2 Kiinoo 33 - Kafa Linguistics Project

Yihudee Taatoo Minaasi Mooyo

¹ Minaasi bi taatehooba, bi eeno aaraa gutte natone. Yerusaalem beechii aachaa uuche naton qeejjiye.

² Doono Yeeri Israꞌeeleenaꞌo aafoochee yookkii aalliiti aageteenaꞌochi, ciigiiti doyoon dabboona Doono Yeeri aafooch gonde mooyon tuniihe.

³ Bi nihoo Hiziqiyaasi happii aalliiti, guudi toommeexi goyinnee xaaꞌeenaꞌon wochinnoon shuunehe; Baꞌaaloyich deejjee gudeenaꞌon shuunehe; nuggishee Asheeri misileenaꞌon neechiye; shimaajji xojjeno bullichoo goyinnee maddehe.

⁴ Doono Yeeri, “Ta shigo Yerusaalem bulli yemeenoon bi beeyemmoyich tuniyemmo taane” bi iti, Doono Yeerichi yaafee kechi daggooch aageteenaꞌochi nuggisheenaꞌoyich deejjee gudeenaꞌon shuunehe.

⁵ Yaafee kechi gutte addibaabooch xojjeneenaꞌo bulli goyinneyemmi deejjee gudeenaꞌon shuunehe;

⁶ bi hajjee bushiisheenaꞌon Hinoomi bushoo bamboochaa goggiꞌi deejjoo giddiihe. Biyoo kaayecho, iicechonaa qaaxechonon tunehe. Qititi ashoona tookkii yibbaatee beetinaꞌonaa allaameenaꞌona waanee keemmii waayee beehe. Wodde gonde mooyon shuunoona Doono Yeerin ippii beehe.

^7-8 Yeeri Daawitinaa bi bushoo Solomooninoyich, “Hini yaafee kexo, hini Yerusaalemi, Israꞌeelee yoodeenaꞌo showoo bulliichee ta shigo bulli yemeenoon bi beeyemmoyich, ta kaacceti xaaꞌoone. Israꞌeeleenaꞌo boonoshich ta getteti mooyo bullin boonoshi quyegaata, ta guuno Muusi boonoshich gettiti sheeroo bullin, qociyoonaa doyoonon boonoshi ceechi gaatoo, boonoshi qaabbechinaꞌoyich ta immeti hini showoochee boonoshi baatoon boonoshi waaxxemmoyich tuniyaachemmo taane” iꞌi bi gettiti yaafee kexooch, bi shuuneti shahalloon deebii neechiye.

⁹ Doono Yeeri Israꞌeeleenaꞌo aafoochee yookkii aalliiti aageteenaꞌo shuunetoyee beshe wodde gonde mooyon boonoshi shuunemmoyich, Minaasi Yihudee asheenaꞌonaa Yerusaalemi asheenaꞌonon muriciihe.

Axaaxoon Bi Shuunetoyich Minaasi Ayinoo

¹⁰ Doono Yeeri Minaasinaa bi asheenaꞌonoyich bi gettitaanona, waayemmon qajjiyeete.

¹¹ Ebich Doono Yeeri Asooree gino boonoshin bi kochemmoyich tuniihe. Boonoshiyoo Minaasichi muddooch tuutoon geddii, gooshee qoqqaannoona cuchiꞌi, Baabloonee showooch daammiyeete.

¹² Minaasi bi xuuxehooba, bi Nuggishoo Doono Yeerichi gaachoon qaawiye. Bi qaabbechinaꞌochi Nuggishoo aafooch bi qelloon oogeton giishiiꞌi corootiye;

¹³ Yeeriyoo bi qolloon waayeꞌi, Yerusaalem, bi taatittinooch biin wochiye. Minaasiyoo Doono Yeeri Nuggishoo bi tunoon ariihe.

¹⁴ Ebiyee gubb, bambooch beeti Giyooni aachi xuuphoochaa aabi-gimo waanee tiijjii, Haashee Kellooch beddaahaa beeti Daawiti Katemee maachi xaqqee uxeroon, Ofeeli geppoon guudiiꞌi, genjiiꞌinoo wochinnoon uxerehe. Yihudee showooch beeti xaqqee uxerechi katemoo bulliich ginee iraasheenaꞌon kotiihe.

¹⁵ Biyoo dallaawe nuggisheenaꞌonaa shahalloonon Doono Yeerichi yaafee kexoochee kichiye. Doono Yeerichi yaafee kexo beeti geppoonaa Yerusaaleminooch bi shuuneti deejjee gudo bullin katemoyee maach daammiꞌi duppiye.

¹⁶ Doono Yeerichi deejjee gudoon wochinnoon shuunehe. Ikkittinee deejjoonaa galletee deejjoonon arooch deejjiye. Yihudee asheenaꞌo Israꞌeelee Nuggishoo Doono Yeerich boonoshi goyinnemmoyich gettiye.

¹⁷ Andoo asheenaꞌo guudi toommeexi goyinnee xaaꞌeenaꞌooch deejjoon giddii beetinaꞌo boonoshi tunetaanoona, deejjoon boonoshi giddiibeeto, ikke Nuggishoo Doono Yeerich baachiye.

Minaasichi Taatee Yemeenee Ciiro

¹⁸ Minaasi shuuneti eche shuunoo, bi Nuggishoo waan bi corootiti corooto, Israꞌeelee Nuggishoo Doono Yeerichi shigoona biich boonoshi gettiti yaaꞌechinaꞌochi qaaro Israꞌeelee taateenaꞌo kiinee macaafooch kooreetone.

¹⁹ Wotta bi corooto, Doono Yeeri bi qolloon waayo, bi axaaxoo bullinaa gibeneyee bi qayona, bi qelloon bi giishiyoyee aaf bi shuuniiti geppee toommeexi goyinnee xaaꞌeenaꞌo, Asheeri misileenaꞌon bi neechiti xaaꞌoonaa shahalleenaꞌon bi neechiti xaaꞌoona yaaꞌechinaꞌochi kiinee macaafooch kooreetone.

²⁰ Minaasi qitiꞌi bi qaabbechinaꞌo waan xaꞌeehe. Bi taatee kechi gaꞌoochoo duukkehe. Bi bushoo Amooni bi xaaꞌooch kereeꞌi taatehe.

Yihudee Taatoo Amooni Mooyo

²¹ Amooni bi taatehooba, bi eeno hiyaa gutte natone. Yerusaalem beechii gutte naton qeejjiye.

²² Amooniyoo bi nihoo Minaasi tuniitoommon, Doono Yeeri aafooch gonde mooyon tuniihe. Bi nihoo Minaasi shuuneti shahalleenaꞌoyich deejjoon deejjiye; goyinneenoo maddehe.

²³ Bi nihoo Minaasi bi qelloon bi giishiyoommon, Doono Yeeri aafooch bi qelloon giishiyaanoone. Axaaxoon shuunoona beshii beshii qeyiye.

²⁴ Amooni naayinaꞌo bi toommooch koceeꞌi, taatee kexoochaa biin wuxiyeete.

²⁵ Tunebaani Yihudee asheenaꞌo taatoo Amoonin wuxitinaꞌo bullin wuxiyeete; bi bushoo Yosiyaasin bi xaaꞌooch keriꞌi taatiiheete.