyich, Doono Yeerichi kaaree shiixxoo no toommooch kinditone” iye.

²² Hiliqiyinaa biinna tookkii taatoo daachiiti asheenaꞌona, Yerusaalemi guttinnee kuxooch beeti, keemechi Hulidaah waan echeya hammiyeete. Bi keno, Hasiraahi bushoo Toqihaati bushoo tuneti Shaluumi yaafee kechi tahee ukkiroone. Boonoshiyoo tuneto bullin biich gettiyeete.

²³ Keemechiyoo boonoshich ishichiyan: “Israꞌeelee Nuggishoo Doono Yeeri ishichiye: Ta waan ittoshin wocheti uroyich, ishichi getote:

²⁴ ‘Doono Yeeri ishichi beetone: Gonde mooyon, ebiyoo Yihudee taatoo aafoochaa shemmeeti macaafooch kooreeti ufo bullin, hini xaaꞌoonaa arooch beetinaꞌonochi toommooch deebemmo taane.

²⁵ Boonoshi taan qajjiichii bare nuggisheenaꞌoyich ixaanoon shookkitinaꞌone; boonoshi kishoona boonoshi shuuneti, nuggisheenaꞌona taan ippiitinaꞌone. Ebich ta kaaree shiixxoo hini xaaꞌooch kindi aaxxeshalli bi gettemmo, aqqeyaachemmone’ getote.

²⁶ Doono Yeeri taan echoyich ittoshin wocheti Yihudee taatoyich ishichibote; Israꞌeelee Nuggishoo Doono Yeeri ishichiye: ‘Ne, hini macaafooch getteeti qaaroon waayaꞌa,

²⁷ hini xaaꞌoonaa arooch beetinaꞌonon naxemmo ta tunoon ta getaa waayaꞌa, ne mullo tiishetoyich, Yeeri ta aafooch ne qelloon ne giishiitoyich, ne tahoon ne keexxetoyich, ta aafooch ne eeppetoyich, ne corootoon waayeto taane.

²⁸ Ebich hini xaaꞌoonaa arooch beetinaꞌonochi toommooch ta deebemmi gonde mooyon ne aafoona beegaanoon ne qaabbechinaꞌo waan ne xaꞌeyemmoyich tuniyemmo taane; diggoona beeree maash hammemmo neene’ itone” iyan. Boonoshiyoo ebin yechiꞌi taatoo waan wotteheete.

Yosiyaasi Doono Yeerich Hajjeyoyich Wogoon Gimo

²⁹ Aroochee taatoo Yosiyaasi Yihudee showee geeneenaꞌo bullinaa Yerusaalemi geeneenaꞌo bullinon ikkooch kiciye.

³⁰ Aroochee taatoo damba Doono Yeerichi yaafee kexooch hammiye. Biinna tookkii Yihudee asheenaꞌo bullinaa Yerusaalemi asheenaꞌo bullina, qeesheenaꞌo, Leweenaꞌo, asheenaꞌo bulli giishoochee oogooch beddaahaa hammiyeete. Biyoo Doono Yeerichi yaafee kexoochee daneti wogee macaafeexi qaaro bullin boonoshich waayiiꞌi shemmehe.

³¹ Taatoo bi beetooch neexeechii, ceeni bi mulloonaa ceeni bi kashoona Doono Yeerin dabboyich, bi getoon, bi qociyoonaa bi sheeroonon quyoyich, ebi macaafooch kooreeti wogoon ceechoyich, Doono Yeeri aafooch wogoon giyiye.

³² Aroochee Biiniyaamee asho bullinaa Yerusaalemi daneti asho bullina ebi mooyona wogoon boonoshi giyemmoyich tuniihe. Yerusaalem beetinaꞌoo boonoshi qaabbechinaꞌochi Nuggishoochi wogo gettii beetoommon tuniiheete.

³³ Yosiyaasi ciigiiti, shahalloo bullin Israꞌeelee showoo bulliichee aalliihe. Israꞌeelee showoo bulliich beetinaꞌo boonoshi Nuggishoo Doono Yeerich boonoshi goyinne maddemmoyich tuniihe. Kashoona bi beeti yemeenooch boonoshi qaabbechinaꞌochi Nuggishoo Doono Yeerin dabboochee gubb wotteyaaneenaꞌone.