2 Kiinoo 32 - Kafa Linguistics Project

Asooreenaꞌo Yerusaalemin Kocha Miicho

¹ Hiziqiyaasi gibeneeton tunoona ebi bulli mooyon bi tuniitoyee gubb, Asooree taatoo Senakireebi Yihudee showoon kocha kechiye. Koyi yeshiree boonoshin hajjiya gabiꞌi, xaqqee uxerechi katemee ciinooch kaamboon geddii kotehe.

² Hiziqiyaasiyoo Senakireebi womon, Yerusaaleminoo kocha bi qaawoon ariiꞌi,

³ katemoyee maach ufeebeeti aachi xuupheenaꞌo hichemmoyich, showee iraasheenaꞌonaa ginee iraasheenaꞌona tookkii boyeehe. Boonoshiyoo biin gaacheheete.

⁴ Dofee asheenaꞌoo kiceeꞌi, “Asooree taateenaꞌo waa wodde aacon boonoshi danemmo, amoyichiye?” iꞌi, aachi xuupho bullinaa showee maacoona ufeebeeti aaconon hicciyeete.

⁵ Ebiyee gubb, taatoo kuppheꞌi shuunoona tiisheti xaqqee uxeroo bullin wochinnoon shuunehe. Uxeree toommoochoo dilaaloon shuunehe. Uxeroyee maach bare xaqqee uxeroon shuunehe. Daawiti Katemooch, Miiloo getteebeeti xaaꞌooch beeti mishigoon manjiiꞌi shuunehe; wodde ginee qiicoonaa gaachoonon shuunehe.

⁶ Are katemee asheenaꞌo toommooch ginee iraasheenaꞌon iraashiihe; boonoshin katemee uxeree kelleexi addibaabooch, bi aafooch bi kicitoyee gubb, ishichiꞌi boonoshin kupphiihe:

⁷ “Kupphebote; maaci kuxoonoo tunebote. Noonna tookkii beeto, boonoshina tookkii beetoyee besho bi tunetoyich, Asooree taatoonaa biinna tookkii beeti meeti ginee naayinaꞌonon shattaahote; keqqiyaahote.

⁸ Boonoshina tookkii beeto, ashi giidoone; tunebaani noonna tookkii beeto, noon gaachemmi, wottoo no etteenaꞌon nooch kochemmi, no Nuggishoo Doono Yeerine” iye. Ebi Yihudee taatoo Hiziqiyaasi gettiti qaaroona asheenaꞌo kuppheheete.

⁹ Ebiyee gubb, Asooree taatoo Senakireebi bi ginee naayo bullina tookkii Lakishi katemooch beechii, ishichiibeeti wochoon Hiziqiyaasinaa biinna tookkii Yerusaalem beeti Yihudee asheenaꞌonoyich deejjiye:

¹⁰ “Asooree taatoo Senakireebi ta getta beeto ishichiiniye: ‘Giicheeti katemee Yerusaalem and beddaahaa ittoshi koteto, konin gibeneꞌiniye?

¹¹ Hiziqiyaasi, “No Nuggishoo Doono Yeeri Asooreenaꞌo kishoochee noon wodiyemmone” bi ii beeto, shaacoonaa shachewoona ittoshi qitemmoyich, ittoshin muriciyoyich toone?

¹² Yihudee asheenaꞌonaa Yerusaalemi asheenaꞌonoyich, “Ikke deejjee gudooch baach ixaanoon shoohibee aroochaa goyinnebote” getona bi Nuggishoochi guudi toommeexi goyinnee xaaꞌeenaꞌonaa deejjee gudeenaꞌonon happii aalliito, Hiziqiyaasi toone?

¹³ “ ‘Ta qaabbechinaꞌonaa taanna bare showee asheenaꞌo bulli toommooch amoon no tuniito gaata ariyaachote? Are showee asheenaꞌochi nuggisheenaꞌo boonoshi showoon ta kishoochee wodiyoon hakkiteete?

¹⁴ Ta qaabbechinaꞌo aalliiti, ebi taateenaꞌochi nuggisheenaꞌo bulliichee, bi asheenaꞌon ta kishoochee wodiyoon hakkiti nuggishoo aabine? Ishigaata, ittoshi nuggishoo ta kishoochee ittoshin aabichiree wodiyoon hakkehe?

¹⁵ Andoo Hiziqiyaasi ittoshin dachaaye; ittoshin muriciyaaye; Hiziqiyaasin iberiyaahote. Bi asheenaꞌon ta kishoochee woyee ta qaabbechinaꞌo kishoochee wodiyoon hakkiti, amee showee asheenaꞌochi woyee taatoochi nuggisholla aalloone. Ittoshi nuggishochi, ta kishoochee ittoshin wodiyoon bi hakkemmo, aabichireeshiye?’ iiniye” iye.

¹⁶ Senakireebi wocheti iraasheenaꞌo, Nuggishoo Doono Yeerinaa bi guuno Hiziqiyaasinochi toommooch ebiyee beshe wodde gonde mooyon gettiyeete.

¹⁷ Senakireebi, Israꞌeelee Nuggishoo Doono Yeerin naagona, “Bare showee asheenaꞌochi nuggisheenaꞌo boonoshi asheenaꞌon ta kishoochee wodiyoon hakkoo boonoshi qayoommon, Hiziqiyaasichi nuggishoo bi asheenaꞌon ta kishoochee wodiyoon hakkaachemmone” iꞌi koorichoon kooriye.

¹⁸ Ebi are iraasheenaꞌo uxeree toommooch koteti Yerusaalemi asheenaꞌo waan qaaroon oogichiꞌi Ayihudee noonoona cookiyeete. Ebin boonoshi tuniito eechi keqqichi shatiiree katemoon yecha iꞌiniye.

¹⁹ Boonoshiyoo ashi kishoona shuuneeti, aageteenaꞌochi nuggisheenaꞌo toommooch boonoshi yibbaatetoommon, Yerusaalemi Nuggishoo toommooch yibbaateheete.

²⁰ Taatoo Hiziqiyaasinaa Amootsi bushoo keemechi Isiyaasina ebi mooyoyich shimaayooch cookiꞌi Yeer waan corootiyeete.

²¹ Doono Yeeriyoo Asooree taatoochi kaambooch bi maraakoon daachiiꞌi, ginee anaaminaꞌon, ginee iraasheenaꞌonaa ukkireenaꞌonon bi aalliyemmoyich tuniihe. Ebina Asooree taatoo giisheꞌi bi showooch wottehe. Bi nuggishoo kexooch bi giyimmona, bi gutenoochee kechiti bi bushiisheenaꞌo aroochaa goraadoona biin wuxiyeete.

²² Ebiyoommi gommona Doono Yeeri Hiziqiyaasinaa Yerusaalemi asheenaꞌonon Asooree taatoo Senakireebichi kishoonaa boonoshi etteenaꞌo bulli kishoonoochee wodiihe. Boonoshi guudoona beeto bulliicheenoo boonoshin kashiihe.

²³ Meeti asheenaꞌoo Doono Yeerich wojjoon yechiꞌi, Yerusaalem waa beeheete. Yihudee taatoo Hiziqiyaasichoo aaxxe mooyon immii beeheete. Aroobee tiijjiꞌi aageteenaꞌo Hiziqiyaasich oogoon immii beeheete.

Hiziqiyaasi Biiyee Wodoo

²⁴ Ebiyooba Hiziqiyaasi biiyee mawiiꞌi qitooch beddiye; biyoo Doono Yeer waan corootiye. Doono Yeeriyoo biich yibbaatehe; malletoonoo biich immiye.

²⁵ Tunebaani Hiziqiyaasi bi mulloo geecaa, Doono Yeeri biich tuniiti deꞌe mooyoyich biin galleteyaanoone. Ebich bi toommooch, Yihudee showoonaa Yerusaaleminochi toommooch, Doono Yeeri kaaro kindiye.

²⁶ Tunebaani ciiroochaa Hiziqiyaasinaa Yerusaalemi asheenaꞌona boonoshi qelloon giishiiheete. Ebich Hiziqiyaasichi taatee yemeenooch Doono Yeeri kaaro boonoshi toommooch waataanoone.

Hiziqiyaasichi Gaannoonaa Oogoona

²⁷ Hiziqiyaasich wodde gaannoonaa oogoona beetone. Birewoonaa aachoonon, aaxxe xaqqoonaa qimaamoonon, gaachoonaa aaxxe qiico bullinon bi kotiyemmi qiicee kexinaꞌon shuunehe.

²⁸ Maayoon, woyinee uyoonaa zayitoonon bi kotiyemmi kexinaꞌon, gijjeenaꞌoyich maggoon, bageenaꞌonaa emmisheenaꞌonoyichoo qeyi xaaꞌoon shuunehe.

²⁹ Doono Yeeri wodde gaannoon, miimon, bagoonaa emmishoon biich bi immitoyich, meeti katemeenaꞌon shuunehe.

³⁰ Dambee Giyooni aachi xuuphoon gabbiꞌi, aaco bi qobboona dugilla waaree, aabi-gimo waan, Daawiti Katemooch bi kindemmoyich tuniito, ebi Hiziqiyaasine. Bi shuunoo bulliyoo biich kaamehe.

³¹ Tunebaani Baabloonee iraasheenaꞌochi wocheyechinaꞌo bi showooch tuneti mooyon biin echeya bi waan boonoshi waahooba, Doono Yeeri biin beegga, bi mullooch beetonoo ariiya bi qaawitoyich biin qajjiye.

Hiziqiyaasichi Taatee Yemeenee Ciiro

³² Hiziqiyaasi shuuneti eche shuunoonaa bi tuniiti gaawe mooyona Amootsi bushoo keemechi Isiyaasichi yaaꞌooch, ebiyoommon wotta Yihudee taateenaꞌonaa Israꞌeelee taateenaꞌonochi kiinee macaafooch kooreetone.

³³ Hiziqiyaasiyoo qitiꞌi bi qaabbechinaꞌo waan xaꞌeehe. Daawiti yareenaꞌochi damba qachi maashooch biin duukkiyeete. Yihudee showoonaa Yerusaaleminooch beeti asho bulli biich oogoon immiye. Bi bushoo Minaasi bi xaaꞌooch kereeꞌi taatehe.