2 Kiinoo 31 - Kafa Linguistics Project

Guudi Toommeexi Goyinnee Xaaꞌeenaꞌon Asheenaꞌo Happii Aalliyoo

¹ Ebi bulli tunetoyee gubb, arooch beeti Israꞌeeleenaꞌo Yihudee showooch beeti katemeenaꞌooch hammiꞌi, bullinolla boonoshi aalliimmi wottoon goyinnee xaqqee giimbeenaꞌon tiichiyeete; Asheeri misiloon kuxxiyeete. Yihudichi, Biiniyaamichi, Efreeminaa Minaasinochi showooch beeti guudi toommeexi goyinnee xaaꞌeenaꞌonaa deejjee gudeenaꞌonon happiyeete. Ebiyee gubb, Israꞌeeleenaꞌo boonoshi katemeenaꞌooch, boonoshi kexi kexooch wotteheete.

Qeesheenaꞌoyich Icheti Wojjoo

² Hiziqiyaasi qeesheenaꞌonaa Leweenaꞌonon boonoshi kuxi kuxona, boonoshi maddi maddooch neechiye. Doono Yeerichi kechi kelloochaa micciibeeti deejjoonaa ikkittinee deejjoonon boonoshi giddiyemmoyich, boonoshi maddemmoyich, boonoshi galletemmonaa boonoshi oogiyemmonoyich, qeesheenaꞌonaa Leweenaꞌonon boonoshi maddi maddoommon neechiye.

³ Doono Yeerichi sheerooch bi kooreetoommon, maaddoonaa womikkoona, shambetooba, agenee keyi baaroobinaa maacheti baaroobina giddeebeeti, micciibeeti deejjoyich taatoo bi hajjee gijjoochee immiye.

⁴ Qeesheenaꞌonaa Leweenaꞌona boonoshi shuunee aabo bullin Doono Yeerichi sheeree maddooch boonoshi heechiyemmoyich, Yerusaalem beeti asheenaꞌo boonoshi qoodoon boonoshi immemmoyich, gettiye.

⁵ Ebin bi gettimmona, bekkech Israꞌeeleenaꞌo maayoochee, woyinee uyoochee, zayitoochee, eeyonaa goyaa daneebeeti maayo bullinoochee maayi cilloon woddiiꞌi immiyeete. Boonoshich beeto bulliichee oogichii woddiiꞌi asraatoon giddiiheete.

⁶ Yihudee showeexi katemeenaꞌooch beeti Israꞌeeleenaꞌonaa Yihudee asheenaꞌona miimonaa bagoonoochee asraatoon, wotta boonoshi Nuggishoo Doono Yeerich boonoshi kichiti mooyon deebiꞌi gutiyeete.

⁷ Keejjinnee agenoochee tiijjiꞌi gutiibee shabaattinnee agenooch ciichiyeete.

⁸ Hiziqiyaasinaa iraasheenaꞌona waa guteeti wojjoon beeggiꞌi, Doono Yeerinaa bi asheenaꞌo tuneti Israꞌeeleenaꞌonon diiriyeete.

⁹ Aroochee Hiziqiyaasi qeesheenaꞌonaa Leweenaꞌonon ebi guteeti wojjeechon echehe.

¹⁰ Sadooqi yaroochee tuneti qeeshee guudo Azariyaasi Hiziqiyaasich “Asheenaꞌo boonoshi wojjoon Doono Yeerichi yaafee kexooch boonoshi deebitoyee hach no maa miyaa echetone; Doono Yeeri asheenaꞌon bi diiritoyich, ebi shaahe woddoo echetone” iye.

¹¹ Doono Yeerichi yaafee kechi gaꞌooch maayo kiceyemmi gatoon boonoshi qanniyemmoyich, Hiziqiyaasi gettiye; boonoshiyoo qanniiheete.

¹² Aroochee maayi buuroon, asraatoonaa Yeerich kechiti wojjeenaꞌonon gibeneyoona deebiꞌi arooch geddiyeete. Lewoo Konaniyi ebi qiiceenaꞌo toommooch ukkirehe. Bi manoo Shimeꞌiyoo ukkirittinoona biyee guttinnoone.

¹³ Konaniyinaa bi manoo Shimeꞌinoyee desh tuneꞌi, shuunoyich, Yehiꞌeeli, Azaziyi, Nahaati, Asaheeli, Yerimooti, Yozabaadi, Eleli, Ismakiyi, Mahaatinaa Beenayinon taatoo Hiziqiyaasinaa qeeshee guudo Azariyaasina ukkiriiheete.

¹⁴ Lewoo, aabi-keyo waanee kelloon quyeebeeti, Yimini bushoo Qoori, mullee daaggoona Doono Yeerich icheti gijjoonaa yaafeeti mooyinaꞌonon qoodoyich ukkirehe.

¹⁵ Qeesheenaꞌo beeti katemeenaꞌooch tuneꞌi Edeni, Miniyamini, Yaasi, Shemayaahi, Amariyinaa Shekaniyina biin gaachee beeheete; boonoshiyoo gibeneeton tuneꞌi boonoshi maneenaꞌo tuneti qeesheenaꞌoyich, ogoogeenaꞌonaa gishiisheenaꞌonoyich boonoshi kuxi kuxona boonoshi qoodi qoodoon immii beeheete.

¹⁶ Keejje natoyee damboo tuneti, yari yaree haddoona mazgabooch kobereeti, boonoshi kuxi kuxonoo shuunoonaa maddoonooch qemi qemona Doono Yeerichi yaafee kexooch giyiibeeti anaaminaꞌo bullichoo qoodii beeheete.

¹⁷ Qeesheenaꞌoyich shuunee qoodoo bi icheto boonoshi yari yaree haddoona tunemmona, boonoshi eeno hiye natoyee damboo tuneti Leweenaꞌoyich wotta bi icheto boonoshi shuuni shuunee shaahoommonane.

¹⁸ Ebi qeesheenaꞌonaa Leweenaꞌona boonoshi qelloon yaafiti, gibeneetinaꞌo boonoshi tunetoyich, boonoshi kobereeto boonoshi mecheenaꞌona, boonoshi bushiisheenaꞌonaa boonoshi qeejjiibeeti asheenaꞌo bullina tookkiiniye.

¹⁹ Haroonichi yareenaꞌoyich icheti katemeenaꞌochi guudoona beeti goyee xaaꞌeenaꞌooch woyee bare katemeenaꞌooch beeti qeesheenaꞌo daggoochee qeesheenaꞌochi kechi asheenaꞌonaa boonoshi daggooch beeti Lewi yoodee mazgabooch kobereeti anaaminaꞌo bullinoyich boonoshi qoodemmoyich, ukkireti asheenaꞌo beetinaꞌone.

²⁰ Hiziqiyaasi Yihudee showoo bulliich ebiyoommon tuniihe; bi Nuggishoo Doono Yeeri aafooch deꞌo, kaamoonaa gibeneetona tuneti mooyon tuniihe.

²¹ Doono Yeerichi yaafee kechi maddoon tunetaa, Doono Yeerichi sheeroonaa getoonon ceechoon ciinnii beetona, bi tuniibeeto bullin bi ceeni mulloona Doono Yeerin gibenoona tuniihe; biichoo mooyo mashaamiye.